Pe eya 21

Tolla ge Isaku ne

1Bage ɗiŋnedin dwat ne Sara, ke na kwaɗa dimma ne na dḛ ne ke na wak tuli go. 2Sara eme, tol Abraham vya son sabar ge na ne zi, swaga ge Dok ne jya̰ na go pal tem#18:10, Ibr 11:11.. 3Abraham hon na vya ge na gwale Sara ne tó na mbe dḭl Isaku#21:3 Isaku: Sḭ go manna, maam.. 4Abraham vya̰ na ba̰y na dam ge tiimal go, dimma ne Dok ne ho̰ na wak go#17:12, Tkm 7:8.. 5Swaga ge Isaku ne tó go, Abraham ke ya del kis. 6Sara jan go: «Dok e mbi ya manna, ndu ge daage pet ge ne mbo za̰ fare no ya, mbo man ne mbi.» 7Sara gwan jan go: «A wuɗi kwa ne go Sara mbo tol Abraham vya ɗaa? Ndi, mbi tol na vya son ya sabar ge na ne zi.» 8Vya hat ga̰l, a hal na. Dam ge vya ne mbya halla go ɗe, Abraham ke vḛso ge ɓaŋlaŋ.

Abraham yan Agar ma ne Ismayel

9Dam a̰me ɗu, Sara kwa Agar, vya gwale ge suwal Masar ne, vya ge ne tó na ne Abraham ke Isaku kalam. 10Sara jan Abraham go: «Ya̰ mo̰r mbe ma ne na vya, ago, mo̰r mbe vya ne pool ge zam joo poseya ne mbi vya Isaku to#Gal 4:29-30..» 11Fare mbe tiiɗi Abraham ge be to, ne da pe, Ismayel na vya ne me. 12Amma Dok jan Abraham go: «Kaage mo ke laar pisil ne mo mo̰r ma ne na vya pe to. Vḭ fare ge Sara ne jan mo ma mwaɗak. Ago mo mbo ɓol hir da ne Isaku ta#Rom 9:7, Ibr 11:18.. 13Mbi mbo hon mo kale mbe vya hir me, ne da pe a mo vya ne.» 14Abraham ɗage digi cya̰wak vḛ, her kaŋzam ne mam ɗutulu zi me, hon Agar, gabe na na ganwak pal, hon na na vya me, yan na. Na sḛ dol tene mborra, gá mbo ya̰meya ful pul ge Bercheba ne zi. 15Swaga ge mam ne á ne ɗutulu zi go ɗe, Agar ya̰ na vya dolla uwara pe zi, 16mbo kat na pe uzi ya, dimma ne ndu ne mbal kajamle mbo det uzi ya kaal go ga. Ago ka jan tene go, na kaage na kwa na vya suya na ndwara go to. Mbo kat na pe uzi ya, ndage na ka̰l digi fyalla. 17Dok za̰ ka̰l fyalla ge vya ne, maleka ge Dok ne tol Agar ne digi ya, ele na go: «Agar, a ma fare ɓó mo ne! Kaage mo sya vo to, ago, swaga ge mo ne ya̰ vya mbe ya no, Dok za̰ na fyaso ya go. 18Ɗage digi, wa̰ mo vya, wa̰ na mo tok go kwaɗa, mbi mbo zuli na pehir se ceɗed.» 19Dok hage Agar ndwara, kwar tub a̰me, mbo zal mam wi na ɗutulu, hon na vya njotɗa.

20Dok kat poseya ne vya mbe, ke ga̰l, mbo kat ful pul zi, saŋge bage mbal kajamle. 21Na sḛ mbo kat ful pul ge Paran ne zi, na ná hon na vya gwale ge suwal Masar ne sanna.

Wak tuli ge Abraham ne ke ne Abimelek

22Swaga mbe go no, Abimelek poseya ne Pikol garlaŋ pore ge na ne, a mbo ya ɓol Abraham, a jan na go: «Dok a poseya ne mo, kaŋ kerra ge mo ne ke ma zi mwaɗak. 23Ne se no ɗe, guni tene ne dḭl ge Dok ne go, mo mbo lase i, ne mbi vya ma, ne mbi vya-kon ma to. Mo mbo kwa i, ne suwal ge mo ne ká mbay ne na go no a̰se, dimma ne mbi ne kwa mo a̰se go.» 24Abraham jan na go: «Mbi guni tene ya go!»

25Abraham fyal tene Abimelek ta ne tub ge na naa ma ne maŋge na pe. 26Abimelek jan na go: «Mbi be kwa ndu ge ne ke kaŋ mbe to, mo me, mo be ke mbi na kwarra to. Mbi gale ne za̰ na ma̰ no.» 27Abraham wan gii ma ne nday ma hon Abimelek, nama sḛ ma jwak, a ke wak tuli ta buwal zi. 28Abraham mbege tame kale ma ɓyalar hini ne bama kaam buwal zi ya. 29Abimelek ele Abraham go: «Mo te mbege tame kale ma ɓyalar uzi kyaɗa ɗaa?» 30Abraham jan na go: «Ame tame kale ge ɓyalar mbe ma no, kuri nama to, ndwara ke mo kwarra go, a mbi, mbi á tub mbe ne.» 31A go no, a tó swaga mbe dḭl no Bercheba#21:31 Bercheba: Sḭ go tub ge ɓyalar ma ne, ko tub ge guni ta ne. Ndi 28-30., ago, a go go no ge nama sḛ ma jwak a ne guni ta.

32Go mbe no, a ke wak tuli ta buwal zi Bercheba go. Abimelek ma ne Pikol ge na garlaŋ pore, a gwan mbo suwal ge Filistiya ma ne ya. 33Abraham ɗḭ uwara Tamaris Bercheba go, ne uware Bage ɗiŋnedin Dok ge ɗiŋnedin swaga mbe go pe. 34Abraham gá katɗa kaal tata suwal ge Filistiya ma ne go.

Currently Selected:

Pe eya 21: FGN2013

Highlight

Copy