Yakub 5
5
Moɗegeya ne naa ge tok pool ma pe
1Naa ge tok pool ma, ɓá me fyaso ne ka̰l ndaar ne yál ge ne mbo det aŋ pal pe! 2Aŋ kaŋ ɓolla ma hubi go, aŋ ba̰r ga̰l ma ha̰y zam nama go#Mat 6:19., 3aŋ dinar ma ne aŋ fool kaal ma kaare go, nama kaareya ma mbo jan fare aŋ pal, a mbo zam aŋ duur ma dimma ne ol ne zam kaŋ go. Aŋ kote kaŋ kwaɗa ma ne dam ge hṵsi ma pe. 4Ndi, bware ge naa ge ne mbo ɓar wak mo gaaso zi ma ne, na ge mo ne kuri nama na, a ne fyal no, ka̰l yo̰re ta ge naa ge ɓar wak ma ne det ja ɗiŋ Bageyal, Bage naa ge mbal pore ma ne togor zi#Lev 19:13, Dwa 24:14-15.. 5Aŋ ka dunya zi, tuli zi ne a̰yya zi, aŋ so̰ ta ŋgoŋgop dimma ne kavaar ma go ne aŋ dam vyanna pe. 6Aŋ kṵ sarya naa pal, aŋ hṵ naa ge dosol ma, a be pili ta ne aŋ to.
Moɗegeya ma
7Ná vya ma, wa̰ me ta ɗiŋ Bageyal gwan’a. Ndi me naa ge gar kaŋ ma gale: A wan ta da̰reya ɗiŋ a syat kaŋ ge siŋli ge suwar ne do̰ nama, a jobre mam ge ne kan na wak swarra ge zḛ ne mam swarra ge go̰r dab#Dwa 11:14, Juw 2:23.. 8Aŋ sḛ ma me, wa̰ me ta, wa̰ me aŋ dulwak, ago gwanna ge Bageyal ne ya ga gwa. 9Ná vya ma, sṵ me ta ta pal to, na kaage a kṵ sarya aŋ pal to. Ndi me gale, bage kun sarya mḛ ya zok wak pala zum. 10Ná vya ma, bole me yál njotɗa ma ne wan ta ge anabi ma ne, nama ge a ne jya̰ fare ne dḭl ge Bageyal ne ma. 11Ndi, i uware naa ge ne wan ta ndiŋ ma. Aŋ za̰ fare wan tene ge Ayuba ne, aŋ kwa kaŋ ge Bageyal ne ke ne na pe aya go. Ago Bageyal a bage ne ke naa kwaɗa gḛ ne, ne bage kwa naa a̰se gḛ ne#Ayu 1:20-22, 2:10, 42:10-17, Kmb 103:8..
12Ná vya ma, kaŋ ma ndwara zḛ pet, guni me ta ne digi, ko ne suwar, ko ne kaŋ a̰me to. Amma o̰ ge aŋ ne na ka o̰, to ge aŋ ne na ka to me, ne da pe, na kaage aŋ dé sarya kunna zi to#Mat 5:34-37..
13Ndu a̰me njot yál ya aŋ buwal zi’a? Na kaɗe! Ndu a̰me ya laar saal zi’a? Na mbá kaŋ. 14Ndu a̰me ne aŋ buwal zi moy’a? Na tó naa ga̰l ge Dok ne ma, nama ka̰ num na pal dḭl ge Bageyal ne zi, nama kaɗe ne na pe#Mar 6:13.. 15Kaɗeya ge ne hon fareba mbo zon bage moy, Bageyal mbo ɗage ne na digi. Kadɗa na ke sone a̰me ma ya go, a mbo pore na nama. 16Fú me sone ge aŋ ne ma zum ta ta, ké me kaɗeya ne ta pe, ne da pe aŋ ba zon. Kaɗeya ge ndu ge dosol ne da ne pool gḛ. 17Iliya ka ndu dasana dimma ne nee go, á tene ke kaɗeya go mam na swa to, mam be swa suwar pal to ɗiŋ del ataa ne saba myanaŋgal#1Gan 17:1, 18:1, 18:42-45.. 18Gwan ke kaɗeya no, pḭr ya̰ mam swarra ya se no, suwar dó̰ kaŋ no.
19Mbi ná vya ma, kadɗa ndu a̰me ne aŋ buwal zi ya̰me ya ne viya̰ ge fareba ne go, ndu ge ɗogle gwa̰ ne na ya. 20Kwa me go, ndu ge ne gwan ne ndu ge sone ja ne viya̰ ge na ne ya̰me ya go, má na da ne siya zi, na sone ma gḛ mbo ɓol poreya me#Frs 10:12, 1Bit 4:8..
Currently Selected:
Yakub 5: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
