Hosiya 5
5
Sone kerra ge ga̰l ma ne
1Za̰ me fare no, naa ge ke tuwaleya ma!
Ga̰l ge Israyela ne ma, hṵ me aŋ haŋgal ya se!
Aŋ ge ne gan diŋ ma, só me aŋ togor me!
A aŋ mbya kun sarya ge dosol ne,
amma ge Mispa go, aŋ kaŋ syal koo ma ne,
ge njal Tabor pal, aŋ faɗe ne ɓase ma pe.
2Ge Chittim go, aŋ á tuul ɗugul helek.
Amma mbi, mbi mbo mḛre aŋ pet.
3Mbi kwa Efrayim kwa,
Israyela fare a̰me ge ɗimil ne mbi ndwara se to.
Ne jo̰ aŋ é Efrayim mbo ke kaya,
se no Israyela hatɗa seŋgre.
4Nama kaŋ kerra ma e nama gwan’a bama Dok ta to,
ago o̰yom ge kaya kerra ne watɗa nama zi,
a gwan kwa Bage ɗiŋnedin to.
5Pala ga̰l ge Israyela ne ke sayda na pal.
Israyela ma ne Efrayim detɗa bama ya̰l zi,
ko Yuda puy, detɗa poseya ne nama me.
6A mbo ne bama gii ma ne bama nday ma
mbo tyareya ɓyare Dok pe,
amma a mbo ɓol na to bat
ago abe tene ya uzi ya ne nama ta.
7Nama sḛ ma mbuɗi Bage ɗiŋnedin mbuɗi,
a tó vya buwal pe ma no.
Se no, ɗiŋ mbo det saba ge giya̰l ya, nama pe mbo burmi uzi.
Pore mballa Yuda ma ne Efrayim buwal zi
8Sṵ me tṵ digi suwal Gibeya go,
sṵ me burci digi suwal Rama go,
suwa̰le me digi suwal Bet-Aven go,
O Bayami, dwa ne mo go̰r!
9Dam mḛreya go, Efrayim pe mbo burmi uzi,
Mbi waage Israyela vya ma fare ge fareba.
10Ga̰l ge Yuda ne ma a naa ge ne zwagre warbe ma ne,
mbi mbo á mbi laar ol nama pal#Dwa 19:14, 27:17..
11Efrayim ɓol yál go,
ndu ge gwan kwar na to,
ne da pe, á tene syaya kaŋ ge baŋ yak ma pe go.
12Mbi ɗe, mbi mbo kat dimma ne bigru go ne Efrayim pe,
dimma ne ndoɗe go ne Yuda pe me.
13Efrayim kwa na moy,
Yuda kwa na jwaŋ no me.
Efrayim mbo ɓol Asiriya ma,
dó temel mbo ɓol gan ga̰l,
amma na sḛ mbyat zon aŋ to,
day ge zon aŋ jwaŋ wak ma to bat#2Gan 15:29-30, 17:3..
14Ago mbi dimma ne sonne go ne Efrayim pe,
dimma ne sonne bool go ne Yuda pe me.
Mbi, mbi mbo kacage,
mbi mbo mbi mborra ne mbi kaŋ,
ndu ge maŋge na mbo kat to bat.
15Mbi mbo mbi mborra,
mbi gwan mbi swaga katɗa ya,
ɗiŋ nama sḛ ma kwa go bama naa ge sone ma ne,
a gwan’a ɓyare mbi pe.
Yál njotɗa ge nama ne zi,
a mbo gwan’a ɓyare mbi pe.
Currently Selected:
Hosiya 5: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
