Luka 3

Fare oyya ge Yohanna Bage ke naa baptisma ne

(Mat 3:1-12, Mar 1:1-8, Yoh 1:19-28)

1Del wol para anuwa̰y ge muluk ge Tiberiyus Kaysar ne zi, swaga mbe go a Ponse Pilatus ka bage ge ne dó na ndwara suwal Yahudiya pal ne, Herodus ka suwal Galile pal, Filibus ge na ná vya kat suwal Itureya ma ne Trakonitis pal, Lisaniyas kat suwal Abilen pal me, 2Hanna ma ne Kayafa kat kep tuwaleya me. Swaga mbe go, Dok jan Yohanna ge Zakariya vya fare ful pul zi. 3Yohanna mbo suwal ge ne maŋgaɗam Urdun wak go ma go pet, ka oy fare ge baptisma ge haseya ne naa ta ne poreya ge sone ma ne pe, 4dimma ne a ne njaŋge na ne maktub ge anabi Isaya ne zi go:

«Ka̰l ge ndu ge ne oy ne ful pul zi ne:

Nṵsi me viya̰ ge Bageyal ne,

ɗaɗe me na viya̰ ma temel tat.

5Baal pul ma pet nama mbú digi,

njal ma ne her pala ma nama bṵsi se!

Swaga ge ɓuɓugur ma nama nṵsi se latat,

swaga ge haal ma nama bṵsi se!

6Ndu ge daage pet, mbo kwa máya ge Dok ne#Isa 40:3-5..»

7Yohanna ka jan ɓase ma ge a ne ka mbo na ta na ke bama baptisma ma go: «Gole vya ma, a wuɗi yuwale aŋ ne go aŋ sya pore ge ne mbo mbo ya vo ɗaa? 8Ke me kaŋ ma ge ne ŋgay go aŋ hase hase. Na kaage aŋ ka jan ta go: ‹Abraham i bá ne›. Ago mbi jan aŋ, ne njal mbe ma no zi, Dok da ne pool ndage vya ma hon Abraham#Yoh 8:33,37,39.. 9Ne se no, kee e ya uwara ma pe go, uwara ge daage ge ne tol vya kwaɗa to, a syal na, a dol na ol zi.»

10Ɓase ma ka ele na go: «I ke gyana ɗaa?» 11Na sḛ ka gwan ne nama janna go: «Ndu ge ne ba̰r azi, na ho̰ ndu ge be ba̰r ɗu, ndu ge ne kaŋzam, na ke go no me.» 12Naa ge tyare kaŋ ma ka mbo ya na ta ke baptisma, a ka jan na go: «Bage hateya, i ke gyana ɗaa?» 13Ka jan nama go: «Ame me kaŋ waɗe ge a ne ho̰ aŋ wak tyareya pal to.» 14Uwale, asagar ma ka ele na go: «I ɗe, i ke gyana ɗaa?» Na sḛ ka jan nama go: «Harge me ndu a̰me kaŋ ne pool to, mbuɗi me naa ndwara to, ka me da ne aŋ vaswa ma pe ɗeŋgo.»

15Ne jo̰ ɓase ma ka da ne jobreya, a ka ele ta go: «Yohanna be Kris ne to’a?» 16Yohanna gwan ne nama pet janna go: «Mbi ɗe, mbi ke aŋ baptisma mam se, amma na ge ne mbo ya, na pool waɗe mbi waɗe. Mbi be mbyat ge fage na tyarko ma ne na koo zi to, na sḛ mbo ke aŋ baptisma da ne O̰yom ge mbegeya, ne ol me. 17Na kaŋ iya̰le swara ya na tok go, mbo varse swara ma ne mboor ne na tandal pot swara go, mbo abe gḛme gene mbo kan na hal se, amma mbo til mboor ge ol ge be piriya to zi.»

18Ka waage naa fare ge kwaɗa, ne moɗegeya ge ɗogle ma gḛ me.

Herodus dol Yohanna daŋgay zi

(Mat 14:3-4, Mar 6:17-18)

19Ne jo̰ Yohanna mḛre Herodus bage ne do na ndwara ne suwal pal ne na ne hé na ná vya gwale pe, ne na kaŋ kerra ge sone ge may ma pe me, 20Herodus gwan ke sone ge ɗogle ge waɗeya, dol Yohanna daŋgay zi.

Baptisma ge Jeso ne

(Mat 3:13-17, Mar 1:9-11)

21Swaga ge naa pet ne ka ke baptisma go, Jeso ke baptisma me. Ka ke kaɗeya, pḭr hage, 22O̰yom ge mbegeya mbo ya na pal dimma ne maale go, ka̰l ndage ne digi ya go: «Mo mbi vya ge laar wanna ne, mbi sḛ ke tuli ya mo zi.»

Pehir ge Jeso ne

(Mat 1:1-17)

23Swaga ge Jeso ne e pe ke na temel, ka da ne del tapolɗu go. A ka dwat go, na Yusuf vya ne, ndwara go Yusuf ge Iliya vya, 24Iliya ge Mattat vya, Mattat ge Levi vya, Levi ge Melki vya, Melki ge Yannay vya, Yannay ge Yusuf vya, 25Yusuf ge Mattatiyas vya, Mattatiyas ge Amos vya, Amos ge Nahum vya, Nahum ge Esli vya, Esli ge Naggay vya, 26Naggay ge Maat vya, Maat ge Mattatiyas vya, Mattatiyas ge Semeyin vya, Semeyin ge Yosek vya, Yosek ge Yoda vya, 27Yoda ge Yohanna vya, Yohanna ge Resa vya, Resa ge Zorobabel vya, Zorobabel ge Salatiyel vya, Salatiyel ge Neri vya, 28Neri ge Melki vya, Melki ge Addi vya, Addi ge Kosam vya, Kosam ge Elmadam vya, Elmadam ge Er vya, 29Er ge Jeso vya, Jeso ge Eliyezer vya, Eliyezer ge Yorim vya, Yorim ge Mattat vya, Mattat ge Levi vya, 30Levi ge Simeyon vya, Simeyon ge Yuda vya, Yuda ge Yusuf vya, Yusuf ge Yonam vya, Yonam ge Eliyakim vya, 31Eliyakim ge Meleya vya, Meleya ge Menna vya, Menna ge Mattata vya, Mattata ge Natan vya, Natan ge Dawda vya, 32Dawda ge Isay vya, Isay ge Obed vya, Obed ge Bwaza vya, Bwaza ge Sala vya, Sala ge Naason vya, 33Naason ge Amminadab vya, Amminadab ge Admin vya, Admin ge Arni vya, Arni ge Hesrom vya, Hesrom ge Peres vya, Peres ge Yuda vya, 34Yuda ge Yakub vya, Yakub ge Isaku vya, Isaku ge Abraham vya, Abraham ge Tara vya, Tara ge Nakor vya, 35Nakor ge Serug vya, Serug ge Ragaw vya, Ragaw ge Falek vya, Falek ge Eber vya, Eber ge Sala vya, 36Sala ge Kaynam vya, Kaynam ge Arfasad vya, Arfasad ge Sem vya, Sem ge Nuhu vya, Nuhu ge Lamek vya, 37Lamek ge Matusala vya, Matusala ge Enok vya, Enok ge Yaret vya, Yaret ge Maleleel vya, Maleleel ge Kaynam vya, 38Kaynam ge Enos vya, Enos ge Set vya, Set ge Adam vya, Adam ge Dok vya.

Currently Selected:

Luka 3: FGN2013

Highlight

Copy