Lukas 14

Hesus ta kura un hòmber ku dewater

1Un sabat Hesus a bai kome na kas di un lider di fariseo; nan tabata ten'É bon na bista. 2Diripiente un hòmber ku dewater a bin para su dilanti. 3E ora ei Hesus a puntra e ekspertonan di lei i e fariseonan: ‘Ta pèrmití pa kura un hende riba sabat òf nò?’ 4Ma nan a keda ketu. Hesus a tene e hòmber su man, kur'é i lag'é bai. 5E ora ei El a bisa nan: ‘Kua di boso lo no saka su yu hòmber òf su bue mesora fo'i pos, maske e kai aden riba sabat?’#Mateo 12:11 6Nan no por a bisa nada.

Lugá di honor

7Ora Hesus a mira kon e invitadonan tabata buska pa sinta na lugá di honor, El a duna nan un komparashon: 8‘Ora nan kombidá bo na un kasamentu, no bai sinta na e lugá di honor. Podisé esun ku a kombidá bo, tin un otro invitado mas importante ku bo. 9Anto e ora ei lo e bini serka bo i bisa: “Lanta bo duna e hende akí bo lugá.” Yen di bèrgwensa, bo mester bai sinta patras e ora ei. 10Mihó, ora nan kombidá bo, bo bai sinta patras. E anfitrion lo bini serka bo i bisa bo: “Amigu, hala bo bin sinta mas dilanti.” Den bista di esnan sintá na mesa huntu ku bo esei lo ta un honor.#Proverbionan 25:6-7 11Pasobra tur hende ku alsa su mes, lo ta humiliá, ma esun ku humiliá su mes, lo ta alsá!’#Proverbionan 29:23; Mateo 23:12; Lukas 18:14

12Tambe Hesus a bisa esun ku a kombid'É: ‘Ora bo tene un fiesta di komementu mèrdia òf anochi, no kombidá bo amigu, ruman, famia, òf bo bisiñanan ku tin plaka. Pasobra nan na nan turno tambe lo kombidá bo, pa hasi algu bèk pa bo. 13Ora bo tene fiesta, mihó bo kombidá hende pober, mankaron, koho i siegu. 14Lo ta un legria pa bo ku nan no por hasi nada bèk. Pasobra lo bo haña bo rekompensa dia e hustunan lanta fo'i morto.’

Parábola di e fiesta di kasamentu

(Mateo 22:1-10)

15Ora un di esnan ku tabata na mesa a tende kiko Hesus a bisa, el a bis'É: ‘Ki legria ta pa un hende por kome den reino di Dios!’ 16Hesus a bis'é: ‘Un dia un hende a tene un gran komementu, kaminda el a kombidá hopi hende. 17Ora ku e momento a yega pa kuminsá ku e bankete, el a manda su kriá bisa e invitadonan: “Bini numa, tur kos ta kla.” 18Ma tur e invitadonan a kuminsá diskulpá nan mes. Un di: “Mi a kumpra un kunuku i mi tin ku bai wak e urgentemente; por fabor despensá mi.” 19Un otro a bisa: “Mi a kumpra sinku par di bue i mi ta na kaminda pa tèst nan. Por fabor, despensá mi.” 20Un otro a bisa: “Mi a kaba di kasa i p'esei mi no por bini.” 21Ora e kriá a yega kas, e kriá a pone su shon na altura di tur kos. E shon a rabia; el a bisa e kriá: “Hasi lihé! Drenta kayanan i hanchinan di siudat i trese hende pober, mankaron, siegu i koho aki den.”

22Despues di un ratu e kriá a bisa su shon: “Señor, a kumpli ku bo òrdu, ma tòg a sobra lugá!” 23E shon a bis'é: “Subi kaminda grandi, bai den kunuku i insistí pa e hendenan drenta paden, pa mi kas por yena. 24Pasobra mi ta sigurá boso: niun di e hendenan ku mi a invitá promé, lo no purba nada di mi bankete!” ’

Kuantu ta kosta pa ta Hesus su disipel

(Mateo 10:37-38)

25Un multitut grandi di hende tabata kana Hesus su tras. El a bira kara mira nan i bisa: 26‘Esun ku bini serka Mi, mester distansiá su mes di su mama i tata, su kasá i su yunan, su ruman hòmber i ruman muhé; asta di su mes bida. Sino e no por ta mi disipel!#Mateo 10:37 27E mester karga su krus i sigui Mi, sino e no por ta mi disipel.#Mateo 10:38; 16:24; Marko 8:34; Lukas 9:23; Huan 12:24 28Si un di boso ke traha un toren, e n' ta sinta promé pa konta kuantu sèn e ta salié i wak si e por kab'é? 29Pasobra si e pone e fundeshi so, sin kaba e trabou, tur hende ku mir'é ta harié! 30Nan lo bisa: “E hòmber a kuminsá un trabou, sin por a kab'é.” 31Òf si un rei sali bai bringa kontra un otro rei, e n' ta sinta konsultá promé si e ta sufisientemente fuerte ku su dies mil hòmber, pa enfrentá esun ku ta bini riba dje ku binti mil hòmber? 32Si e mira ku no por, e ta manda un representante ora esun aya ta leu ainda, pa informá kua ta e kondishonnan pa sera pas. 33Asin'ei boso kada un mester entregá tur loke boso ta poseé, sino boso no por ta mi disipel.

34Enberdat, salu ta un kos útil. Ma si salu mes pèrdè smak, ta ku kiko ta dun'é stansha atrobe? 35E ora ei e salu no ta sirbi ni pa tira riba tera ni den mèst; mester tir'é afó. Esun ku tin orea, tende!’

Currently Selected:

Lukas 14: PBDC13

Highlight

Copy