Kaŋ mballa ge ne waɗe kaŋ mballa ma Fare pala hageya
Fare pala hageya
Maktub Kaŋ mballa ge ne waɗe kaŋ mballa ma a maktub ge ne jan fare ge laar wanna ge vya dore ma ne vya kale buwal zi ne. Naa gḛ a ele ta go maktub hir ge go mbe no na ne maktub ge Dok ne ma buwal zi da ne da pe de. Swaga isi na go, mo ɓol dḭl ge Dok ne ne na zi to, amma naa a̰me ma ɓo go na fare sḭ ne, ndwara go, a laar wanna ge Dok laar ne wa̰ na ɓase ma. Ge may ma, a jan go na fare janna ge naa ge nama laar ne wan ta ma ne ne.
Maktub Kaŋ mballa ge ne waɗe kaŋ mballa ma 1:1 ŋgay go na Salomon njaŋge na ne, ko a njaŋge na Salomon pal. Amma swaga isi na go, naa gḛ a jan go, a njaŋge na del ma gḛ Salomon go̰r go.
Maktub mbe ŋgay nee kaŋ mballa ge vya dore ma ne vya kale ge nama laar ne wa̰ ta, a mbal na ndwara dore ta. Vya dore mbe ma ne vya kale mbe ɓyare ta pe, a ɓol ta, a ka gwan ya̰me viya̰, ne go̰r go, a ka gwan ɓyare ta pe. Nama kaŋ mballa mbe ma zi, naa ge ɗogle ma wat ya zi me: vya dore kondore ma, ne vya gwale ná ma ne na ná vya ma, ne vya kale koŋkale ma. Naa mbe ma no pet a day ge tele nama be ge nama laar wan ta to.
Swaga ndil Maktub Kaŋ mballa ge ne waɗe kaŋ mballa ma ne, nee da ne pool ge kwa laar wanna ge fareba, na ge ne mbo ne Dok ta ya na zi. Dimma ne Bulus ne jan na ne Efe 5:25 zi go, laar wanna e ndu ɗiŋ hon na sḛ ne na kon pe. No a laar wanna ge Dok ne ne na naa ma pe ne.
Currently Selected:
Kaŋ mballa ge ne waɗe kaŋ mballa ma Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.