Proverbionan 12
12
1Hende ku ke pa otro koregié, ta demostrá ku e ke siña,
hende ku no ke pa otro koregié ta bobo.
2Es ku hasi bondat tin simpatia di SEÑOR,
hende ku mal ehèmpel E ta kastigá.
3Maldat no ta sirbi komo fundeshi pa nada,
pero un hustu ta manera un palu ku rais hundu.
4Un bon esposa ta pa su kasá manera un korona ta pa un rei,
un esposa ku ta pone kara di su kasá na bèrgwensa,
ta un enfermedat maligno ku ta kaba ku e esposo.
5Hende hustu ta pensa solamente riba hustisia,
mal hende solamente riba engaño.
6Palabra di mal hende ta trampa mortal,
palabra di hende hustu, salbashon.
7Mal hende ta kai, kaba na nada,
hende hustu ta keda riba pia.
8Mas sabí, mas apresio;
mas bobo, mas despresio.
9Mihó bo ta hende simpel i bo tin sirbiente,
ku bo ta yen di idea, anto bo ta pasa mizeria.#Sirag 10:27
10Hende hustu sa asta kiko nan bestianan ta sinti,
mal hende no sa mes kiko ta kompashon.
11Es ku plug su tera lo tin pan na abundansia,
es ku biba di ilushon no ta usa su sintí.
12Antoho di mal hende ta plaka mal ganá;
pero trabou di e hustu ta produsí algu en realidat.
13Un sakadó di mentira ta hoga den su mes mentiranan,
pa un hende honesto semper tin salida.
14Hende ta rekohé fruta di loke nan bisa#Proverbionan 13:2; 18:20
i risibí pago pa loke nan hasi.
15Den bista di hende bobo, semper é tin rason,
pero hende sabí ta tuma bon konseho.
16Hende bobo ta demostrá su disgustu mesora,
hende sabí ta skond'é.
17Testigu honesto ta papia bèrdat,
testigu falsu ta para gaña.
18Palabra papiá pa loko ta hùrt hende profundamente,
palabra na ora ta trese alivio.
19Palabra bèrdat ta dura pa semper,
mentira no ta dura largu.
20Mentira ta biba den kurason di esnan ku ke hasi maldat,
pero esnan ku trese pas ta toka parti den alegria.
21Hende hustu ta keda ispar di mizeria,
mal hende ta haña nan ku desaster tra'i desaster.
22Hende ku ta gaña ta repugná SEÑOR,
ma hende konfiabel ta agrad'É.
23Hende sabí no ta kana broma ku nan sabiduria,
pero hende bobo gusta kana show ku nan bobedat.
24Hende trahadó ta dominá,
hende floho ta otro hende ta dominá nan.
25Sufrimentu ta deprimí hende,
palabra amabel ta hasi hende kontentu.
26Hende hustu ta bon guia pa su próhimo,
mal hende ta pon'é riba kaminda robes.
27Un yagdó floho ta keda sin ko'i kushiná,
pero energia ta kos di gaba.
28Hustisia ta e kaminda pa bida,
un patruli seif kaminda morto n' ta drumi lur.#Romanonan 6:21-22
Currently Selected:
Proverbionan 12: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
