Lukas 17

Mas dicho di Hesus

(Mateo 18:6-7,21-22; Marko 9:42)

1Hesus a bisa su disipelnan: ‘Tin kos ku ta pone hende kai den piká; esei ta inevitabel, ma ai di esun ku ta trese nan! 2Lo tabata mihó p'e, pa mara un piedra grandi di mulina rònt di su garganta i bent'é na laman, ku p'e laga un di e chikitunan akí kai den piká. 3Boso mes, sea alerta! Si boso ruman peka,#17:3 peka; otro manuskrito tin: faya ku bo skual e i si e arepentí, pordon'é.#Mateo 18:15 4I si e peka kontra bo shete be riba un dia i bira bisa bo shete be: “Mi tin duele di loke mi a hasi”, bo mester pordon'é!’

5E apòstelnan a bisa Señor Hesus: ‘Hasi nos fe krese.’ 6Anto Señor a bisa nan: ‘Si boso fe tabata mes grandi ku un pipita di mòster, boso lo a bisa e palu grandi akí: “Sali for di tera ku rais ku tur i planta bo mes den laman” e palu lo a tende di boso.

7Kua di boso lo bisa boso kriá ku ta plug tera pafó òf kuida karné pa boso, ora e bini kas for di kunuku: “Bini mesora bin sinta na mesa”? 8Niun hende! Mas lihé e ta bis'é: “Prepará mi kuminda pa mi; faha bo lomba i sirbi mi, te ora mi kaba di kome i bebe. Despues bo tambe por kome i bebe.” 9Akaso e ta yama su kriá danki, pasobra el a hasi loke a mand'é?#17:9 Tin manuskrito ku ta añadí: Mi no ta kere. 10Meskos asina boso tambe mester bisa, ora boso a hasi tur loke a manda boso hasi: “Nos ta kriá inútil! Nos a djis kumpli ku nos deber!” ’

Hesus ta kura dies leproso

11Na kaminda pa Herusalèm, Hesus a pasa den e region entre Samaria i Galilea. 12Ora El a drenta un pueblo, dies leproso a bin kontr'É i a keda pará na un distansia. 13Nan a grita: ‘Hesus, maestro, tene mizerikòrdia ku nos!’ 14Ora Hesus a mira nan, El a bisa: ‘Bai laga e saserdotenan mira boso.’#Levítiko 14:1-32 Segun nan tabata kana bai, nan a kura. 15Un di nan a bira bèk, ora el a mira ku el a kura. E tabata alabá Dios na bos altu, 16a tira su kurpa abou na suela dilanti di Hesus i gradisí Hesus. E hòmber ei tabata un samaritano. 17E ora ei Hesus a bisa: ‘No ta dies a kura? Na unda e nuebe sobránan a keda? 18Niun no por a bini bèk pa alabá Dios ku no ta e strañero akí?’ 19El a bisa e hòmber: ‘Lanta bai numa; bo fe den Mi a salba bo!’

Binida di e reino

(Mateo 24:23-28,37-41)

20E fariseonan a puntra Hesus ki dia reino di Dios lo bini. El a kontestá nan: ‘Reino di Dios no ta bini den un forma ku hende por mira. 21Ni tampoko hende lo no por bisa: “At'é aki!” òf “At'é aya!”, pasobra mira, reino di Dios ta meimei di boso!’

22Hesus a bisa su disipelnan: ‘Lo yega un tempu ku boso tin gana di mira un di e dianan di Yu di hende. Ma boso lo no mir'é. 23Nan lo bisa boso: “Mira at'é aya!” òf “Mira, at'é aki!” No bai ni kore nan tras, 24pasobra manera welek ta kòrta den shelu di un horizonte pa otro, asina lo ta ku Yu di hende riba su dia. 25Ma promé E mester sufri hopi i keda rechasá pa hende di e generashon akí. 26Manera a sosodé den tempu di Noe,#Génesis 6:5-8 asina lo pasa den dianan di Yu di hende. 27Hende a keda kome i bebe; nan a kasa i a tuma otro pa kasá, te dia Noe a drenta arka i e diluvio, ku a kaba ku nan tur, a kuminsá.#Génesis 7:6-24 28Òf ta manera den tempu di Lòt;#Génesis 18:20—19:25 nan a kome i bebe, kumpra i bende, planta i lanta edifisio. 29Ma dia Lòt a sali for di Sódoma, un yobida di kandela i suafel a kaba ku tur. 30Asina lo pasa dia Yu di hende manifestá su mes. 31Esun ku ta sintá riba su dak di kas riba e dia ei, no mester baha bin kohe kosnan ku tin den kas abou. Esun ku ta den kunuku tampoko no mester bira bai bèk pa wak loke a keda atras.#Mateo 24:17-18; Marko 13:15-16 32Kòrda riba kasá di Lòt!#Génesis 19:26 33Esun ku purba preservá#17:33 preservá; otro manuskrito tin: salba su bida, lo pèrd'é i esun ku pèrd'é lo hañ'é di nobo.#Mateo 10:39; 16:25; Marko 8:35; Lukas 9:24; Huan 12:25 34Mi ta bisa boso, riba e anochi ei, si tin dos hòmber drumí riba kama, lo bai ku un i e otro ta keda atras. 35Dos muhé lo mula maishi huntu, lo bai ku un i e otro ta keda atras.’ [36Lo tin dos hòmber den kunuku; lo bai ku esun, i e otro ta keda atras.] 37E ora ei e disipelnan a puntra Hesus: ‘Na unda, Señor?’ El a duna nan pa kontesta: ‘Kaminda tin kadaver, ei warawara ta reuní!’

Currently Selected:

Lukas 17: PBDC13

Highlight

Copy