Kaŋ mballa ge ne waɗe kaŋ mballa ma 6
6
Vya kale ma
1Kale ma gan, mo ndu ge laar wanna mbo ya da ɗaa?
Saŋge ndwara ya le da ɗaa?
Ya̰ i ɓyare na dagre ne mo.
Vya kale
2Mbi ndu ge laar wanna mbo ya na gaaso zi ya,
swaga ge a ne ɗḭ sugur ge hur tuli ma ne go zi ya,
ndwara mbo zam zám na gaaso zi,
ndwara mbo yel na sugur wak ɓoyya ma.
3Mbi mbi ndu ge laar wanna ne ne,
mbi ndu ge laar wanna mbi ne ne me,
na ge ne ɓol na zám ne sugur wak ɓoyya ma zi.
Dir ge vya kale mbe ne
Vya dore
4Mbi kondore, mo kale!
Mo kale dimma ne suwal Tirsa go,
kale dimma ne Ursalima go.
Mo hon naa vo dimma ne asagar ma ne zut pore go.
5Hé mo ndwara ne mbi pal uzi,
mo ndwara hon mbi vo.
Mo pala susu dimma ne vog ge ɓiya̰#6:5 Ɓiya̰ ge ne Galaad go ma hir pisil, ago vya kale mbe na pala susu pisil twalag dimma ne ɓiya̰ mbe ma go kanna ya na ka̰l pala se. ma ne
ne kan koo ne njal ge Galaad ne digi ya se go.
6Mo kiya̰r ma dimma ne vog ge tame ma ne
ge a ne ndé ne swaga sonna se ya digi go.
Ge daage da ne na kon ge bumurma,
ge ne woɗege be vya to to bat.
7Ne mo ba̰r lar pala zi ya,
mo gasa ma káál dimma ne uwara grenad ziyar le ɗu go.
8Gan gwale ge sanna ma da ne pool kat wara myanaŋgal,
ne gwale ge wanna digi ma wara tiimal,
ne vya kale ma baŋneya bindik,
9mbi maale, mbi ndu ge ɗeŋger,
a na sḛ ne ɗu kikit ne mbi pe.
A na sḛ ne ɗu kikit na ná tok go,
ka kaŋ ge hormo ne na ná ge tolla pe.
Vya kale ma ka kwa na, a ka jan go, na da ne tuli,
gan gwale ma, ne na gwale ge wanna digi ma ka uware na.
10A wuɗi zen ya ne dimma ne swaga ɓaya go,
siŋli dimma ne saba go,
kwaya̰l harcal dimma ne gyala go,
hon naa vo dimma ne asagar ma ne zut pore go ne ɗaa?
11Mbi mbo mbi gaaso ge uwara ma ne zi ya,
ndwara ndil kaŋ ge ne ɗufi ne baal pul se ma,
ndwara ndil oyo̰r wak ge ne mbal ma,
ko uwara grenad ma wak ɗage ya ɓoyya ko de.
12Mbi be wan pe to,
mbi mbo dol tene pus pore ge naa ge pool ma ne koo zi.
Currently Selected:
Kaŋ mballa ge ne waɗe kaŋ mballa ma 6: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
