Luka 2

Tolla ge Jeso ne

(Mat 1:18-25)

1Dam mbe ma pul zi ya, Kaysar Augustus hon wak go a isi naa ne suwar pal pet. 2Isiya ge zḛ ge mbe ka swaga ge Kiriniyus ne ka bage ne dó na ndwara suwal Siriya pal go. 3Ndu ge daage ka mbo na suwal tolla ya mbo isi tene. 4Yusuf ɗage ne Nazaret ge suwal Galile ne ya, mbo ya Betlehem ge suwal Yuda ne go, suwal ge Dawda ne go, ne da pe, na sḛ ya vuwal pe ge Dawda ne zi. 5A ne Maryam ge na kondore, mbo isi ta. Ago na sḛ ka da ne emel. 6A gale ne suwal diŋ, na dam tolla mbyat. 7Tol vya son, na vya pul soy, worge na ba̰r zi, dol na kavaar ma swaga zam kaŋ go, ne da pe swaga be kat ne nama pe zok gwasal go to.

Maleka dyan tene naa ge koy gii ma ta

8Ge suwal mbe go, naa ge koy gii ma ka dwamma ful zi koy bama gii ma. 9Maleka ge Bageyal ne dyan tene nama ta, hormo ge Bageyal ne ver nama se, vo ge baŋlaŋ wan nama 10Maleka jan nama go: «Sya me vo to, ndi mbi waage aŋ fare ge kwaɗa, ge ne mbo hon pehir ma pet laar saal. 11Ma̰ no, ge suwal ge Dawda ne diŋ, a tó aŋ Bage máya, na ge Kris, Bageyal. 12Ndi kaŋ ge ne é aŋ kwar na no: Aŋ ma̰ ɓol vya kare worgeya ba̰r zi, dolla kavaar ma swaga zam kaŋzam go.» 13Tukcuk, maleka ma ɓase a ɓan ne maleka mbe, a ka uware Dok go:

14«Uwareya hon Dok ge digi ma zi ya,

halas suwar pal ne naa ge Dok laar ne wa̰ nama ma pe.»

Mborra ge naa ge koy gii ma ne ya Betlehem go

15Swaga ge maleka ma ne abe ta ne nama ta mbo digi ya ɗe, naa ge koy gii ma jan ta go: «Mbo me nee Betlehem ya, nee mbo kwa kaŋ ge ne ke mbe, kaŋ ge Bageyal ne dya̰ na nee ta mbe.» 16A harge ta mborra avun cap, a mbo ɓol Maryam ma ne Yusuf ne vya kare ne fiya swaga zam kaŋ ge kavaar ma ne go. 17Swaga ge a ne kwa na, a wan nama fare ge maleka ne jya̰ bama ne vya mbe pe. 18Naa ge a ne za̰ nama ma pet, a ke ajab ne fare ge naa ge koy gii ma ne jya̰ bama. 19Maryam koy fare mbe ma mwaɗak na dulwak zi, ka dwat nama pal. 20Naa ge koy gii ma gwan, a ka uware Dok, ne siya̰le na ne kaŋ ma ge bama ne za̰, ne ge bama ne kwa ma pe pet, dimma ne a ne waage bama na go.

Dḭl tolla ge Jeso ne

21Dam ge tiimal go, dam ge a ba vyan vya ba̰y go, a hon na dḭl Jeso, dimma ne maleka ne waage na zḛ tek na ná gale ne be her emel go.

A gene Jeso zok ge mbegeya zi

22Swaga ge dam ge hat nama harcal ne mbya, eya ge Musa ne pal#Lev 12:1-3., a mbo ne na Ursalima go ndwara tyare na hon Bageyal, 23dimma ne a ne njaŋge na ne eya ge Bageyal ne zi go: «Vya son ge pul soy ge daage a mbo mbege na ne Bageyal pe#Wat 13:2,12,15..» 24ne tyare maale ma azi ko tuk vya ma azi tuwaleya dimma ne a ne njaŋge na ne eya ge Bageyal ne zi go#Lev 12:8..

