Ibriniya ma 11

Hon fareba

1Hon fareba a kaŋ ge ne e ndu kwarra go na ɓol kaŋ ge na ne jobre na ya ɓol zo, a kaŋ ge ne e ndu kwa kaŋ ge na ne kwa na ne mo ndwara fa̰ to ne. 2A na e naa ge zaŋgal ma ɓol sayda ge kwaɗa ne.

3Da ne hon fareba ta, nee kwa no go a ke dunya da ne fare ge Dok ne ta. Go no, kaŋ ge ne kwa ne ndwara ma a ke nama da ne kaŋ ge ne kwa ne ndwara to ma#Pe 1, Kmb 33:6,9..

4Da ne hon fareba ta, Abel tyare Dok tuwaleya ge kwaɗa waɗe ge Kaynu ne no. Ne na ta, Dok ndi no go na dosol, Dok ame na tuwaleya no me. Ne na ta, ko ne jo̰ su ya go puy ɗe, gale jan fare ya go#Pe 4:3-10. go ɗiŋ ma̰ no.

5Da ne hon fareba ta, Dok he Enok digi zi ya no be ge kwa siya to. Ndu a̰me be gwan ɓol na to, ne da pe Dok he na ne. Herra ge na ne ndwara zḛ, a ke na sayda go, na ndu ge ne ke Dok sḛ tuli ne#Pe 5:24.. 6Ago, ndu a̰me ne pool ge ke Dok sḛ tuli to, kadɗa na be hon fareba to. Ndu ge ne ndar tene ya Dok ta zi, ago na ho̰ fareba go Dok ya go, na pot nama ge ne ɓyare na pe lilit ma pot.

7Da ne hon fareba ta, Dok waage Nuhu kaŋ ge na sḛ gale ne kwa na ne na ndwara to no, ame ka̰l ge Dok ne ne dulwak ɗu no, pé fak ga̰l ndwara má na yàl mwaɗak. Go no, ŋgay go naa ge ne dunya zi ma sone, a go no Dok ndi no go na dosol ne hon fareba ge na ne ta#Pe 6:13-22..

8Da ne hon fareba ta, Abraham, swaga ge ne ɓo tolla, gwa̰ ne na pala se no, mbo suwal ge na te ya ame na joo ya no, ko ne jo̰ kwa swaga ge na ne mbo na ya be to#Pe 12:1-5, 23:4, 35:12,27.. 9Da ne hon fareba ta, mbo kat mbay suwal ge Dok ne ke wak tuli na mbo hon na nà ya no. Gá mbo kat gur zi no poseya ne Isaku ma ne Yakub no, nama ge ne ɓo wak tuli dagre ne na ma. 10Abraham ka da̰re suwal ge pe ne dó kwaɗa, na ge Dok sḛ ne ŋgay na sinna, ge ne sḭ na ne na tok zi ne#11:16, 12:22..

11Da ne hon fareba ta, ne jo̰ Sara del ma kale ya gḛ bergetek puy ɗe, ɓo viya̰ ge tol vya no, ne da pe ka ne hon fareba go, na ge ne ke na wak tuli na na mbo koy na wak tuli#Pe 18:11-14, 21:2.. 12A go no, ne ndu ɗu ta, ko ne jo̰ na det ja siya wak go puy ɗe, tó vya ma no gḛ ceɗed dimma ne guwa̰r ma ne digi go, ɓase dimma ne kafeɗem ne maŋgaɗam ga̰l yuwam wak go go#Pe 22:17..

13Nama mbe ma no pet, a su hon fareba zi, be ge ɓol kaŋ ge a ne ke nama na wak tuli. Amma a kwa na da ne kaal ya, a dore na no. A go no, nama sḛ ma kwa no go bama gwasal ma ne, ne naa ge mbay ma ne baŋ suwar pal#Pe 23:4, 1Maa 29:15, Kmb 39:13.. 14Ago, nama ge ne jan fare go mbe ma no, ŋgay kwaya̰l yaɗat go nama ɓyare suwal a̰me. 15Te go a ka dwat suwal ge bama ne ɗage ne ya pal, a te ya gwan na ya. 16Ago a ka ɓyare suwal ge kwaɗa waɗeya, suwal ge ne digi zi ya. Da ne pe no, Dok ke saaso ge a tó na nama Dok to, ago nṵsi nama suwal ya go.

17Da ne hon fareba ta, swaga ge Dok ne kugi Abraham, tyare na vya ge ɗu kikit tuwaleya no, ko ne jo̰ ɓo wak tuli gá dḛ ne Dok ta#Pe 22:1-14.. 18Dok jya̰ na go: «Mo mbo ɓol hir da ne Isaku ta#Pe 21:12..» 19Ka dwat na pala zi go, ko ne siya se puy, Dok da ne pool ge tan na digi, da ne pe, ɓo na vya no, ga kaŋ ŋgayya no.

20Da ne hon fareba ta uwale, Isaku e wak busu Yakub ma ne Isawu pal no, ne nama ndwara ge zḛ ge pe#Pe 27:27-29,39-40..

