Markus 3

Jeso zon ndu dam ɗigliya go

(Mat 12:9-14, Luk 6:6-11)

1Jeso gwan wat Sinagog zi. Ndu a̰me ge tok looɗol ne go. 2A ka ndil na ndwara kwa go, na ma̰ zon na dam ɗigliya go de, go no, bama ba e fare na pal. 3Jan ndu ge tok looɗol mbe go: «Ɗage mḛya digi naa buwal zi!» 4Jan nama go: «Dam ɗigliya go, naa mbya ke kaŋ ge kwaɗa, ko ge sone ɗaa? Mbya ge a má ndu, ko a hun ndu ɗaa?» Amma a zane baŋ. 5Jeso ka kyare na ndwara ndil nama ne pore, na laar hot nama pal ne nama dulwak togreya pe, jan ndu mbe go: «Mwaɗe mo tok se!» Ndu mbe mwaɗe na tok se, na tok gwan na byalam go. 6Swaga ge Farisi ma ne wá ya zum, a ne naa ge Herodus ne ma kote avun cap ndwara ke viya̰ ge bama ba wan Jeso hunna.

Naa ɓase a mbo ya Jeso ta

(Mat 4:23-25, 12:15-16, Luk 6:17-19)

7Jeso ma ne na naa ge ame hateya ma mbo maŋgaɗam wak se ya. Naa gḛ a kare na pe ne suwal Galile ya, ne Yahudiya ya, 8ne Ursalima ya, ne Idume ya, ne maŋgaɗam Urdun le may ya, ne suwal ge ne Tir ma ne Sidon ziyar go ma ya. Naa ɓase gḛ a kare na pe ya, ne da pe a za̰ na kaŋ ge ne ke ma. 9Jeso jan na naa ge ame hateya ma go, nama e fak jejew ne na pe, ne da pe na kaage ɓase ma ró na nama koo se to. 10Ago zó̰ naa gḛ ge be to, naa ge moy ge may ma ka dol ta ya na pal, ne da pe bama ba tat na. 11Swaga ge o̰yom ge seŋgre ma ne kwa na, a ka dol ta na ndwara se, a ka oyya go: «Mo ɗe, mo Dok vya ne!» 12Ka mḛre nama, na kaage nama fú na pe zum to.

Talla ge naa ge wol para azi ma ne

(Mat 10:1-4, Luk 6:12-16, Tkm 1:13)

13Ndé njal pala digi, tol naa ge na ne ɓyare nama, a mbo ya na ta. 14Tal naa wol para azi, hon nama dḭl naa ge temeya ma, ne da pe nama ka poseya ne na, na ba teme nama mbo oy fare, 15ne pool ge yan o̰yom ge seŋgre ma me.

16Tal naa wol para azi: Siman, na ge ne sya na dḭl Bitrus, 17ne Yakub ge Zebede vya ma ne Yohanna ge na ná vya, syal nama dḭl Bwanerges, ndwara go: «Dok ba̰yya vya ma,» 18ne Andrawus, ne Filibus, ne Bartalamawus, ne Matta, ne Toma, ne Yakub ge Alfa vya, ne Tadawus, ne Siman ge Zelot, 19ne Yuda Iskariyot, na ge ne ɓya̰ na naa tok go.

Jeso ná vya ma ɓyare na pe

20Jeso mbo yadiŋ ya, ɓase ma gwan kote ya na ta, kat ge be ge a zam kaŋzam to. 21Swaga ge na sele ma ne za̰ fare mbe, a mbo ya ndwara wan na. A ka jan go: «Gwan kwa fare to.»

Janna ge go Jeso da ne Beelzebul

(Mat 12:24-29, Luk 11:15-22)

22Naa ge njaŋgeya ge a ne mbo ne Ursalima ya ma ka jan go: «Da ne Beelzebul ne na zi! Da ne pool ge ga̰l ge o̰yom ge seŋgre ma ne yan o̰yom ge seŋgre ma no.» 23Jeso tol nama, jan nama fare ne sḭ go: «Saytan da ne pool yan saytan ɗaa? 24Kadɗa muluk varseya, muluk mbe ne pool ge mḛya to. 25Kadɗa yàl varseya, yàl mbe ne pool ge mḛya to. 26Kadɗa Saytan ke ho̰l da ne tene, varse se varse, ne pool ge mḛya to, ago na pe á á. 27Ndu a̰me ne pool ge wat ndu ge pool yadiŋ ba abe na kaŋ ma be ge vwal na se vwal gale ɓya to to. Vwal na vwal ba ɗage abe na kaŋ ma. 28Fareba mbi jan aŋ, a mbo pore sone ge naa dasana ma ne pet, ne sáso salla ge daage pet ge a ne sal Dok. 29Amma ndu ge daage pet ge ne sal O̰yom ge mbegeya, mbo ɓol poreya to bat, ya sone zi ɗiŋnedin.» 30Jeso jya̰ fare mbe no ndwara go, a jya̰ na go na da ne o̰yom ge seŋgre ne na zi.

Jeso ná ma ne na ná vya ge fareba ma

(Mat 12:4-50, Luk 8:19-21)

31Jeso ná ma ne na ná vya ma mbo ya mḛya zum, a dol temel tol na ya. 32Swaga mbe go, naa ɓase ne katɗa ver na se, a jan na go: «Mo ná ma ne mo ná vya ge sonmo ma, [ne mo ná vya ge gale ma]#3:32 Maktub ge zaŋgal a̰me ma jan fare ge ná vya ge gwale ne to. a mḛ ya zum, a ɓyare mo ya go.» 33Gwan ne nama janna go: «Mbi ná ma ne mbi ná vya ma wuɗi ma ɗaa?» 34Dol na ndwara ndil naa ge ne ka na ziyar go ver na se ma, jan go: «Mbi ná ma ne mbi ná vya ma no!» 35Ndu ge daage pet ge ne ke laar ɓyareya ge Dok ne, a mbi ná vya ge son ne, a mbi ná vya ge gwale ne, a mbi ná ne me.

Currently Selected:

Markus 3: FGN2013

Highlight

Copy