1Bitrus Fare pala hageya
Fare pala hageya
Maktub ge zḛ ge ge Bitrus ne a Bitrus bage temeya ge Jeso ne (1:1), bage ne kwa yál njotɗa ma ge Jeso ne ne na ndwara (5:1), ndwara go Bitrus ge Jeso ndu ge ame hateya njaŋge na ne. Njaŋge na kaŋ ge del wara myanaŋgal (60) go go, ne jo̰ a hṵ na del wara myanaŋgal para anda (64) go. Njaŋge na maktub mbe ge suwal Babilon go (5:13), ndwara go suwal Roma go, Silvanus ka na bage njaŋgeya (5:12). Ago (Tkm 15:40, 18:5) ke nee kwarra go Silvanus ma ne Bitrus ma ne Markus ma ka dagre (5:12-13).
Bitrus njaŋge maktub mbe hon naa ge hon fareba ge ne ka ɓarseya suwal Pontus go, ne Galatiya go, ne Kappadokiya go, ne Asiya go, ne Bitiniya go ma. Suwal mbe ma ya suwal Turkiya go.
Bitrus njaŋge nama maktub mbe no, ne da pe a ka iigiya ma zi, nama kaam ka ker nama yál, a ka sal nama ne or nama, a kuri nama ne nama ne ame Jeso Kris pe. A go no njaŋge nama maktub mbe no ndwara moɗege nama nama wa̰ ta hon fareba ge nama ne zi.
Swaga ge Bitrus ne ŋgay tene ge naa ge na ne teme nama maktub ma ta, ne uware Dok me, ke nama kwarra go Dok má nama ya go, nama da ne jobreya ne siya ma ne tanna ge Jeso Kris ne ta (1:3-12), a go no, moɗege nama no nama ka yaŋyaŋ, nama ka mbo mborra ge jwap ge ba̰a̰n ge nama ne ne Kris zi (1:13—2:10). Swaga her koo pul ge Kris ne go, nama koy fare ge Dok ne, nama wa̰ ta pe herra ma zi, nama ka naa ge jwap ma ge nama suwal ma go, katɗa dagre ge nama ne na ka jwap ná vya ma ta buwal zi, mo̰r ma ne na bageyal buwal zi, gwale ma ne na obe buwal zi, na ka da ne pala gwanna ta pe se (2:11—4:19). Swaga á na maktub no go, Bitrus moɗege naa ga̰l ge Dok ne ma, ne bool ma, ne naa ge hon fareba ma pet, nama ke temel ge Dok ne kwaɗa, nama wa̰ ta yál ma zi, nama ka̰ nama saareya ge wak tuli ge Dok ne ke ne nama pe ma pal.
Maktub ge zḛ ge ge Bitrus ne hate nee go nee wa̰ ta hon fareba ge nee ne zi, ko yál ma zi. Mborra ge nee ne ge dunya ma buwal zi na ka mborra ge jwap, go no nee oy fare ge Dok ne (2:9), swaga ge dunya ma ne kwa temel ge kwaɗa ge nee ne ma a ba ka uware Dok me (2:12). Uwale, ke nee kwarra go, kadɗa naa ke nee yál da ne dḭl ge Dok ne pe a kwaɗa, amma kadɗa naa ke nee yál go nee naa ge sone ma ne a kaŋ a̰se.
Currently Selected:
1Bitrus Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.