Kaŋ mballa ge ne waɗe kaŋ mballa ma 1
1
1Kaŋ mballa ge ne waɗe kaŋ mballa ma ge Salomon ne.
Fare sigɗiya naa ge nama laar ne wa̰ ta ma buwal zi
Vya kale
2So̰me mbi wak,
so̰me mbi wak ɗaŋ!
Mo laar wanna tuli gḛ waɗe oyo̰r jiya̰l.
3Mo num hur tuli ge be to,
mo dḭl dasare naa ta dimma ne num huri go.
Da ne pe, vya kale ma laar wa̰ mo no.
4Wa̰ mbi mo pe go, sya nee!
Gan, mbo ne mbi mo zok zi!
Ke nee ta sḛ tuli,
nee ke laar saal dagre ne ta mo zi,
nee cya̰me ta digi dimma ne oyo̰r jiya̰l ne cya̰me naa go.
Naa laar wa̰ mo da ne na viya̰ go.
5Ursalima vya kale ma,
mbi pisil amma mbi kale,
dimma ne Kedar ma gur go,
ko dimma ne Salomon ba̰r zok pul go.
6Ke me ajab ne mbi ne ká pisil pe to,
a gyala piibi mbi ne.
Mbi ná vya ma laar hó mbi ta,
a é mbi koy oyo̰r no,
amma mbi oyo̰r sḛ, mbi be koy na to.
7Mo ge mbi laar ne wa̰ mo, jya̰ mbi gale!
Mo mbo koy mo kavaar ma ma̰ da ɗaa?
Mo mbo ɗigli tene gyala pala ma̰ da ɗaa?
Na kaage mbi gá gondoŋgeya dimma ne gwale ge pala suli go,
mo kaam ma kavaar ma pe go to.
Vya dore
8Kale ma gan, kadɗa mo kwa to,
dó tene gii ma koo pul go,
mbo koy mo gii vya ma ge
naa ge koy gii ma gur ma ziyar go.
9Mbi kondore,
mo dimma ne tisi ge ne zwal Faraon pus pore ma go.
10Mo gasa ma siŋli ne mo kaŋ togor wak ma buwal zi ya,
Mo ka̰l wanna ndagat ne mo kaŋ ka̰l zi ma.
11I mbo ke mo kaŋ togor wak ge dinar ma
ne pataga ge fool kaal ma.
Vya kale
12Swaga ge mbi gan ne kat na swaga zam kaŋ go,
mbi idir Nar huri dasare swaga ma go.
13Mbi ndu ge laar wanna a dimma ne
galam ge dukan mir ne go ne mbi pe,
dwam mbi ko̰o̰l zi.#1:13 Dwam mbi ko̰o̰l zi: Ne wak ibriniya zi go, «Dwam mbi pam ma buwal zi.»
14Mbi ndu ge laar wanna a dimma
ne hinne wak ɓoyya go ne mbi pe,
ge gaaso oyo̰r ge En-Gedi go zi go.
Vya dore
15Mbi kondore, mo kale!
Mo kale ge be to!
Mo ndwara sarmam dimma ne maale go.
Vya kale
16Mbi ndu ge laar wanna, mo dore!
Mo siŋli dó fare!
Nee saŋgal sobre pe.
17Uwara Sedre ma nee uwara zok pala ne,
uwara Sipres ma nee zok kal ne me.
Currently Selected:
Kaŋ mballa ge ne waɗe kaŋ mballa ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
