Pe eya 46

Yakub zwagre mbo suwal Masar

1Israyela ɗage ne na kaŋ ma mwaɗak, det ya suwal Bercheba go, tyare tuwaleya ma hon Dok ge na bá Isaku ne. 2Ɗaal mbe zi, Dok jan na fare daalam zi, Dok tol na: «Yakub! Yakub! Na sḛ vin na: Mbi né!» 3Dok jan na go: «Mbi Dok, Dok ge mo bá ne. Kaage mo sya vo ge mbo suwal Masar ya to, ago, yago mbi mbo saŋge mo pehir ge ɓaŋlaŋ. 4A mbi sḛ mbo ɗame mo mbo suwal Masar ya ne, mbi sḛ mbo gwan ne mo ya ne me. Mo dam siya go, a Yusuf mbo dibi mo wak ne.»

5Yakub ɗage ne Bercheba go mborra. Na vya ma her na poseya ne bama gwale ma, ne bama vya ma ge pus ma ge Faraon ne teme ya ne in nama pe go. 6Uwale, a pole bama kavaar ma, ne abe bama kaŋ ge bama ne ɓó ge suwal Kanan go ma pet.

A go mbe no ge Yakub, ɓanna dagre ne na pehir ma mwaɗak, a mbo suwal Masar ya no. 7Na vya ge sonmo ma, ne na vya ge gwale ma, ne na báŋ ma, na pehir ma mwaɗak a mbo poseya ne na suwal Masar ya no.

Pehir ge Yakub ne ma

8Ndi, Israyela vya ma ge a ne nama ne mbo suwal Masar ya ma dḭl ma no, ndwara go Yakub ma ne na vya ma.

Yakub vya pul soy dḭl Ruben. 9Ruben vya ma dḭl no: Henok, Pallu, Hesron ne Karmi. 10Simeyon vya ma dḭl no: Yemwel, Yamin, Ohad, Yakin, ne Sohar, poseya ne Sawul, ge Kanan ma vya gwale vya. 11Levi vya ma dḭl no: Gerson, Kehat ne Merari. 12Yuda vya ma dḭl no: Er, Onan, Chela, Peres ne Zera. Er ma ne Onan su suwal Kanan go. Peres vya ma dḭl no: Hesron ma ne Hamul. 13Isakar vya ma dḭl no: Tola, Puva, Yob ne Chimron. 14Zabulon vya ma dḭl no: Sered, Elon ne Yaleel. 15No a Lea vya ma ge ne tó nama ne Yakub ge Paddan-Aram go ma ne. Na vya ge sonmo ma ne ge gwale ma a ɓa̰ mwaɗak naa tapolɗu para ataa, be ge isi na vya ge gwale Dina.

16Gad vya ma dḭl no: Sefon, Hagi, Chuni, Esbon, Eri, Arodi ne Areli. 17Aser vya ma dḭl no: Yimna, Yicheva, Yichevi, Beriya, ne Sera ge nama ná vya ge gwale.

Beriya vya ma dḭl no: Heber ne Malkiyel. 18No a Zilpa ge Laban ne ho̰ na vya ge gwale Lea vya ma dḭl ne. Zilpa tó Yakub vya ma mwaɗak, naa wol para myanaŋgal. 19Rachel ge Yakub gwale vya ma dḭl no: Yusuf ma ne Bayami. 20Ge Suwal Masar go, Yusuf tó vya ma ne Asnat ge Potifera, bage tuwaleya ge suwal On ne vya gwale, nama dḭl ma no: Manasa ma ne Efrayim. 21Bayami vya ma dḭl no: Bela, Beker, Achibel, Gera, Naaman, Ehi, Ros, Muppim Huppim ne Arde. 22No a Rachel vya ma dḭl ma ne. Rachel tó Yakub vya ma pet, naa wol para anda. 23Dan vya dḭl Huchim. 24Neftali vya ma dḭl no: Yahseel, Guni, Yeser ne Chillem. 25No a Bila ge Laban ne ho̰ na vya Rachel vya ma dḭl ma ne. Bila tó Yakub vya ma mwaɗak, naa ɓyalar.

26Yakub hir ma ge a ne mbo ya dagre ne na ge suwal Masar go ma, a ka naa wara myanaŋgal para myanaŋgal. A be isi na vya ge sonmo ma gwale ma to. 27Yusuf vya ge a ne tó suwal Masar ya ma, a naa azi. Yakub hir ma ge a ne ka suwal Masar go ma pet, a ɓa̰ digi naa wara ɓyalar.

Katɗa ge Yakub ne suwal Masar go

28Yakub teme Yuda na ndwara zḛ ya mbo ɓol Yusuf, ne da pe na nṵsi mborra ge bama ne ya suwal Gochen go. Swaga ge a dé ya Gochen go, 29Yusuf ndé na pus go, mbo ya ɓol na bá Gochen go. Swaga ge ne ka̰ na ndwara kwar na bá, bur na, fyal tata. 30Israyela jan Yusuf go: «Se no, ne jo̰ mbi kwa mo ndwara ya go, mo gale ne go da ne mo ndwara ɗe, mbi da ne pool suya.» 31Yusuf jan na bá vya ma, ne yàl ge na bá ne pet go: «Mbi gwan mbo waage Faraon go, mbi bá ma ne mbi bá vya ma yan ja ne suwal Kanan ya mbi ta. 32A naa ge wal kaŋ ma ne, a mbo ya da ne bama gii ma ne bama nday ma, ne bama kaŋ ma mwaɗak. 33Kadɗa Faraon tol aŋ ya, ele aŋ go, aŋ ke ma temel pe de ɗe, 34jya̰ me na go: ‹I mo dore ma i naa ge wal kaŋ ma ne ne i bool ya day dimma ne i bá ma go›. Go no aŋ mbo gá katɗa suwal Gochen ya go.» Ago, a seŋgre kakatak ge Masar ma kat swaga ne naa ge koy gii ma.

Currently Selected:

Pe eya 46: FGN2013

Highlight

Copy