Matta 15

Fare eleya ge Farisi ma ne hateya ma pal

(Mar 7:1-13)

1Farisi ma ne naa ge njaŋgeya ma mbo ne Ursalima ya ɓol Jeso, a jan na go: 2«Mo naa ge ame hateya ma te yele hada ge bá ma ne ma pala gyana ɗaa? Ndi a zam kaŋ be ge usi bama tok.» 3Jeso gwan ne nama janna go: «Aŋ sḛ ma te yele wak honna ge Dok ne ma pala gyana ɗo, aŋ ba gá da ne aŋ hada ma pe ɗaa? 4Ago Dok jya̰ go: ‹Ho̰ mo bá ma ne mo ná hormo›, uwale: ‹Ndu ge ne jan fare sone na bá, ko na ná pal, a hṵ na uzi dedet#Wat 20:12, 21:17, Dwa 5:16, Lev 20:9..› 5Amma aŋ ɗe, aŋ jan go: Ndu ge ne jan na bá ko na ná ya go: ‹Kaŋ ge mbi te ya mbar mo ne na, mbi tyare na hon Dok›, 6ndu mbe gwan hon na bá ma a̰me to. A go no aŋ ɗuuli fare ge Dok ne pala se ne aŋ hada ma pe no. 7Naa ge mbuɗi naa ndwara ma! Da ne na viya̰ go ge Isaya ne waage fare mbe no aŋ pal go:

8‹Naa mbe ma uware mbi da ne bama wak wala baŋ,

amma nama dulwak kaal ne mbi.

9A uware mbi baŋ yak,

hateya ma ge a ne hate naa a eya ge naa dasana ma ne ne baŋ#Isa 29:13.›.»

Kaŋ ma ge ne hat ndu dasana seŋgre

(Mar 7:14-23)

10Jeso tol ɓase ma, jan nama go: «Za̰ me, kwa me me! 11A be kaŋ ge ne wat wak zi hat ndu seŋgre ne to, amma a kaŋ ge ne ndage ne wak zi ya zum. No a kaŋ ge ne hat ndu seŋgre ne.»

12Naa ge ame hateya ma mbo ya na ta, a jan na go: «Mo be kwa go fare ge mo ne jya̰ ka kaŋ syal koo Farisi ma ta to’a?» 13Gwan ne nama janna go: «Uwara ge mbi Bá ge ne digi zi ya ne ɗḭ to, mbo mbugi na uzi. 14Ya̰ me nama, a ɓaal ge ne wan ɓaal ma uwara ma ne! Kadɗa ɓaal wan na kon ɓaal uwara ne, nama sḛ ma jwak a det tuul se.» 15Bitrus jan na go: «Wa̰ i fare sḭ mbe no pe.» 16Jeso jan na go: «Aŋ me, aŋ gale wan fare mbe pe to’a? 17Aŋ kwa go, kaŋ ge ne wat wak zi, kale mbo laar zi ya, ɓyan bagay zum uzi ya to’a? 18Amma kaŋ ge ne ndage ne wak zi ya, ndage da ne dulwak zi ya, No a kaŋ ge ne hat ndu seŋgre ne. 19Ago dwatɗa ge sone ma, ne siya hunna ma, ne fi ne kaam gwale ma, ne o̰y kerra ma, ne syala kerra ma, ne sayda ge hale ma, sáso salla ma ndage da ne dulwak zi ya. 20No a kaŋ ge ne hat ndu seŋgre ne, amma zam kaŋ be ge usi tok, hat ndu seŋgre to.»

Hon fareba ge gwale ge suwal kanan ne

(Mar 7:24-30)

21Jeso ɗage ne swaga mbe go, mbo suwal Tir ma ne Sidon ya. 22Gwale ge suwal Kanan ne a̰me ge ne suwal mbe go mbo ya, ka oyya go: «Bageyal, o Dawda vya, kwa mbi a̰se! O̰yom ge seŋgre ke mbi vya ge gwale ne go yál ge be to.» 23Amma Jeso gwan ne na fare janna to. Na naa ge ame hateya ma mbo ya na ta, a jan na go: «Yá̰ gwale mbe, oy ya go nee pe go!» 24Jan nama go: «A teme mbi ya da ne tame ge ya̰meya ge ne hir ge Israyela ne zi ma pe ɗeŋgo.» 25Gwale mbe mbo ya gur na koo na ndwara se, jan na go: «Bageyal, mba mbi!» 26Jeso gwan ne na janna go: «Be ke kwaɗa a hé kaŋzam ge naa jabso ne dol gú vya ma to.» 27Na sḛ gwan ne Jeso janna go: «A fareba, Bageyal! Ago gú vya ma zam kaŋ pe ge ne fage ne bama bageyal tabul pala digi ya se ma.» 28Swaga mbe go no, Jeso jan na go: «Gwale, fareba honna ge mo ne a ɓaŋlaŋ! A ke ne mo dimma ne mo ne ɓyare go.» Gwale mbe vya zon swaga mbe go juju.

Jeso zon moy ma gḛ

29Jeso ɗage ne swaga mbe go, mbo maŋgaɗam ga̰l Galile wak ya, ndé njal digi, kat na pe se. 30Naa gḛ a mbo ya na ta, ne naa ge giɗi ma, ne ɓaal ma, ne gisil ma, ne looɗol ma, ne moy ge ɗogle ma me. a ka é nama na koo se, ka zon nama. 31Naa ka ke ajab, ne a ne ka kwa gisil ma far wak, looɗol ma ɓol pool, giɗi ma ka mbo viya̰, ɓaal ma ka kwa swaga pe me. A ka uware Dok ge Israyela ma ne.

Jeso wal naa dudubu anda

(Mar 8:1-10)

32Jeso tol na naa ge ame hateya ma, jan nama go: «Mbi da ne dulwak kwa a̰se ne ɓase mbe ma no pe. Ndi dam ma̰ no ataa a ya mbi ta, a ne kaŋzam ge zamma to. Mbi ya̰ nama mborra ne kyamal to, nama ndwara ma ma̰ hat piibi nama viya̰ zi.» 33Naa ge ame hateya ma jan na go: «Ge ful mbe no pul zi, nee ɓol kaŋzam ma̰ da ne da ge huri tabeya ge ɓase gḛ ge be to mbe ma no ɗaa?» 34Jeso ele nama go: «Aŋ da ne katugum gyana ga ne aŋ tok go ɗaa?» A jan na go: «Ɓyalar, ne sii zaaso kwaɗa lwak me.» 35Hon ɓase ma wak nama ká se. 36Abe katugum ge ɓyalar mbe ma ne sii mbe ma, swaga ge ne gwa̰ ne gugu, siɗi nama se, hon nama naa ge ame hateya ma, nama sḛ ma var ɓase ma na. 37Naa pet a zam, a huri, a kote pe ge ne gá ma ya digi wi gum ɓyalar. 38Naa ge a ne za ma ka naa sonmo dudubu anda, be isi naa zaab ma ne naa jabso. 39Swaga ge ne yá̰ ɓase ma mborra, ndé fak go, mbo suwal Magadan ya.

Currently Selected:

Matta 15: FGN2013

Highlight

Copy