Pe eya 18

Dok waage Abraham go, Sara mbo tol vya son

1Bage ɗiŋnedin dyan tene Abraham ta ge uwara Chen ge Mamre ne go. Na sḛ ne katɗa na gur wak go, gyala detɗa se njilik. 2Her na ndwara digi, kwa naa ataa ne mḛya ne na ndwara zum. Swaga ge ne kwa nama, ɗage ne na gur wak zi ya kun nama, cwage ɗiŋ suwar pal se. 3Jan go: «Mbi Bageyal, mbi kaɗe mo, kadɗa mbi dé mo ndwara zi kwaɗa, kale digi ne mo koo mbi yàl pal to. 4Ya̰ a zá aŋ mam ya nde, ndwara usi aŋ koo ma uzi, ɗigli me ta uwara pe zi me. 5Ya̰ mbi mbo ɓyare aŋ kaŋzam ya nde, ndwara ndal aŋ dulwak ɓya, go no, aŋ ba gá kaleya gale. Ago mborra ge aŋ ne ya mbi ta a bàŋ yak to.» Nama sḛ ma vin, a jan na go: «Ke ne mo ne ɓyare go.» 6Abraham za̰me avun cap, wat Sara ta gur zi, jan na go: «Ŋgay swáma peɗem kaŋ pul ataa, wá na digi, ke katugum ma ya avun cap.» 7Abraham sya na ɗyagarta zi ya, wan nday vya ge sḛ so̰o̰l ge siŋli ya ɗu, hon dore a̰me, na sḛ har tene ke kaŋzam. 8Swaga ge kaŋzam ne ke, Abraham her duur mbe poseya ne pam ka̰mul ma ne pam vyala, é na nama ndwara se. Nama swaga zam kaŋzam go, Abraham me, ka mḛya nama ziyar go uwara pe zi.

9Swaga mbe go, a ele na go: «Sara ge mo gwale ya le da ya ɗaa?» Na sḛ gwan ne nama janna go: «Ya gur zi.» 10Ge ɗu ne nama buwal zi jan go: «Demle ge koo-pul mbe go no tem, mbi mbo gwan’a mo ta, ndi mo gwale Sara mbo tol vya son.» Sara ne gur wak zi, Abraham go̰r go, za̰#Rom 9:9.. 11Abraham ma ne Sara a hatɗa sabar, nama del ma kale ya gḛ. Sara swaga tol vya kale ya me. 12Sara man na laar zi, jan go: «Se no mbi lwage go, mbi ne ene ge ndu son ne to, mbi bageyal me sabe go.» 13Bage ɗiŋnedin jan Abraham go: «Kyaɗa Sara ba man na laar zi, ba jan go, na hatɗa sabar ge be ge tol vya ɗaa? 14Kaŋ a̰me ge waɗe Bage ɗiŋnedin be kerra ya go ɗaa? Demle, swaga mbe go no tem, mbi mbo gwan’a mo ta, Sara mbo tol vya son na tok go#Luk 1:37..» 15Sara e na wak, jan go: «Mbi be man to!» Ago, na sḛ ka sya vo. Bage ɗiŋnedin jan na go: «A fareba, mo ma̰!»

