1 Timoteo 2
2
Instrukshon tokante orashon
1Promé ku tur kos mi ta hasi un apelashon serio na e kreyentenan pa ofresé súplika, orashon, interseshon i gradisimentu na Dios pa tur hende. 2Mester resa pa esnan ku tin outoridat supremo i pa esnan prominente, ya#2:2 ya; otro posibel tradukshon: ku nos por biba un bida ketu i trankil, yen di rèspèt pa Dios i rèspèt pa hende. 3Orashon asina ta bon i aseptabel den bista di Dios, nos Salbador, 4ku ke pa tur hende haña salbashon i yega na konosementu di e bèrdat:
5Ta ún Dios so tin
i ún Mediador
entre Dios i nos,
esta e hende, Kristu-Hesus;
6El a entregá su bida pa reskatá humanidat.
Asina su morto a testiguá,
na su debido tempu,
ku Dios ke salba hende.#Mateo 20:28; Marko 10:45; Galatanan 1:4; Tito 2:14
7I El a nombra mi komo mensahero i apòstel pa anunsiá esei i siña esnan no hudiu tokante fe i bèrdat! No ta gaña mi ta gaña, ta bèrdat mi ta papia.#2 Timoteo 1:11
8Mi ke pa tur kaminda ku ta hasi orashon hende hòmber, konsagrá na Dios, alsa nan man den orashon, sin ku nan paden ta karga rabia òf ta kunsumí. 9Meskos tambe hende muhé mester bisti paña desente, simpel i apropiá, sin kuenta di flèktu òf peña kabei ku adorno di oro, bisti pèrla òf paña karu.#1 Pedro 3:3 10Nan adorno mester ta nan bon obranan, digno di hende muhé ku ke mustra bon kla ku nan ta dediká na Dios.
11Hende muhé mester keda ketu ora ta siña nan; nan mester ta kompletamente sumiso. 12Mi no ta pèrmití hende muhé duna siñansa ni tin outoridat riba hende hòmber; nan mester keda ketu. 13Pasobra Dios a krea Adam#Génesis 2:7 promé i despues Eva.#Génesis 2:21-22 14Anto no ta Adam ta esun engañá; ta e muhé ta keda engañá i t'é a desobedesé palabra di Dios.#Génesis 3:1-6 15Pero hende muhé lo keda salbá pa medio di hañamentu di yu, si nan sigui ku sano huisio den fe, amor i un bida santu.
Currently Selected:
1 Timoteo 2: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
