Pe eya 17

Dok er Abram dḭl Abraham

1Swaga ge Abram ne ke del wara lamaɗo para lamaɗo ɗe, Bage ɗiŋnedin dyan tene Abram ta, jan na go: «Mbi Dok ge pool pet ne, ke mborra mbi ndwara se, ká mbyatɗa tap. 2Mbi mbo ke wak tuli nee ne mo buwal zi, mbi mbo zuli mo pehir ma se lala̰y.» 3Abram kubi na ndwara suwar se, Dok jan na go: 4«Ndi wak tuli ge mbi ne ke ne mo no: Mo mbo kat pehir ma ɓase gḛ bá. 5A mbo gwan tol mo Abram to, amma mo dḭl mbo gá Abraham. Ago mbi mbo saŋge mo, pehir ma ɓase gḛ bá. 6Mbi mbo zuli mo hir ma se lala̰y, a mbo saŋge pehir ma, gan ma mbo kat dḛ ne mo pehir ma zi. 7Mbi mbo koy wak tuli ge mbi ne ke na ne mo, ne mo báŋ ma mo go̰r go, doŋ pe ma ne doŋ pe ma, ɗiŋ mbo ɗiŋnedin. Mbi mbo kat mo Dok, ne Dok ge mo báŋ ma ge ne mo go̰r ya ma ne me#Luk 1:55.. 8Suwal ge mo ne ka gwasal ne go no, mbi mbo hon aŋ ne mo báŋ ma na, ndwara go suwal Kanan mwaɗak, mbo kat nama joo ɗiŋnedin, mbi me, mbi mbo kat Dok ge nama ne#Tkm 7:5..»

9Dok gwan jan Abraham go: «Aŋ ne mo pehir ge ne mbo mbo ja ne mo go̰r ya ma, koy me wak tuli ge mbi ne doŋ pe ma ne doŋ pe ma. 10Ndi gyana gyana ge aŋ ba koy wak tuli ge mbi ne, ge mbi ne ke ne aŋ, ne mo pehir ma buwal zi: Ndu son ge daage ge ne aŋ buwal zi a vya̰ na ba̰y#Tkm 7:8, Rom 4:11.. 11Ba̰y vyanna mbo kat kaŋ ŋgayya ge wak tuli ge nee ne ke ta buwal zi. 12Vya son ge daage dam tiimal go̰r tolla ge na ne go, aŋ mbo vyan na ba̰y. Mbo kat go no aŋ buwal zi doŋ pe ma ne doŋ pe ma. Mbo kat go no uwale ne aŋ dore ma ge ne tó aŋ yadiŋ, ko ge aŋ ne yá na yat, ge ne aŋ hir zi to. 13Dore ge ne tó mo yadiŋ, ko ge mo ne yá na yat ne bware, mo mbo vyan na ba̰y, ne da pe wak tuli ge mbi ne na ka njaŋge njaŋge aŋ sḛ duur ma ta dimma ne wak tuli ge ɗiŋnedin go. 14Ndu son ge ne mbo vyan ba̰y ya to, a mbo yan na ne na pehir ma buwal zi uzi, ne na ne yele mbi wak tuli pala pe.»

15Uwale, Dok jan Abraham go: «Mo mbo gwan tol mo gwale Saray dḭl Saray ta to, amma na dḭl ga Sara. 16Mbi mbo é na mbi wak busu. Ne na ta uwale mbi mbo hon mo vya son. Mbi mbo e na mbi wak busu, pehir ma gḛ mbo tol ne na zi, mbo kat gan ma ná me.» 17Abraham kubi na ndwara suwar se, man, jan na dulwak zi go: «Ndu ge ne ke ya del kis, da ne pool gwan tol vya ɗaa? Sara me, ne del wara lamaɗo, da ne pool gwan tol vya ɗaa?» 18Abraham jan Dok go: «Kaɗeya ge mbi ne gwa go, mo dó mo ndwara Ismayel pal!» 19Amma Dok jan na go: «A go to, mo gwale Sara sḛ mbo tol mo vya, mo mbo hon na dḭl Isaku. Mbi mbo ke wak tuli ne na, ne na vya kon ma me, wak tuli mbe mbo kat ɗiŋnedin. 20Uwale, mbi za̰ mo kaɗeya ne Ismayel pe. Mbi mbo é mbi wak busu na pal, mbi mbo hon na vya, mbi mbo zuli na pehir se lala̰y, mbo tol gan ma wol para azi, mbi mbo saŋge na pehir ɓase gḛ ge be to. 21Amma ne wak tuli ge mbi ne ɗe, mbi mbo ke na dḛ da ne Isaku, na ge Sara mbo tol mo na ya demle, swaga mbe go no tem.» 22Swaga ge Dok ne á fare janna ne Abraham go ɗe, abe tene na pala digi ya.

Ba̰y vyanna ge Abraham ma ne na naa ma ne

23Abraham wan na vya Ismayel, ma ne na dore ge ne tó na yadiŋ ma, ne ge na ne yá nama yat ma mwaɗak, ndwara go naa sonmo ge ne na yadiŋ ma mwaɗak, vyan nama ba̰y dam mbe go, dimma ne Dok ne ho̰ na na wak go. 24Swaga ge Abraham ne vya̰ ba̰y ka da ne del wara lamaɗo para lamaɗo. 25Na vya Ismayel ka da ne del wol para ataa, swaga ge ne vya̰ ba̰y go me. 26A vya̰ nama ba̰y dam ge ɗu go. 27Naa ge ne na yadiŋ ma pet, ko dore ge ne tó na yadiŋ, ko ge ne yá na yat ne bware ne naa ge gwasal ma tok go, a vya̰ nama ba̰y dam ge ɗu mbe go.

Currently Selected:

Pe eya 17: FGN2013

Highlight

Copy