Pe eya 22

Abraham vin tyare Isaku tuwaleya

1Go̰r kaŋ mbe ma no go, Dok kugi Abraham, tol na: «Abraham!» Na sḛ vin na: «Mbi né.» 2Dok jan na go: «Wa̰ mo vya ge myalam ɗu kikit, na ge mo laar ne wa̰ na gḛ, ndwara go Isaku, mo mbo ne na suwal Moriya ya, mo ba tyare mbi na tuwaleya ge njal a̰me ge mbi ma̰ ŋgay mo na ya pal#Ibr 11:17-19..»

3Abraham ɗage cya̰wak vḛ, wan na kwara, wan na dore ma azi, wan na vya Isaku me, ɓá uwara ne tuwaleya ge tilla uzi pe, dol tene viya̰ go mborra ge swaga ge Dok ne ŋgay na ya. 4Dam ge ataa go, Abraham her na pala digi, kwar swaga mbe ne kaal ya. 5Jan na dore ma go: «Gá me ne kwara go go. I ne mbi vya ge dore mbe no, i ndé digi ya go mbo uware Dok, i ba gwan’a aŋ ta.»

6Abraham abe uwara ge ne tuwaleya ge tilla uzi pe, timi na, na vya Isaku pal, her ol ma ne wa̰le na tok go. Nama sḛ ma jwak, a kan ta mborra. 7Isaku tol na bá, na bá vin na, jan na go: «Báá! Ol ma ne uwara no, gii vya ge tyare tuwaleya ge tilla uzi ya le da ya ɗaa?» 8Abraham jan na go: «Mbi vya! Dok sḛ ne na pala ma̰ hon gii vya ge ke tuwaleya.»

Nama sḛ ma jwak, a kan ta mborra. 9Swaga ge a ne dé ya swaga ge Dok ne ŋgay na go ɗe, Abraham sin twal tuwaleya, kan uwara na pal, vwal na vya Isaku, dol na uwara tuwaleya pal. 10Par na tok, her wa̰le ndwara vyan na vya ka̰l. 11Ndi maleka ge Bage ɗiŋnedin ne tol Abraham ne digi digi ya: «Abraham! Abraham!» Na sḛ vin na: «Mbi né!» 12Maleka jan na go: «Kaage mo é mo tok vya mbe ta to. Ke na a̰me to. Ne se no, mbi kwa ya go go, mo ndu ge sya Dok vo ne, ne jo̰ mo vya ge myalam ɗu kikit puy, mo be kuri mbi ne na to.»

13Abraham her na pala digi, kwar gamla kḭḭm ma sanna ge uwara vya ge rurub ta. Mbo wan na ya, tyare na tuwaleya ge tilla uzi na vya byalam go. 14Abraham hon swaga mbe dḭl go: Adonay-Yireh (Bage ɗiŋnedin mbo kwa). Da ne pe no, naa jan ma̰ no go: «Ge njal ge Bage ɗiŋnedin ne pala digi, na sḛ mbo kwa.»

15Maleka ge Bage ɗiŋnedin ne gwan tol Abraham ne digi digi zi ya uwale, 16jan go: «Mbi guni tene ne dḭl ge mbi ne sḛ, ka̰l ge Bage ɗiŋnedin ne, ne jo̰ mo ke go no, mo be kuri mbi mo vya ge myalam ɗu kikit to, 17mbi mbo e wak busu mo pal, mbi mbo zuli mo pehir ma se lala̰y dimma ne guwa̰r ge ne pḭr digi ma go, ko dimma ne kaar ge ne maŋgaɗam ga̰l yuwam wak go go. Mo pehir ma mbo ame suwal ge bama naa ge ho̰l ma ne#Ibr 6:13-14.. 18Ne mo pehir ma ta, pehir ge ne suwar pal ma mwaɗak a mbo ɓol wak busu, ne da pe, mo za̰ mbi wak.» 19Abraham gwan na dore ma ta ya, a ɗage, a gwan mbo suwal Bercheba ya, ago Abraham ka Bercheba go.

20Go̰r kaŋ mbe ma no go ɗe, a waage Abraham go: «Milka tol mo ná vya Nahor vya ma ya go. 21Na vya pul soy dḭl Us, na ná vya Buz, ne Kemuyel ge Aram bá, 22ne Kesed, ne Hazo, ne Pildas, ne Yidlaf, ne Betuwel.» 23Nama mbe ma no tiimal, a vya ge Milka ne tó nama hon Nahor ge Abraham ná vya ma ne. A Betuwel tó Rebeka ne. 24Nahor gwale ge wanna digi dḭl Rewuma, tó na vya ma me, nama dḭl ma no: Teba, Gaham, Tahas ne Maaka.

Currently Selected:

Pe eya 22: FGN2013

Highlight

Copy