Abraham kaɗe Bage ɗiŋnedin ne suwal Sodom pe

16Naa mbe ma kan ta viya̰ go mborra, a ka ndil swaga suwal Sodom pal ya. Abraham me ka ɗame nama. 17Swaga mbe go no, Bage ɗiŋnedin jan go: «Mbi ne pool woy Abraham kaŋ ge mbi ne ɓyare kerra to. 18Abraham pehir mbo saŋge pehir ge ɓaŋlaŋ ne ge pool gḛ, pehir ge ne suwar pal ma mwaɗak, a mbo ɓol wak busu dḛ da ne na ta#Gal 3:8.. 19Ago mbi sḛ tá na ne, ne da pe, na ho̰ na vya ma ne na báŋ kon ma wak go, nama koy mbi eya ma, ne ke mborra dosol zi, ne fareba zi me, go no mbi ba wi wak tuli ge mbi ne ke na pal ma wak.» 20Bage ɗiŋnedin jan Abraham go: «Sun ta ge naa ne sun ne suwal Sodom ma ne Gomor pal waɗe ya gḛ, nama sone ma waɗe ya gḛ me. 21Ne pe no, mbi ka̰ mbi koo ya se no, ndwara go mbi kwa kaŋ ge mbi ne za̰ ne sunna ge naa ne sun ta ne nama pal. Kadɗa a ke sone mbe go, mbi ma̰ kwar, kadɗa to me ɗe, mbi ma̰ kwar me.» 22Ne naa mbe ma buwal zi, naa azi a kan ta mbo suwal Sodom ya. Abraham gá mḛya Bage ɗiŋnedin ndwara se. 23Abraham ndar tene ya na ta gwa, jan go: «Mo da ne pool hun naa ge dosol ma uzi poseya ne naa ge sone ma me ɗaa? 24Tamekyala naa ge dosol ma ne suwal mbe diŋ wara anuwa̰y. Mo ma̰ vḛne suwal mbe uzi ɗaa? Ne naa ge dosol ge wara anuwa̰y mbe ma pe, mo ne pool pore suwal mbe to’a? 25Mo ne pool ke kaŋ ge go mbe no hir to! Mo ne pool hun ndu ge dosol ma ne ndu ge sone dagre dimma ne mo jo̰ nama ne ndu ge ɗu ne go to. Bage ne kun sarya suwar pal pet ne pool ge kun fare buwal dosol pal to to!» 26Bage ɗiŋnedin jan go: «Kadɗa mbi ɓol naa ge dosol ma ya suwal Sodom diŋ wara anuwa̰y, ne nama pe, mbi mbo pore suwal mbe no mwaɗak.» 27Abraham he fare, jan uwale: «Mbi ge mbi suwar lugɗum, ne sḭḭm baŋ, ndi mbi ɓyare gwan jan mbi Bageyal fare. 28Tamekyala naa ge dosol ma, ne wara anuwa̰y zi a woɗege anuwa̰y, ne nama pe mo ma̰ vḛne suwal mbe ɗaa?» Bage ɗiŋnedin jan na go: «Kadɗa mbi ɓol naa ya suwal mbe diŋ wara-anda para anuwa̰y, mbi ne pool ge vḛne suwal mbe to.» 29Abraham gwan gwarge tene na ta, jan go: «Tamekyala a ɓol naa wara-anda gagak!» Bage ɗiŋnedin jan go: «Ne naa ge wara-anda mbe ma pe, mbi ne pool burmi suwal mbe uzi to.» 30Abraham jan go: «Na kaage mbi Bageyal laar hó to, mbi ɓyare gwan jan fare. Tamekyala a ɓol naa ge dosol ma tapolɗu gagak.» Bage ɗiŋnedin jan go: «Mbi ne pool ke a̰me to, kadɗa mbi ɓol naa ge dosol ma ya suwal mbe go tapolɗu.» 31Abraham gwan jan go: «Ndi mbi ɓyare gwan jan mbi Bageyal fare. Tamekyala naa ge dosol ma wara azi.» Bage ɗiŋnedin jan na go: «Ne naa ge dosol ge wara azi ma pe, mbi ne pool vḛne suwal mbe uzi to.» 32Abraham gwan jan go: «Na kaage mbi Bageyal laar hó to, mbi ɓyare jan fare ge tok aya. Tamekyala naa ge dosol ma ne suwal mbe diŋ wol.» Bage ɗiŋnedin jan na go: «Ne naa ge dosol ge wol mbe ma pe, mbi ne pool ge vḛne suwal mbe to.» 33Swaga ge Bage ɗiŋnedin ne á fare janna ne Abraham go, mbo, Abraham me gwan mbo na yadiŋ.

Currently Selected:

Pe eya 18: FGN2013

Highlight

Copy