Echonan 6
6
Un grupo nobo di shete ayudante
1Tempu e kantidat di kreyente tabata krese, e hudiunan di abla griego#6:1 hudiunan di abla griego: hudiunan di pafó di Palestina, ku tabatin nan mes snoa na Herusalèm kaminda e sirbishi tabata tuma lugá na griego. Biudanan hudiu di pafó di Palestina tabata bini Herusalèm pa keda derá aya ora nan muri. a kuminsá keha riba e hudiunan di abla arameo, pasobra tabata neglishá nan biudanan den e distribushon diario di kuminda. 2E diesdos apòstelnan a yama henter e grupo di kreyente huntu i bisa nan: ‘No ta bon pa nos neglishá predikamentu di palabra di Dios pa nos sirbi kuminda na e hendenan. 3P'esei, rumannan, skohe shete hòmber di bon reputashon for di boso seno, hòmber yená ku Spiritu Santu i sabiduria, i nos lo duna nan e enkargo ei. 4Nos mes lo dediká nos na orashon i predikamentu di palabra di Dios.’
5Henter e grupo a bai di akuerdo ku e proposishon, i nan a skohe Esteban, un hòmber yen di fe i Spiritu Santu, tambe Felipe, Progoro, Nikanor, Timon, Parmenas, i Nikolaos di Antiokia ku a kombertí bira hudiu. 6Nan a presentá nan na e apòstelnan, ku a resa i pone man riba nan.
7Palabra di Dios a sigui plama. E kantidat di kreyente na Herusalèm a sigui krese mas i mas, i un grupo grandi di saserdote a aseptá fe.#Lukas 19:47
II. E BON NOTISIA TA PLAMA RÒNT HUDEA, GALILEA I SAMARIA (6:8—9:31)
Esteban, ún di e shete ayudantenan
Testigunan falsu
8Esteban, yená ku e poder ku el a risibí di Dios,#6:8 yená…Dios; otro manuskrito tin: fe i poder tabata hasi hopi milager i señal tremendo den pueblo. 9Pero algun hende a lanta kontra dje. Nan tabata miembro di e asina yamá ‘snoa di e Libertinonan’,#6:9 Libertinonan: katibunan hudiu ku a haña libertat i nan desendientenan. Nan tabata prosedente di e partinan di e imperio Romano ku tabata papia griego. na kua e hudiunan di Sirene i Alexandria tabata pertenesé. Nan, huntu ku e hudiunan di Silisia i Asia, a kuminsá diskutí ku Esteban. 10Ma nan no tabata por kuné, pasobra e tabata papia ku sabiduria di Spiritu Santu. 11E ora ei nan a paga algun hende pa gaña i bisa: ‘Nos a tend'é papia kontra Moises i blasfemá Dios.’ 12Asina nan a logra instigá pueblo, e ansianonan i e dòktornan di lei. Nan a bin kohe Esteban hib'é dilanti di Konseho Supremo. 13Ei nan a trese testigu falsu ku a deklará: ‘E hòmber akí ta papia sin stòp kontra e lugá santu akí#6:13 papia…aki; otro manuskrito tin: blasfemá e lugá santu akí sin stòp#6:13 e lugá santu akí: otro manuskrito tin: e lugá santu i kontra Lei.#Mateo 26:59-61; Marko 14:55-59 14Pasobra nos a tend'é bisa ku e Hesus di Nazarèt ei lo destruí e lugá akí i kambia e reglanan ku Moises a laga pa nos!’
15Tur e miembronan di Konseho Supremo a fiha nan bista riba Esteban i nan a mira un kara manera di un angel.
Currently Selected:
Echonan 6: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