Simeyon gwan ne gugu hon Dok ne Jeso pe

25Ndu a̰me ka Ursalima go, na dḭl Simeyon, ndu mbe ka dosol, ka sya Dok vo me, ka da̰re laar iyalla ge Israyela ne, O̰yom ge mbegeya ka na zi me. 26O̰yom ge mbegeya waage na zḛ tek go, na mbo su dḛ be ge kwa Kris ge Bageyal ne to to. 27O̰yom gene na ya zok ge mbegeya zi, swaga ge Jeso bá ma ne mbo ne na ya ndwara wi hada ge eya ne pal, 28ame na na tok go, uware Dok go:

29«O Bageyal, se no ya̰ mo dore mborra halas zi

dimma ne mo ne jya̰ go.

30Se no, mbi ndwara kwa mo máya go,

31na ge mo ne nṵsi na pehir ma ndwara go pet.

32A kwaya̰l ge mbo dyan pehir ge ɗogle ma ta,

mbo kat hormo ge mo pehir Israyela vya ma ne#Isa 42:6, 49:6, 52:10..»

33Na bá ma ne na ná a ke ajab ne fare ge ne jya̰ na pal pe. 34Simeyon e wak busu nama pal, jan na ná Maryam go: «Ndi, vya mbe no mbo é naa gḛ ne Israyela go detɗa, mbo e naa gḛ ne Israyela go ɗage digi me, mbo kat kaŋ ŋgayya, amma naa mbo gage ta ne na, 35mbo ben dwatɗa ge naa dasana ma ne ma pe zum, amma mo ɗe, mo mbo njot yál gḛ ge be to.»

Fare janna ge anabi Hanatu ne

36Anabi ge gwale a̰me, na dḭl Hanatu, a Fanuyel ge ne pehir ge Aser ne zi vya ne. Na sḛ sabe ya gwagwa. Ago a ne na obe ke del ɓyalar yàl katɗa zi, 37gá kumur no, wa̰ tene no ɗiŋ del wara tiimal para anda. Be ya̰ zok ge mbegeya to, ka ke temel ge Dok ne, ɗaal ne gyala ka wan asiyam, ne ke kaɗeya me. 38Det ya swaga mbe go tem, ka uware Dok, ka jan fare ge vya mbe ne naa ge a ne ka da̰re zurra ge Ursalima ne ma ta pet.

Gwanna ge Jeso ná ma ne ya Nazaret go

39Swaga ge a ne wi kaŋ ge ne mbya kerra ma wak pet ge eya ge Bageyal ne pal ɗe, a gwan mbo Galile, bama suwal Nazaret ya. 40Vya ka donna, hat ndu pool, kat wiya ne zwama, kwa a̰se ge Dok ne kat na zi.

Mborra ge Jeso ne zok ge mbegeya zi ne del wol para azi

41Na bá ma ka mbo Ursalima del ne del ne vḛso Paska pe. 42Swaga ge ne ke del wol para azi, a ne na bá ma mbo ha̰leya ge vḛso ne pal. 43Swaga ge vḛso ne á, a ɗage gwanna, vya jyale Jeso ga Ursalima go, be ge na bá ma kat ne na kwarra. 44A ka dwat go na ya naa buwal zi, a kere viya̰ dam ɗu jyan, a ɗage ɓyare na bama sele ma ne bama naa ge kwarra ma ta, 45amma a ɓol na to bat. A gwan mbo ɓyare na Ursalima ya. 46Dam ge ataa go, a mbo ɓol na ne katɗa naa ge hate naa ma buwal zi zok ge mbegeya zi, ka za̰ nama, ka ele nama fare me. 47Naa ge a ne ka za̰ na ma pet, a ka ke ajab ne na ɗalla ma ne na fare gwanna ge ne ka gwan ne nama. 48Swaga ge a ne kwa na, a ke ajab, na ná jan na go: «Mbi vya, mo te ke i ma fare go ɗaa? Ndi, i ne mo bá da ne iigiya swaga ɓyare mo go.» 49Jan nama go: «Aŋ te ɓyare mbi gyaɗa ɗaa? Aŋ be kwa go, da ne na viya̰ go ge mbi kat zok ge mbi Bá ne zi to’a?» 50Amma a wan fare ge ne jya̰ bama pe to. 51A ne nama gwan Nazaret ya. Ka gwan ne na pala nama pe se, na ná koy fare mbe ma na laar zi. 52Jeso ka donna, ka zam zḛ zwama zi, ka ɓol doreya ne Dok ta ne naa dasana ma ta me#1Sam 2:26, Frs 3:4..

Currently Selected:

Luka 2: FGN2013

Highlight

Copy