Pe eya 45

Ŋgay tene ge Yusuf ne na bá vya ma ta

1Swaga mbe go no, Yusuf be day ge gwan wan tene ge naa ge ne na ziyar go ma ta to. Ne ka̰l ndaar, oy digi, jan go: «Abe me naa ne mbi ta uzi pet.» Ndu a̰me ɗu be gwan gá Yusuf ta to, swaga ge Yusuf ne ŋgay tene na bá vya ma ta go. 2Ndage na ka̰l fyalla ne ka̰l ndaar, Masar ma za̰ na, naa ge ne Faraon diŋ ma za̰ na me. 3Yusuf jan na bá vya ma go: «A mbi Yusuf ne. Mbi bá ya go gale ne na ndwara baa?» Amma na bá vya ma day ge gwan ne na fare janna pal to, ago a ka da ne vo ge ɓaŋlaŋ na ndwara se. 4Yusuf jan na bá vya ma go: «Ndá me ta ya mbi ta zi gwa.» A ndar ta ya na ta zi gwa, jan nama go: «A mbi aŋ bá vya Yusuf ge aŋ ne yá na uzi, mbo suwal Masar ya ne. 5Se no ɗe, kaage aŋ iigi ta to, hó me aŋ laar ne aŋ ne yá mbi uzi pe to. Ago a Dok sḛ teme mbi ya aŋ ndwara zḛ go go ne, ne da pe mbi má aŋ. 6Ndi del ma̰ no azi ge baktar ne dé suwar pal, del ma gale gá ya go anuwa̰y ge ndu ba gar kaŋ, ko ne syat swara to gale. 7Dok teme mbi ya aŋ ndwara zḛ ne, ne da pe, aŋ naa mbut aŋ gá suwar pal, aŋ ɓó zurra ge ɓaŋlaŋ me. 8Ne se no ɗe, a be aŋ teme mbi ya go go ne to, a Dok. A na sḛ é mbi Faraon goopol ne, é mbi ga̰l ge na yàl pal no mwaɗak, ne bage muluk ge suwal Masar ne no mwaɗak me. 9Há me ta gwan mbo mbi bá ta ya avun cap, jya̰ me na go: ‹Mo vya Yusuf jan go: Dok é mbi ne go ga̰l suwal Masar pal mwaɗak, mbo ya ɓol mbi, kaage mo ke dṵṵl to. 10Aŋ ne mo vya ma, ne mo baŋ ma, ne mo gii ma, ne mo nday ma, ne kaŋ ge mo ne ma pet, aŋ mbo ya kat Suwal Gochen go, mbi ta gwa. 11Swaga mbe go go no, mbi ba ka mbar mo kaŋ ge daage zi mwaɗak, ago baktar gale ya go del ta anuwa̰y. Go no, aŋ ne naa ge ne mo yadiŋ ma mwaɗak, ne kaŋ ge mo ne ma pet, aŋ mbo woɗege ne a̰me to›.

12Aŋ sḛ ma kwarra ne aŋ ndwara, mbi ná vya Bayami kwarra ne na ndwara me, a mbi Yusuf jan aŋ fare ne. 13Aŋ mbo wan mbi bá kaŋ ma ge aŋ ne kwa ne aŋ ndwara ma pe, ne hormo ge mbi ne ɓó ne suwal Masar go pe me. Há me ta mbo gene mbi bá ya go go.»

14Abe na ná vya Bayami na sḛ zi, ka fyalla, Bayami ka fyalla me. 15Uwale ka bur na bá vya ma na sḛ zi ne fyaso. Go̰r go gale, a ne na bá vya ma ba ɗage sigɗi fare.

Tolla ge Yakub ne ya suwal Masar go

16Ko̰r det ge Faraon diŋ ya go, Yusuf ná vya ma mbo ja. Fare mbe ke Faraon ma ne na naa ga̰l ge temel ma sḛ tuli. 17Faraon jan Yusuf go: «Jya̰ mo ná vya ma go, nama yage nama kwara ma ne swara, nama gwa̰ mbo suwal Kanan, 18nama mbo wan nama bá ma ne nama vya ma ya, nama mbo ya kat mbi ta go go. Mbi mbo hon nama kaŋ kwaɗa ge suwal ne ma, a mbo zam kaŋzam ge kwaɗa ge suwal Masar ne ma me. 19Ho̰ nama wak go, nama abe pus ma ne go go, mbo abe nama gwale ma, ne nama vya ma ya, nama wa̰ nama bá ya me. 20Saare me ne aŋ kaŋ ge ne mbo gá ya aŋ go̰r ya ma pe to, ago kaŋ kwaɗa ge daage pet ge ne suwal Masar go ma mbo kat ge aŋ ne.»

21Israyela vya ma ke go mbe no tem. Yusuf hon nama pus ma dimma ne Faraon ne jya̰ go, uwale hon nama kaŋzam ma ne viya̰ pe nama tok go. 22Hon ndu ge daage ba̰r ge siŋli ge er pe, amma Bayami ɗe, hon na ba̰r ge siŋli ge er pe ma anuwa̰y, ne bware kikis ataa me. 23Hon na bá kwara ma wol yageya ne kaŋ ge siŋli ge suwal Masar ne ma, ne kwara ná ma wol yageya ne gḛme ma ne katugum ma, ne kaŋzam ma ne viya̰ pe. 24Go̰r go, e na bá vya ma mborra. Swaga mborra go, jan nama go: «Kaage aŋ ke ta gool viya̰ zi to!»

25A ɗage ne suwal Masar go, a det ya suwal Kanan go, bama bá Yakub ta. 26A jan na go: «Yusuf ya go ne na ndwara, a na sḛ ga̰l ne suwal Masar pal ne mwaɗak.» Amma Yakub iigi tene to, ne da pe be hon fareba nama fare janna pal to. 27A wan na fare ge Yusuf ne jya̰ bama ya ma pe mwaɗak. Swaga ge Yakub ne kwa pus ge Yusuf ne teme ya abe na ma ɗe, na haŋgal e se. 28Israyela jan go: «Mbyat go, mbi vya Yusuf da ne ndwara! A kwaɗa go, mbi mbo kwar na ɓya, mbi ba ɗage suya.»

Currently Selected:

Pe eya 45: FGN2013

Highlight

Copy