2 Makabeonan 12
12
HUDAS TA BRINGA NA FRONTERANAN DI HUDA
E hudiunan ta keda ku komandantenan enemigu
1Despues di a sera e pakto akí Lisias a bai bèk serka rei i e hudiunan a bolbe kuminsá traha kunuku. 2Pero algun komandante lokal Timoteo i Apolonio, e yu di Genaio, i tambe Herónimo i Demofon, ademas Nikanor, komandante di e trupanan ihür di Chipre, no tabata duna e hudiunan or'i porta.
Agreshon kontra e hudiunan di kosta
3E habitantenan di Yope a kometé e siguiente echo inhumano. Nan a kombidá e hudiunan ku tabata biba na Yope pa nan bai ku nan kasá- i yunan bordo di un par di boto ku tabata pará einan, kla pa sali. Aparentemente nan no tabata hasi nada malu, 4pero nan tabata ehekutá un desishon ku henter e poblashon di e siudat a tuma. E hudiunan ku tabata anhelá pas i no tabata deskonfiá nan, a aseptá e invitashon. Ora nan tabata riba laman ganchu nan a benta nan na awa. Tabatin no ménos ku 200 hende na bordo.
5Ora Hudas a tende di e krueldat ku nan a hasi ku su kompatriotanan, el a pone esaki na konosementu di su sòldánan. 6El a roga na Señor, e hues hustu, i ranka sali kontra e burdugunan di su rumannan. Anochi el a sende e haf na kandela, kima tur e barkunan i a mata tur ku a buska nan refugio einan. 7Pasobra e siudat mes tabatin un muraya apart rondó di dje, el a bai ku intenshon di bini bèk i kaba ku henter e poblashon di Yope.
8Pero el a tende ku e habitantenan di Yamnia tambe tabata ker a hasi meskos ku e hudiunan den nan siudat. 9P'esei den anochi Hudas a ataká Yamnia tambe i a sende e haf i armada na kandela. Por a weta e kandela te na Herusalèm, esta na un distansia di mas o ménos 45 kilometer.
Kampaña kontra Timoteo na parti nort
10Despues e hudiunan ker a hasi un kampaña kontra Timoteo. Nan no a kana ni dos kilometer ku un ehérsito árabe ku 5000 sòldá di infanteria i 500 sòldá di kabayeria a ataká nan. 11Despues di un bataya pisá, Hudas ku su ehérsito a gana viktoria grásias na ayudo di Dios. E arabirnan ku Hudas a derotá a rog'é pa e sera pas ku nan. Nan a primintié di dun'é bestia di kria i tambe di yuda e hudiunan na otro manera. 12Komo Hudas tabata di opinion ku den hopi sentido nan por tabata útil p'e, el a konsentí pa sera pas. El a duna nan man i despues e arabirnan a bai nan tèntnan bèk.
13Despues Hudas a ataká un siudat, yamá Kaspin, ku tabatin seritunan di tera i un muraya rondó di dje. E siudat tabatin un poblashon mesklá. 14Konfiando riba nan murayanan fuerte i nan provishon di kuminda nan tabata komportá nan mashá ònbeskòp ku e sòldánan di Hudas, nan tabata chèrchè e sòldánan, blasfemá Dios i papia palabranan grosero. 15Hudas i su sòldánan a invoká e gran Señor di mundu ku sin aparato ni toren di atake a basha e murayanan di Yériko abou den tempu di Yozue.#Yozue 6:1-21 Manera leon nan a baha riba e murayanan tumba nan. 16Nan a logra konkistá e siudat pasobra Dios tabata ke. Nan a drama asina tantu sanger ku e lago chikí di 400 meter hanchu banda di e siudat tabata parse yená ku sanger.
17Djei, despues di a marcha mas o ménos 140 kilometer, nan a yega Haraks serka e hudiunan den teritorio di Tob. 18Pero nan no a haña Timoteo den e region ei, el a bai fo'i djei sin a logra nada, sí el a laga un destakamento basta fuerte na un sierto punto. 19Dositeo i Sosipatro, dos general di Makabeo, a ranka bai einan i a mata mas di 10.000 sòldá ku Timoteo a pone den e fòrti ei.
20E ora ei Makabeo a parti su ehérsito den grupo i a pone un general na kabes di kada un i a ranka sali kontra Timoteo ku tabatin un ehérsito di 120.000 sòldá di infanteria i 2500 di kabayeria. 21Ora Timoteo a tende ku Hudas tabata na kaminda, pa seguridat el a manda hende muhé, mucha i e sobrá ekipahe, siudat Karnion. Despues e tambe a sali pa aya. E tereno hostil, yen di baranka, a hasi ku di ningun manera no por a alkansá ni sitia e lugá ei.
22Na momento ku e promé grupito a aparesé, ora Esun ku ta mira tur kos a manifestá su mes, e enemigu a drenta pániko i hui bai den tur direkshon. Te asta amigunan un tabata heridá otro, asta hinka nan tabata hinka otro ku spada.
