Markus 4

Fare sḭ ge bage zareya ne

(Mat 13:1-9, Luk 8:4-8)

1Jeso gwan ɗage hate naa maŋgaɗam wak go. Naa ɓase a kote ya na ta, ne nama gḛ pe ndé mbo kat fak go maŋgaɗam pul go. Ɓase ma gá mḛya mam wak go. 2Ka hate nama kaŋ ma gḛ ne sḭ, ka jan nama hateya ge na ne zi go: 3«Za̰ me: Ndu a̰me zú mbo zare kaŋ. 4Swaga zareya go, kaŋ hir a̰me ma kan viya̰ go, njoole ma mbo ya, a cot nama uzi. 5A̰me ma kan her pal, swaga ge suwar ne go gḛ to go. A pyar ya digi avun cap, ne bama ne ɓo suwar bama pe go gḛ to pe. 6Swaga ge gyala ne ndwa ya digi, til nama uzi, a fya̰ ne bama too ma ne ka̰ se to pe. 7A̰me ma kan kore ma buwal zi, kore ma don digi, a kage nama se, a tol to. 8A̰me ma kan suwar ge kwaɗa go, a don digi, a kan vya, a tol, a̰me ma tol hir kis, ge may ma tol hir wara myanaŋgal, ge may ma tapolɗu me.» 9Jan nama go: «Ndu ge ne togor ge za̰ya, na za̰.»

Kyaɗa Jeso ba ka jan fare ne sḭ ɗaa

(Mat 13:10-17, Luk 8:9-10)

10Swaga ge ne gá hini, poseya ne naa ge a ne kat ver na se ma, ɓanna ne naa ge wol para azi ma, a ɗage ele na fare fare sḭ ma pal. 11Jan nama go: «Aŋ ɗe, a ho̰ aŋ go aŋ kwa fare ɗimil ge muluk ge Dok ne, amma ne naa ge ne zum ma pe, a ke nama fare sḭ, 12ne da pe, nama ndi, amma nama kwa to, nama za̰, amma nama wa̰ pe to, ne da pe na kaage nama ho̰ fareba ɗo, nama ɓo poreya to#Isa 6:9-10..»

Fare sḭ ge bage zareya ne pe wanna

(Mat 13:18-23, Luk 8:11-15)

13Jeso gwan jan nama go: «Aŋ wan fare sḭ mbe no pe to’a? Aŋ ke ma̰ gyana aŋ ba wan ge may ma pe ɗaa? 14Bage zareya zare fare ge Dok ne. 15Kaŋ hir ge ne ká̰ viya̰ go ma, a nama ge a ne zá̰ fare, Amma swaga za̰ya go gale Saytan mbo ya pál fare mbe ne nama zi uzi. 16Nama ge a ne ka̰ her pal ma, a naa ge a ne za̰ fare, a ame na ne laar saal, 17amma nama too to. A wan ta swak baŋ. Swaga ge wak nonna ma, ne yál kerra ma ne ɗage digi ne fare ge Dok ne pe, a kan bama tok digi avun cap. 18Nama ge ne ka̰ kore ma buwal zi ma, a naa ge a ne za̰ fare, 19amma iigiya ge dunya ne ma, ne ene ge kaŋ kwaɗa ne ma, ne ene ge kaŋ ge ɗogle ma ne ma wat nama zi, a ɓage fare mbe, a ya̰ na viya̰ ge ke temel nama zi to. 20Nama ge a ne ká̰ suwar ge kwaɗa go ma, a naa ge a ne za̰ fare, a ame na, ke temel nama zi: Ge ɗu tol tapolɗu, ge may wara myanaŋgal, ge may kis me.»

Fare sḭ ge ɗuli ne

(Mat 5:15, Luk 8:16-18)

21Jeso gwan jan nama go: «Naa gene ɗuli ya ndwara kubi na puwa̰l ga̰l zi, ko ndwara e na saŋgal pe zi ɗaa? A te e na ɗuli kal pal to’a? 22Ago kaŋ ge woyya ma pet a mbo dyan nama pe zum, kaŋ ge ɗimil zi ma pet a mbo gá kwaya̰l go. 23Bage ge ne togor ge za̰ya, na za̰!»

24Gwan jan nama go: «Ke me haŋgal ne fare ge aŋ ne za̰. Ne puwa̰l ŋgayya ge aŋ ne ŋgay hon naa, a mbo ŋgay hon aŋ ne na go no me, a mbo gwan hon aŋ pal ta uwale. 25Ago ndu ge ne kaŋ, a mbo gwan hon na pal ta, amma ndu ge be kaŋ, ko kaŋ ge na ne, a mbo gwan ame na ne na tok go uzi.»

Fare sḭ ge kaŋ donna ne

26Jeso gwan Jan go: «Muluk ge Dok ne a dimma ne ndu ne zare kaŋ hir suwar zi go. 27Dam ma mwaɗak, ɗaal fi na dam, ka ɗage digi cya̰wak, kaŋ hir ka pyarra, ka donna, wan na pe to. 28Suwar e pe don zám gale, ba ɗage tol pala, ne go̰r go ba gá zon ndwara. 29Swaga ge swara ne zon, naa abe ŋgwaɗaŋ digi, no a siyal mbya ne#Juw 4:13..»

Fare sḭ ge mutarde ndwara ne

(Mat 13:31-32,34, Luk 13:18-19)

30Jeso gwan jan go: «Muluk ge Dok ne di da ne da go ɗaa? Nee ke na sḭ ma̰ da ne da ɗaa? 31A dimma ne mutarde ndwara go. Swaga ge a ne zare na suwar zi go, ago a na sḛ waɗe kaŋ hir ge ne suwar pal ma ne jyale ne pet. 32Swaga ge a ne zare na, don, hat ga̰l waɗe kaŋ ge ne gaaso zi ge may ma pet, na tok ma pate, njoole ma ka mbo ya e vum na digi.»

33Ka jan nama fare da ne fare sḭ hir ge go mbe ma no, pool za̰ya ge nama ne pal#Mat 13:34-35. . 34Be ka jan nama fare be ge ke nama fare sḭ to to, amma swaga ge a ne na naa ge ame hateya ma ne gá hini ka wan nama na pe mwaɗak.

Jeso mḛre saam labreya

(Mat 8:18,23-27, Luk 8:22-25)

35Dam mbe go, na gasamal, Jeso jan nama go: «Há me nee mam le may ya.» 36A ya̰ ɓase ma, a ne nama ndé fak go, fak ge ɗogle ma ka me. 37Saam ɗage labreya, sḭḭl ɗage ndar mam fak go, fak ka ɓyare wiya. 38Na sḛ ne fak pe hṵsi ya, ka fi dam kaŋ ɓyar pala go. A kore na digi, a jan na go: «Bage hateya, nee ne sú ɗe, ke mo yál to’a?» 39Swaga ge ne kore digi, mḛre saam, jan maŋgaɗam go: «Mḛ́! Iyá se!» Saam mḛ́, swaga iyal selel. 40Jan nama go: «Aŋ te sya vo go gyana ɗaa? Aŋ gale be hon fareba to’a?» 41Vo ge ɓaŋlaŋ wan nama, a ka jan ta go: «Na sḛ wuɗi ne ɗo, saam ma ne maŋgaɗam ba ka za̰ na wak ɗaa#Kmb 65:8, 89:10, 107:23-32.?»

Currently Selected:

Markus 4: FGN2013

Highlight

Copy