Tononkira dia Tononkira 5
5
Mpampakatra
1Efa tafiditra ny tanimboliko aho, ry anabaviko voafofo,
efa nioty ny mirako aman-java-manitra aho;
efa nihinana ny toho-tantely aman-tanteliko aho...!
efa nisotro ny divay aman-drononoko aho...!
Mihinàna, ry sakaiza, misotroa, mimamoa, ianareo olon-tiako!
TONONKALO FAHEFATRA
Ny Ampakarina
2Matory aho, nefa mahatsiaro ny foko...
Injay ny feon’ny malalako! Mandondòna izy:
- Vohay aho, ranabavy, ry sakaizako,
ry voromahailalako, ry ahy tsy misy pentina;
fa vonton’ny ando ny lohako,
kotsan’ny andon’ny alina ny voloko voalantolanto#5,2-8 Famangian’ny mpampakatra ny ampakarina. Tsy mamoha ny varavarana faingana ny ampakarina, ka lasa ny mpampakatra; enjehiny sy tadiaviny. Angatahiny hiara-kitady aminy ny zanaka vavin’i Jerosalema ary lazainy amin’izy ireo ny hatsarany (9-16)..
3Efa niala akanjo aho, ka hataoko ahoana no fiakanjo indray?
Efa nioza tongotra aho, ka hataoko ahoana no fandoto azy indray.
4Ny malalako mampidi-tanana amin’ny loaky ny hidim-baravarana,
ka nangoraka azy ny foko.
5Dia nitsangana aho namoha ny malalako,
ary nitete mira ny tanako,
ny mira tsara indrindra avy amin’ny rantsan-tanako,
nihanaka teo amin’ny famohan-karetsaka.
6Namoha trano ny malalako aho;
kanjo nanjavona ny malalako; nandositra izy.
Tsy nahatsiaro tena aho raha niteny tamiko izy.
Nitady azy aho, nefa tsy nahita;
niantso azy, nefa tsy novaliany.
7Nifanehatra tamiko ny mpiambina,
dia ireo izay nisafo ny tanàna alina;
ka nokapohiny nataony mangana aho;
nendahan’ireo mpiambina ny manda ny lambako.
8Miangavy anareo aho, ry zanaka vavin’i Jerosalema,
raha mahita ny malalako ianareo,
ahoana no holazainareo aminy...?
- Mararim-pitia aho. -
Antoko-mpihira
9Inona no ihoaran’ny malalanao noho ny malala hafa,
ry tsara tarehy indrindra amin’ny vehivavy?
Inona no ihoaran’ny malalanao, noho ny malala hafa,
no dia miangavy anay toy izao ianao?
Ampakarina
10Ny malalako dia mandina sy menamena,
notsongaina tamin’ny iray alina.
11Volamena madio ny lohany;
malefaka hoatra ny sampam-palafa ny volony milantolanto,
sady mangilohilo toy ny goaika.
12Ny masony tahaka ny voromahailala amoron-tsakeli-drano,
mandro amin’ny ronono,
mipetraka amin’ny morona,
13Ny takolany tahaka ny kisahasahan-kazo mitete dity manitra,
sy toritory fambolena hazo manitra:
lisy ny molony,
izay mitete mira faran’izay madio.
14Ny tanany dia anja-bolamena,
voaisy vatosoa avy any Tarsisa:
ny tratrany taozavatra ivoara kanto indrindra,
voaisy safira betsaka.
15Ny ranjony andry vatosanga,
miorina amin’ny faladia volamena madio.
Ny tarehiny tahaka an’i Libàna,
bikana toy ny hazo sedera.
16Mamy dia mamy ny vavany,
ary mahatehotia avokoa ny tenany.
Toy izany ny malalako, toy izany ny olon-tiako,
ry zanaka vavin’i Jerosalema.
Currently Selected:
Tononkira dia Tononkira 5: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.
