Hosiya 4
4
Dok ho̰l ne kaŋ kerra ge Israyela vya ma ne
1Israyela vya ma, za̰ me fare ge Bage ɗiŋnedin ne:
Ago Bage ɗiŋnedin kaŋge naa ge ne ka ne suwal go ma:
Ago fareba, ne kwa a̰se, ne Dok kwarra be gwan ga ne suwal go to.
2Kaŋ tolla, ne hale kunna, ne siya hunna,
ne kaŋ sella, ne kaya kerra, ne fare kerra ge pool ma,
a gá da ne swama kanna se pe ɗeŋgo.
3Ne pe no, suwal mbo ga kḭḭmi zi,
naa ge ne ka ne na pal ma mbo burmi uzi,
kavaar ge ful zi ge ma, ne njoole ma, ko sii ma mbo su uzi.
Dok ho̰l ne naa ge ke tuwaleya ma
4Na kaage ndu a̰me ke gaage to,
ndu a̰me ɗaŋgre to me,
ago mbi ke ho̰l da ne aŋ naa ge ke tuwaleya ma.
5Aŋ koo ma mbo syal aŋ gyala ɗar,
dimma ne aŋ go, anabi ma koo mbo syal ɗaal me,
mbi mbo dibi aŋ ná Israyela wak.
6Mbi ɓase ma su da ne kwarra to pe.
Ne jo̰ mo cigi kwarra uzi,
mbi me, mbi mbo cigi mo ne mo temel tuwaleya go uzi,
ne jo̰ mo vyale eya ge mo Dok ne ma uzi,
mbi mbo vyale mo vya ma me.
7Naa ge tuwaleya ma mwamwaɗak a ke sone mbi ndwara se,
mbi mbo er nama hormo ne saaso.
8Nama sḛ ma wal ta da ne tuwaleya
ge mbi ɓase ge sone mbe ma ne tyare na,
a za̰ tuli ya sone kerra ge mbi ɓase ma ne zi#Lev 6:19-22..
9Mbi mbo pot naa ge tuwaleya ma ne mbi ɓase ma potɗa ge ɗu ca,
mbi mbo gwan ne nama potɗa nama kaŋ kerra ma pal,
nama kaŋ kerra ma mbo gwan nama pal.
10A mbo ka zamma, amma a mbo huri to bat,
a mbo ka ke kaya, amma a mbo tol ta se to bat,
ne da pe, a saŋge Bage ɗiŋnedin bama go̰r.
11Kaya ma ne oyo̰r-jiya̰l hat naa daal.
12Mbi ɓase ma ele fare pe uwara ta,
a uwara wak zaaso gwan ne nama fare janna ne.
Ndi, o̰yom ge kaya ne ya̰me nama go,
kaya kerra ge nama ne zi,
a abe ta ya uzi ya ne mbi ge nama Dok ta.
13A ndé mbo ke tuwaleya njal ma pala digi,
a ndé mbo til dukan njal ge sore busur ma pala digi,
a mbo kat uwara Chen ma, ne uwara pepliye ma, ne baŋre ma pe zi,
ne jo̰ nama soŋgoy tuli.
Da ne pe no, aŋ vya ge gwale ma ke kaya no,
aŋ tisi ma gá voɗom no me.
14Mbi ke ho̰l ne aŋ vya ge gwale ma, ne a ne ke kaya pe to,
ko ne aŋ tisi ma, ne a ne ke voɗom pe to,
amma mbi ke ho̰l da ne aŋ naa ge ke tuwaleya ma,
aŋ ge ne wat zum ne naa ge kaya ma,
ge ne zam kaŋ tuwaleya ma dagre ne naa zaab ge voɗom ma.
Fare sḭ jan ya go go:
«Ɓase ge ne kwa fare to,
a ɓase ge ne mbo mbo burmiya uzi ne.»
15O Israyela, kadɗa mo ho̰ tene ke kaya ɗe,
na kaage Yuda wa tene sone mbe zi to.
Mbo me Gilgal ya to,
mbo me Bet-Aven ya to,
guni me ta janna go:
«Ne dḭl ge Bage ɗiŋnedin,
Bage ne ndwara ne zi»
to.
16Israyela tele dimma ne nday ná ge tele go,
Se no, Bage ɗiŋnedin da ne pool kan nama swaga zám go
dimma ne tame go ɗaa?
17Efrayim vwa na pe da ne kaŋ sḭḭm ma. Yá̰ me na!
18Swaga ge a ne á ne jiya̰l njotɗa go,
a kale mbo ke kaya.
Nama ga̰l ma laar wa̰ kaŋ ge ne hon naa saaso ma.
19Saam labreya mbo abe nama,
nama tuwaleya ma mbo ke nama saaso.
Currently Selected:
Hosiya 4: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
