Matta 14

Siya ge Yohanna bage ke naa baptisma ne

(Mar 6:14-29, Luk 9:7-9)

1Dam mbe ma pul zi, Herodus bage ne suwal pal za̰ fare ge Jeso ne. 2Jan na dore ma go: «Ndu mbe no a Yohanna bage ke naa baptisma ne, ta̰ tan ne naa ge siya ma buwal zi, da ne pe, ɓol pool ge ke kaŋ ŋgayya ma no.» 3Ago Herodus gá dḛ wa̰ Yohanna, vwá na no, dó na daŋgay zi no, ne Herodiyas ge na ná vya Filibus gwale pe#Mar 6:17.. 4Ago Yohanna jya̰ Herodus go: «Be ke kwaɗa mo her Herodiyas to#Lev 18:16, 20:21..» 5Ka ɓyare go na hun na uzi, amma ka sya ɓase ma vo, ne da pe a ka kwa go Yohanna anabi ne.

6Dam vḛso tolla ge Herodus ne go, Herodiyas vya ge gwale ndal kaŋ naa ge gwasal ma ndwara se, é Herodus sḛ ke tuli gḛ ge be to. 7Ke wak tuli ne guniya go, kaŋ ge daage pet ge na ma̰ ɓyare na ya, na ma̰ hon nà na. 8Yuwaleya ge na ná ne pal, vya gwale mbo ya jan Herodus go: «Ho̰ mbi Yohanna bage ke naa baptisma pala seɗe go!» 9Gan sḛ su leɗet, amma ne guniya ge na ne guni tene pe, ne gwasal ma pe me, hon wak go a ho̰ nà na, 10teme naa mbo kun Yohanna pala ne daŋgay zi ya. 11A gene na pala ya seɗe go hon vya gwale, na sḛ gene na mbo hon na ná. 12Yohanna naa ge ame hateya ma mbo ya, a her na sḛ duur mbo mbulla. Uwale, a mbo waage Jeso.

Jeso wal naa dudubu anuwa̰y

(Mar 6:30-44, Luk 9:10-17, Yoh 6:1-14)

13Swaga ge Jeso ne za̰ fare mbe no, hé fak, ŋgwate ne swaga mbe go mbo babur pul uzi ya. Swaga ge naa ne za̰, a kare na pe ya ne bama koo. 14Swaga ge ne ka̰ na koo ne fak go, kwa naa tabeya, kat ne dulwak kwa a̰se ne nama pe, zon nama naa ge moy ma. 15Swaga ge swaga ne ke gasamal, na naa ge ame hateya ma mbo ya na ta, a jan na go: «Swaga mbe no a ful pul ne, swaga kale ya go, yá̰ ɓase ma nama mbo suwal diŋ mbo yat ta kaŋzam.» 16Jeso jan nama go: «Be ke kwaɗa ge ɓase ma mbo to. Aŋ sḛ ma, ho̰ me nama kaŋzam!» 17A jan na go: «Ne go go no, i da ne katugum anuwa̰y ne sii ma azi baŋ.» 18Jan nama go: «Ho̰ me mbi nama ya.» 19Hon ɓase ma wak nama ka sugur pal. Abe katugum ge anuwa̰y ma ne sii ge azi mbe ma, é na ndwara digi, e wak busu, siɗi katugum ma se, hon naa ge ame hateya ma, nama sḛ ma hon ɓase ma. 20Nama sḛ ma pet a zam, a huri, a wi gum wol para azi ne nama pe ge ne ga#2Gan 4:42-44.. 21Naa sonmo ge ne za ma a mbo naa dubu anuwa̰y, be ge isi naa zaab ma ne naa jabso.

Jeso mbo viya̰ mam pal

(Mar 6:45-52, Yoh 6:15-21)

22Swaga mbe go juju, terse na naa ge ame hateya ma nama ndé fak go, nama mbo na ndwara zḛ le may ya, na gale é ɓase ma gwanna. 23Swaga ge ne yá̰ ɓase ma gwanna, ndé njal pala digi hini ɗu ke kaɗeya. Gasamal, Jeso gá hini. 24Swaga mbe go, fak detɗa mam pul zum ya, sḭḭl ka pot na, ne da pe saam ka kwalla ya nama ndwara zi. 25Le cya̰wak pala, Jeso ɗage mborra ya mam pal nama ta. 26Swaga ge naa ge ame hateya ma ne kwa na mborra ya mam pal, a iigi, a ka janna go: «A kḭḭm a̰me ne!» Vo ge nama ne zi, a ka oyya. 27Se se no, Jeso jan nama go: «E me aŋ haŋgal se, a mbi ne, sya me vo to!» 28Bitrus gwan ne na janna go: «Bageyal, kadɗa a mo ne ɗe, ho̰ wak, mbi mbo mo ta ya mam pal.» 29Jan na go: «Mbo ya!» Bitrus kan na koo ne fak go, ka mborra mam pal, ndwara mbo Jeso ta ya. 30Amma swaga ge ne kwa saam kwalla ndaar, vo wan na, ɗage tḭya, ndage na ka̰l oyya, jan go: «Bageyal, má mbi!» 31Se se no, Jeso tyare na tok, wan na, jan na go: «Ndu ge ne fareba honna ŋgeɗo, kyaɗa mo ba tumri ɗaa?» 32Swaga ge a ne ndé fak go, saam mḛ. 33Nama ge a ne ka fak go ma a gur bama koo na ndwara se, a ka janna go: «Fareba mo Dok vya ne!»

Jeso zon moy ma ge suwal Genezaret go

(Mar 6:53-56)

34Swaga ge a ne ha ya le may, a det ya suwal Genezaret go. 35Naa ge ne suwal mbe go ma kwa na, a waage fare mbe swaga ma go kakaɗak, a gene naa ge moy ma ya pet na ta. 36A ka kaɗe na na ya̰ bama tá na ba̰r wak gagak. Nama ge a ne tat na ma a ka ɓol zonna.

Currently Selected:

Matta 14: FGN2013

Highlight

Copy