Nyanra Njekawkulege 1

Jésu unn ndu’n le kule se Ndil-Kêmnda

1Théophile, tàge ke m’ɔse nja dè nan’t kêm magtub’t le’m ke kété nga, è tàge ke ɔje dè nyange malang ke Jésu ra se nyange malang ke ndó dooge mari loo kunn gir kule’t le’n, 2sár tee’n kêm ndɔ ke Nube unn’n aw’n se’n danrán. Jésu unn ndu’n se go tɔgmong le Ndil-Kêmnda ade njékawkulege ke è tɔr de unde de se ninn de. 3Go nyankêmkon ke ra’n se go kwei le’n, Jésu tɔje ra’n kumgajer ade njékawkulege le’n an-in nin nja bule. E nain se de ndɔ’n kɔr-sɔ, è ɔr ser nyange ke ɔje dè Konɓee le Nube ade de. 4Ndɔ karé bè, Jésu ndi se de nan’t tà nyankuse’t, è unn ndu’n ade de le kade d’inye ɓee-bò ke Jérusalem d’aw rang lé. E ede de ede nè:

– I ndii Jérusalem nè kuwe i nginei ndukunn le Bɔ’m ke ndɔ ke m’ede sei tà’n kété nga. 5Jean ule dooge manné njonm kété, nain ndɔ ngain lé kade d’ɔr sei d’unde sei se ninn si gai se Ndil-Kêmnda ɓai.

Kin kaw danran le Jésu-Krist

6E á njékawkulege ɔsi nja nan ra Jésu’t deji nin edi nè:

– Kuwe-ɓee, ké ɗarinè kuwe è ndɔ ke a i tel’n se konɓee le ngann Israelge kade gugu ta wa?

7Jésu ile de dè’t ede nè:

– E tà le si sei le ger ndɔ’n se kàde’n ke Bɔ’m ɔje se go tɔgmong le’n è kuwe nga lé. 8Nè sei a kingei tɔgmong le Ndil-Kêmnda ɓaa, sei a teli k’eei njékɔrgo tàge le’m kêm ɓee-bò ke Jérusalem a, se ɓeekon ke Judée bere mbak a, se ɓeekon ke Samarie a, sár kade ɔri son nang nè njêt a tɔ.

9Loo ke è ede de tàge nè nga bè ɓá ɓaa, è in tàkum de’t aw danrán. Loo ke dé nda d’an goo’n sikm ɓaa, ke loon’t nè kuwe, bum utu dè’n lêt ade d’an’n lé sár. 10Loo ke Jésu in à aw ke danrán nga, njékawkulege an-in goo’n sikm. An! dingemge joo undei loo teei ndai se kubuge ke nda káng-káng ra de’t. Ei deji njékawkulege nga edi nè:

11– Sei dooge ke ɓeekon ke Galilée, ké bain á i ndai an-in loo ke danrán sikm bè wa? Jésu nè ke d’unn’n dann si’t d’aw se’n danrán nga, ndɔ ke rang à tel ree kade an-in titeke an-in nin loo kin kaw’n danrán’t nè nga bè tɔ.

D’ɔr Matthias ke njè taa gute Judas

12Njékawkulege in-in dè mbal ke kage-olivierge ndai tutu. E ɔsi wan teli awi kêm ɓee-bò ke Jérusalem. Mbal nè nga tò ngɔr ase kurloo karé se ɓee-bò ke Jérusalem. Doo à njiye kaw tutu se ndɔ taa kebe karè. 13Loo ke dé tee kêm ɓee-bò ke Jérusalem ɓá ɓaa, ke loon’t nè kuwe, d’al d’aw kêm kei ke dè made’t ke è loo kinge nan le de se ndɔ de-ndɔ de. Ri de dé njékawkulege nga tò nè: Simon se Jean, Jacques se André, Philippe se Thomas, Barthélemy se Matthieu, Jacques ngonn Alphée se Simon ke njèkile ra’n kɔke tede ɓee le’n, se Jude ngonn Jacques a tɔ. 14Dé malang d’um kêm de nan’t bɔk, d’aw kum de ke kété-kété dè kɔje tà se Nube’t. Dinyege ke nange tite Marie kon Jésu a, se ngakon Jésuge ndii se de nan’t tutu a tɔ.

15Ndɔ karé bè, njétaakêm-Kristge kebi nan asi aru se kɔr-joo. Pierre ɔse nang in dɔ dann de’t ede de ede nè:

16– Ngakonmge se kon nannemge, tà ke Ndil-Kêmnda tam kété kêm Magtub ke tò se ninn’n nga, aw loon’t deĵ. Ndil-Kêmnda ule tà tà David’t ade tam ɔje’n dè Judas kété. Judas nè ɔse wan tel è njèkɔr non njé kuwe Jésuge. 17Judas nga kété dé tute’n dann jéi’t kuwe. Kule ke jè ndi j’ade rai nga géa, d’ade’n gaje’n ke ɔje dè’n se jéi nan’t tɔ. 18Dingem nè nga ndogo loo ndɔr se nyanra pás-pàs le’n ke d’uge’n dè ji’n. Nè mbɔr go’t gugu ɓaa, ɔte aw ur kɔbe’n nang tête ngadann’n ade ngann-tin’n malang kuje nan hakl. 19Tà nè nga oso mbi dooge’t malang ke ndii kêm ɓee-bò ke Jérusalem. Gir’n ke nè á dé ɓar loo-ndɔr nè nga se tà koje de ke le de d’ede nè: «Hakeldama», tel se tà koje jéi ɓaa «è dè nang mese». 20Dé ndang tà kêm magtub ke dé ɓar’n Magtub Pakɔsege d’ede nè:

«Maje kade ɓee le’n tel è ndube ndái-ndái,

maje kade doo karé bè géa ra ɓee tutu lé,

taɓai maje kade doo karé ke rang taa gute’n loo kule’t le’n a tɔ.»

21Pierre ede njékawkule madennge ede nè:

–Dooge ke ei njémade-loo-kawge le jéi, loo ke ndɔ ke Kuwe-ɓee Jésu ee’n njèkɔr non jéi ɓai, ei dann jéi’t laa. Maje kade j’ɔri doo karé j’adi taa gute Judas le kade ile mber kunde loo tee le Kuwe-ɓee Jésu dann njé ke koo’t se jéi nan’t. 22Doo nè nga, gar-gar maje kade è doo ke ndɔ ke è se jéi nan’t, unn gir ndɔ ke Jean ule’n Jésu manné njonm sár tee’n ndɔ ke Nube unn’n dann jéi’t seen aw’n se’n danrán.

23Njékawkulege ɓari dooge joo undei de non de’t, è ke karé ri’n nè Joseph ke dé ɓar’n Barsabbas ke d’ile ri tɔy’n Justus. E ke karé ri’n nè Matthias a tɔ. 24Taɓai dé malang d’ɔje tà se Nube d’ede nè:

– Hei! Kuwe-ɓee, i ger ngarankêm dooge malang, ule jii njung dè doo karé ke i kuwe ɔr’n unde’n se ninn’n dann dooge ke joo nè ade jè. 25Doo ke a ɔr’n nga, à è njè taa gute Judas loo kaw kule’t ke inye ɔte aw loo le’n ke ɔje dè’n è kuwe.

26Dé tur jala dè’t le kan ké nan Kuwe-ɓee à ɔr’n dann dooge ke joo nè nga wa? Nè Matthias á jala ɔse’n ade d’ule’n dann njékawkulege ke nain-in dɔg-gidé-karé.

Currently Selected:

Nyanra Njekawkulege 1: GUL04

Highlight

Copy