1 Timoteo 3
3
Esnan ku por guia iglesia
1E palabranan ku ta sigui ta konfiabel: Si un hende ta anhelá pa bira lider di iglesia, ta un bon tarea e ta deseá. 2P'esei un lider di iglesia mester ta ireprochabel: e mester ta fiel na su kasá#3:2 fiel…kasá: por nifiká tambe ku e ansiano no a divorsiá nunka òf kasa ku mas ku un hende i hiba un bida moderá; e mester ta huisioso, ku bon manera, hospitalario i kapas pa siña otro hende. 3E no mester ta buraché òf buskadó di pleitu, pero un hende amabel i pasífiko, ku no ta stima plaka. 4E mester por manehá su kas bon i kria su yunan pa nan ta obedesidu i mustra rèspèt den tur situashon.#3:4 i mustra…situashon; otro posibel tradukshon: i e mester aktua den un forma ku ta digno di rèspèt 5Pasobra si un hòmber no sa kon manehá su kas di famia, ta kon e por kuida iglesia di Dios? 6Esun ku ke bira lider no mester ta un hende resien kombertí tampoko, pa e no hincha di orguyo i haña e mesun kondena ku diabel.#3:6 i haña…diabel; otro posibel tradukshon: i haña e kondena ku diabel ke dun'é 7Ademas e mester ta un hende respetá serka esnan ku no ta pertenesé na iglesia, pa e no pasa bèrgwensa i kai den trampa di diabel.#Tito 1:6-9
Esnan ku por sirbi komo diákono
8Diákono tambe mester hiba un bida digno di rèspèt i nan no mester ta kuchú di dos banda; nan no mester ta bisiá na biña, ni hende ku ta kore tras di ganashi deshonesto. 9Nan mester atené nan na e bèrdat revelá ku nos a kere aden, ku un konsenshi limpi. 10Ademas nan mester pasa un periodo di prueba promé#3:10 Ademas nan mester…promé: otro posibel tradukshon: Meskos ku esnan ku ke bira lider di iglesia, nan mester pasa un periodo di prueba promé i si nan proba di ta ireprochabel, laga nan sirbi komo diákono. 11Meskos tambe e hende muhénan diákono#3:11 e hende muhénan diákono; otro posibel tradukshon: e esposanan di e diákononan mester hiba un bida digno di rèspèt, no di redashi, pero moderá i fiel den tur kos.
12Diákono mester ta fiel na nan kasá#3:12 fiel na nan kasá: e por nifiká tambe ku e diákono no a divorsiá nunka òf kasa ku mas ku un hende i nan mester por manehá nan mes kas i nan yunan bon. 13Pasobra esnan ku ta hasi nan tarea di sirbishi bon ta gana un bon nòmber pa nan mes i tin derechi di papia libremente di fe den Kristu-Hesus.
E bèrdat revelá ku nos a kere aden
14Mi ta skibi e instrukshonnan akí pa bo, ku speransa di mira bo pronto. 15Pero si mi tarda, e karta akí ta pa bo sa kon hende mester komportá nan komo miembro di e famia di Dios, esta den iglesia di e Dios bibu, e iglesia ku ta pilá i sosten di bèrdat. 16No tin duda ku e bèrdat revelá di nos fe ta impreshonante:
Kristu-Hesus a bini den mundu, débil manera hende,
deklará den shelu di ta vensedor, dor di Spiritu Santu,
mirá pa angel,
i proklamá na tur nashon,
aseptá ku fe pa hende rònt mundu
i tumá den gloria di shelu.
Currently Selected:
1 Timoteo 3: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