23Yen di energia Hudas a kuminsá persiguí e malechornan i bati nan, el a mata mas o ménos 30.000. 24Timoteo mes a kai den man di e sòldánan di Dositeo i Sosipatro, pero ku hopi astusia el a pidi nan pa nan lag'é liber, pasobra e tabatin tata i ruman hòmber di hopi di nan komo rehen, i lo e no tabatin niun tiki kompashon ku nan. 25Porfin, despues di hopi papiamentu, kaminda el a primintí nan di entregá e hudiunan ei sano i salvo bèk, Timoteo a konvensé nan i nan a lag'é liber pa salba bida di nan famianan.
Fin di kampaña na parti nort
26Hudas a ranka sali bai Karnion, kaminda tabatin santuario di diosa Atergateo i a mata kasi 25.000 hende.
27Despues di derota i kaida di e enemigunan akí, Hudas ku su ehérsito a ranka sali kontra e siudat reforsá Efron tambe, ku tabata residensia di Lisias. Un ehérsito di hóben fuerte tabata posishoná dilanti di e muraya, ku nan tabata defendé ku balentia. Den e siudat tabatin un gran kantidat di proyektil i opheto di guera. 28Pero e hudiunan a sklama na Señor, kende ku man fuerte ta plèchè forsa di e enemigu i nan a konkistá e siudat. Nan a mata kasi 25.000 habitante.
29Djei nan a ranka sali bai Skitópolis ku tabata keda 120 kilometer for di Herusalèm. 30Pero e hudiunan bibá aya a sigurá nan ku e habitantenan di Skitópolis tabata ke nan bon i ku den tempu difísil nan a trata nan bon. 31Hudas i su sòldánan a gradisí nan p'esei i a pidi nan pa den futuro tambe keda hasi meskos. Komo ku fiesta di sinkuenta dia#Éksodo 34:22; Levítiko 23:15-21; Deuteronomio 16:9-11 tabata den kurpa, nan a bai Herusalèm bèk.
Kampaña kontra Gorgias na parti zùit
32Despues di e asina yamá fiesta di sinkuenta dia nan a ranka sali kontra Gorgias, gobernador di Idumea. 33Gorgias a sali bai kontra nan ku 3000 sòldá di infanteria i 400 di kabayeria. 34Durante e bataya algun hudiu a muri. 35Un tal Dositeo, un sòldá di kabayeria balente, di grupo di Bakenor, a logra kohe Gorgias na su mantel. El a kuminsá lastr'é ku intenshon di kohe e tèrsio maldishoná ei bibu prezu, pero un sòldá di Traksia a bini riba Dositeo i a kòrta su brasa afó. Di e manera ei Gorgias por a hui bai Maresha.
36Azarías i su sòldánan tabata bringa oranan largu kaba i nan tabata morto kansá. E ora ei Hudas a roga Señor mustra ku t'E ta nan aliado i t'E ta na nan kabes. 37Despues el a dal nan gritu di bataya na nan lenga materno i a kuminsá un kantika di alabansa. Dor di un atake inesperá, el a pone e sòldánan di Gorgias hui.
Sakrifisio di rekonsiliashon pa esnan ku a kai den guera
38Despues di e bataya Hudas a reuní su ehérsito i a bai e siudat Adulam. Komo tabata serka di bira sabat, nan a purifiká nan mes segun kustumber#Numbernan 31:19-20 i a selebrá sabat aya.
39E dia despues sí a bira tempu pa Hudas i su sòldánan bai buska e kadavernan di esnan ku a kai den bataya i huntu ku nan famianan bai dera nan den graf di famia. 40Ei nan a deskubrí amulèt di e diosnan di Yamnia bou di bistí di tur e defuntunan, kosnan ku lei ta prohibí hudiunan#Deuteronomio 7:25-26 di bisti. E ora ei a sali na kla di kon nan a muri. 41Tur a alabá Señor, hues hustu, ku ta saka tur falta skondí trese na klaridat.
42Pero despues nan a tene un sirbishi pa resa na Señor pa E pordoná esnan ku a muri tur nan pikánan. Hudas, e hòmber noble, a hala atenshon di e pueblo pa nan no hasi e sorto di pikánan ei, pasobra ku nan mes wowo nan por a weta e resultado serka esnan ku a muri. 43Despues Hudas a tene un kolèkt bou di su sòldánan i a manda e suma di 2000 moneda di plata Herusalèm, pa aya nan ofresé un sakrifisio pa pordon di pikánan di e defuntunan. Esei tabata un akto bunita i mashá bon, inspirá pa su fe den resurekshon.#2 Makabeonan 7:9-14,23 44Si e no tabata kere ku esnan ku a muri lo resusitá, lo tabata innesesario i inútil pa resa pa nan. 45Ademas Hudas tabata kere, ku tabatin un gran rekompensa ta warda esnan ku a bai sosegá piadosamente. Un pensamentu sano i piadoso di bèrdè! Ta p'esei el a laga ofresé e sakrifisio ei pa e defuntunan pa Dios pordoná nan nan piká.
Currently Selected:
2 Makabeonan 12: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013