Mateo 6

Siñansa tokante dunamentu

1Tene kuidou boso no kumpli ku boso obligashonnan religioso públikamente djis pa hende mira.#Mateo 23:5 Sino boso lo no haña rekompensa di boso Tata ku ta den shelu.

2Ora bo ta duna esnan den nesesidat algu, no kana bende grandi pa tur hende mira, manera e hipókritanan ta kana hasi riba kaya i den snoa. Nan ta hasi asina pa hende gaba nan. Mi ta sigurá boso: Ya nan a haña nan pago kaba.

3Ma abo, ora bo ta duna esnan ku ta den nesesidat algu, no laga bo man robes sa kiko bo man drechi ta hasi. 4Asina bo dunamentu ta keda sekreto i bo Tata ku ta mira loke ta sekreto lo rekompensá bo.#6:4 rekompensá bo; otro manuskrito tin: rekompensá bo públikamente

Siñansa tokante orashon

(Lukas 11:2-4)

5Ora boso ta resa, no resa manera e hipókritanan; nan gusta para resa den snoa i na skina di kaya pa hende mira nan.#Lukas 18:10-14 Mi ta sigurá boso: Ya nan a haña nan pago kaba. 6Ma abo, ora bo ta bai resa, drenta bo kamber sera porta i resa na bo Tata, ku ta den e lugá sekreto akí, i bo Tata ku ta mira loke bo ta hasi den skondí lo rekompensá bo.#6:6 Mira nota na 6:4. 7Anto ora boso ta resa, no resa ku un lawina di palabra manera pagano; nan ta kere ku Dios ta skucha nan, pasobra nan ta resa ku hopi palabra.#Sirag 7:14 8No hasi antó manera nan, pasobra boso Tata sa loke boso mester, promé ku boso pidiÉ.

9Resa antó di e forma akí:

Nos Tata, ku ta na shelu,

bo nòmber sea santifiká;

10laga bo reino bini;

bo boluntat sea hasí

na tera meskos ku na shelu.

11Duna nos awe nos pan di kada dia;#Proverbionan 30:8-9

12i pordoná nos nos faltanan

meskos ku nos ta pordoná esnan ku a falta ku nos;

13i no laga nos kai den tentashon,

ma libra nos di e malbado.#6:13 di e malbado; otro posibel tradukshon: di malu.

[Pasobra di Bo e reino ta, tur poder i gloria, te den eternidat. Amèn.]

14Si boso pordoná hende nan faltanan, boso Tata ku ta den shelu tambe lo pordoná boso. 15Ma si boso no pordoná otro hende nan faltanan, boso Tata tampoko no ta pordoná boso faltanan.#Sirag 28:2-5; Marko 11:25-26

Siñansa tokante ayuno

16Ora boso ta yuna, no traha kara fèrdrit manera e hipókritanan; nan ta hasi nan kara mahos pa hende mira ku nan ta yuna. Mi ta sigurá boso: Ya nan a haña nan pago kaba. 17Ma abo, ora bo ta yuna, laba kara i peña kabei 18pa asina hende no ripará ku bo ta yuna. Solamente bo Tata, ku ta den skondí, lo mira; i bo Tata ku ta mira loke bo ta hasí na skondí, lo rekompensá bo.#6:18 Mira nota na 6:4.

Siñansa tokante rikesa

(Lukas 12:33-34)

19No montoná rikesa riba mundu kaminda mòt i frus ta kome nan#Hakobo 5:2-3 i ladron ta kibra drenta hòrta nan. 20Montoná rikesa den shelu, einan ni mòt ni frus no por kaba ku nan, ni ladron no por kibra drenta hòrta nan.#Tobit 4:9; Sirag 29:11 21Pasobra kaminda bo rikesa ta, einan bo kurason tambe ta.

Wowo ta manera un lampi pa kurpa

(Lukas 11:34-36)

22Wowo ta un lampi pa kurpa; ke men si bo wowo ta salú, henter bo kurpa ta yená ku lus. 23Si bo wowo ta malu, henter bo kurpa ta den skuridat. Anto si e lus den bo ta skuridat, esta un skuridat teribel esei ta!

No por sirbi dos shon

(Lukas 16:13)

24Niun hende no por sirbi dos shon, pasobra lo e odia esun i stima e otro. Lo e pega un na su kurason i menospresiá e otro. Ta imposibel sirbi Dios i plaka tambe.

Siñansa tokante nesesidat i problema di tur dia

(Lukas 12:22-34)

25Mi ta bisa boso: No preokupá pa boso bida, esta si boso tin di kome òf di bebe.#6:25 òf di bebe: tin manuskrito ku no tin e palabranan akí Ni tampoko si boso tin paña pa boso bisti. Akaso bo bida no ta bal mas tantu ku kuminda i bo kurpa mas tantu ku paña? 26Wak e paranan den laria; nan no ta sembra ni kosechá, ni nan no ta warda nada den mangasina. Ta boso Tata den shelu ta duna nan di kome! Boso no ta bal mas tantu ku para? 27Ni maske kuantu boso preokupá, ta kua di boso lo por rèk su bida niun krenchi?

28I pakiko boso ta preokupá ku bistimentu? Paga tinu kon e flornan di mondi ta krese. Nan no ta hasi trabou ni traha tela. 29Sinembargo Ami ta bisa boso ku ni rei Salomon den tur su grandesa#1 Reinan 10:4-7; 2 Krónikanan 9:3-6 no tabata bisti mes bon ku un di nan. 30Si Dios ta bisti flor di mondi ku awe t'ei pero mañan ta bai tirá den fòrnu, bunita asina, kuantu mas lo E bisti boso, hende di poko fe. 31P'esei no preokupá i puntra: “Kiko nos ta kome? Kiko nos ta bebe? Kiko nos ta bisti?” 32Pasobra ta e paganonan ta kore tras di tur e kosnan akí. Boso Tata den shelu sa ku boso tin mester di tur e kosnan akí. 33Buska reino di Dios i buska pa hasi su boluntat promé i boso ta haña tur e sobrá kosnan akí aserka.

34Pues, no preokupá pa e dia di mañan, pasobra e dia di mañan ta preokupá pa su mes problemanan. Kada dia tin sufisiente problema di su mes.#Salmo 55:22; 1 Pedro 5:7

Currently Selected:

Mateo 6: PBDC13

Highlight

Copy