21Da ne hon fare ta, Yakub, na siya wak go, e wak busu Yusuf vya ge daage pal no, wan na tok na calaŋ ta, gur se uware Dok#Pe 48:1-20, 47:31..

22Da ne hon fareba ta, swaga ge Yusuf ne dé ya na dam ma wak aya go, jya̰ fare ge wat zum ge Israyela vya ma ne no, a go no, ho̰ nama wak ge kal ge na ne ma pal no#Pe 50:24-25, Wat 13:19..

23Da ne hon fareba ta, go̰r tolla ge Musa ne go, na bá ma woy na no ɗiŋ saba ataa, ne da pe, a kwa go bama vya dore ge be to, a be sya eya ge gan ne vo to#Wat 1:22, 2:2. .

24Da ne hon fareba ta, swaga ge Musa ne ha ga̰l, kuri no go a tó na Faraon vya ge gwale vya to#Wat 2:10-12.. 25Vḭ tene go na njó yál poseya ne ɓase ge Dok ne ma, ge na te ya za̰ tuli swak baŋ sone zi. 26Ago ndi senna ge Kris kwaɗa gḛ waɗe kaŋ gan ge Masar ne ma. Ka ndil tok-koyom ge ne na ndwara zḛ ya.

27Da ne hon fareba ta, Musa sya ne suwal Masar go no be ge sya laar ol ge gan ne vo, wa̰ tene ndiŋ dimma ne na ne kwa Bage be kwa ne ndwara to ya go go#Wat 2:15.. 28Da ne hon fareba ta, e vḛso Paska pe no, cigi swama zok wak ma ta no, ne da pe swaga ge Bage burmi naa pe ne mbo ja, na e na tok Israyela ma vya pul soy ma ta to#Wat 12:21-30..

29Da ne hon fareba ta, Israyela vya ma kale maŋgaɗam ga̰l yuwam ge kaal pul se no dimma ne swaga fiya̰l go, swaga ge Masar ma ne kare nama pe ya, mam somɗe nama se ya no#Wat 14:21-31..

30Da ne hon fareba ta, swaga ge Israyela vya ma ne koŋle suwal Jeriko se dam ɓyalar, na gulum ga̰l gū se no#Jus 6:12-21..

31Da ne hon fareba ta, Rahab ge gwale kaya be su poseya ne naa ge be hon fareba to ma to, ne da pe, ame naa ge ne mbo ya ndil suwal ma kwaɗa#Jus 6:22-25, 2:1-21..

32Mbi jya̰ gyana iya ɗaa? Swaga mbyat mbi ge mbi jan fare ge Gedeyon ne to, ko ge Barak ne, ge Samson ne, ge Yafta ne, ge Dawda ne, ge Samiyel ne, ko ge anabi ma ne to#Nks 6—7, 4—5, 13—16, 11—12, 1Sam 16:1—1Gan 2:11, 1Sam 1:1—25:1.. 33Nama ge, ne hon fareba ta, a há suwal ma no, a ke kaŋ ge dosol ma no, a ɓo kaŋ ge Dok ne ke wak tuli nama pal ma no, a dibi sonne ma wak no#Dan 6. , 34a piri pool ge ol ne no, a ɓu ne kasagar ma wak zi no, A ka taŋgay amma a saŋge pool no, pore ma zi, a wa̰ bama dulwak, a há pehir ge ɗogle ma asagar ma no#Dan 3:1-30.. 35Naa zaab a̰me ma ɓol bama siya ma tanna. Naa a̰me a ka ke nama yál ɗiŋ mbo siya zi, amma a kuri go a zu bama, ne da pe, a ka dwat ɓol tanna ge siŋli waɗeya#1Gan 17:17-24, 2Gan 4:18-37.. 36Naa a̰me ma ɓol cotɗa, ne folla ne bol ma. A̰me ma a kan nama zul, a dol nama daŋgay zi#1Gan 22:26-27, 2Maa 18:25-26, Irm 20:2, 37:15, 38:6.. 37A mbá naa a̰me ma ne njal, a kṵ a̰me ma ne si, a hṵ a̰me ma ne kasagar. A̰me ma ga ŋgondoŋge anna, a̰me ma ga kan tame gwabal ma ne ɓiya̰ gwabal ma, a ka woɗegeya ma zi, a ka ker nama yál, a ka e nama njot yál#2Maa 24:21. . 38Ago dunya be kat kwaɗa ne nama pe to. A ka ŋgondoŋgeya ful ma pul zi, njal ma pala digi, ne njal pṵṵl ma zi, ne swaga hudmul ma zi. 39Nama mbe ma no pet, ne jo̰ a ɓo doreya ne hon fareba ge bama ne pe puy ɗe, a be ɓol kaŋ ge Dok ne ke wak tuli na pal to. 40Ne jo̰ Dok nṵsi nee kaŋ ge kwaɗa ma zḛ tek, be ɓyare go nama dé ya mbyatɗa tap go be ge nee to to.

Currently Selected:

Ibriniya ma 11: FGN2013

Highlight

Copy