Wat zum 7

1Bage ɗiŋnedin jan Musa go: «Mbi mbo ke mo dimma ne Dok go Faraon ta, mo ná vya Aaron mbo kat dimma ne mo anabi go me. 2Mo ɗe, mo mbo ka jan mo ná vya Aaron fare ge mbi ne ma mwaɗak, na sḛ ba ka zwagre Faraon na, ndwara go, na ya̰ Israyela vya ma mborra ne na suwal go. 3Mbi me, mbi mbo togre Faraon dulwak, mbi mbo zuli mbi kaŋ ŋgayya ma ne kaŋ ajab ma suwal Masar go. 4Amma Faraon mbo za̰ aŋ to bat. Mbi mbo ŋgay suwal Masar pool ge mbi ne, ne sarya kunna ge ɓaŋlaŋ, go no mbi ba ɗage abe mbi naa ge mbal pore ma, mbi ɓase ma, Israyela vya ma ne suwal Masar diŋ mbo zum gale. 5Swaga ge mbi ne mbo ŋgay suwal Masar pool ge mbi ne ya, mbi abe Israyela vya ma ne nama buwal zi ya zum, go no, Masar ma mbo kwa go mbi Bage ɗiŋnedin ne.» 6Musa ma ne Aaron ke dimma ca ne Bage ɗiŋnedin ne ho̰ bama wak go. 7Swaga ge a ne ka jan fare ne Faraon go ɗe, Musa ka da ne del wara tiimal, Aaron ne del wara tiimal para ataa me.

Calaŋ ge Aaron ne saŋge bom

8Bage ɗiŋnedin jan Musa ma ne Aaron go: 9«Kadɗa Faraon jan aŋ ya go: Ke me kaŋ ŋgayya a̰me. Jya̰ Aaron go: ‹He mo calaŋ, dó na Faraon ndwara se›. Calaŋ mbe mbo saŋge bom.» 10Musa ma ne Aaron mbo ɓol Faraon, a ke dimma ca ne Bage ɗiŋnedin ne ho̰ bama wak go. Aaron dol na calaŋ Faraon ma ne na naa ge temel ma ndwara se, calaŋ mbe saŋge bom. 11Swaga mbe go no, Faraon tol na naa ge zwama ma, ne na mbole ge suwal Masar ne ma ya, nama sḛ ma ne bama kaŋ mbuɗiya ma a ke mbe go tem me. 12Nama sḛ ma pet a kan bama calaŋ ma se, a saŋge bom ma me. Amma calaŋ ge Aaron ne uɗi nama calaŋ ma mwaɗak. 13Dulwak ge Faraon ne togre ndaar ndiŋ ndiŋ, za̰ nama to dimma ne Bage ɗiŋnedin ne jya̰ nama go.

Kaŋ ŋgayya ge zḛ ge: Mam saŋge swama

14Bage ɗiŋnedin jan Musa go: «Faraon dulwak ndaar, vin ya̰ ɓase ma mborra to. 15Ɗage mbo ɓol Faraon cya̰wak vḛ, ge swaga ge na sḛ ne ɗage mbo maŋgaɗam wak ya go. Mbo da̰re na maŋgaɗam Nil wak ya ne calaŋ ge ne saŋge bom mo tok go. 16Mo jan Faraon go: Bage ɗiŋnedin Dok ge Ibriniya ma ne teme mbi ya mo ta ne, ndwara jan mo go: Ya̰ mbi ɓase ma mbo ful pul zi ya mbo ke mbi temel mo̰r. Ɗiŋ ne se no, mo za̰ to bat. 17Bage ɗiŋnedin jan go: Ne no ta, mo mbo kwa go, mbi Bage ɗiŋnedin ne. Ndi mbi iyal maŋgaɗam Nil ne calaŋ ge ne mbi tok go, na sḛ mbo saŋge swama. 18Sii ge ne maŋgaɗam Nil se ma mbo su uzi, maŋgaɗam Nil mbo hat huri, naa ge ne suwal Masar go ma mbo day gwan njot na to.» 19Bage ɗiŋnedin jan Musa go: «Jya̰ Aaron go: He mo calaŋ, mo tyare mo tok mam ma ge Masar ma ne pal ya, nama maŋgaɗam ma, ne nama maŋgaɗam Nil tok ma, ne nama mam yaŋga ma, ne nama baal koy mam ma, ne swaga ge daage pet ge mam ne go ma pal. A mbo saŋge swama. Mam ge ne suwal Masar go ma mwaɗak a mbo saŋge swama, ɗiŋ mbo nama puwa̰l zal mam ma ne nama il ma zi.»

20Musa ma ne Aaron a ke dimma ne Bage ɗiŋnedin ne ho̰ bama wak go. Aaron her calaŋ, iyal maŋgaɗam Nil Faraon ma ne na naa ga̰l ge temel ma ndwara go, maŋgaɗam Nil mwaɗak saŋge swama. 21Sii ge ne maŋgaɗam Nil se ma su, Nil hat huri bir, naa ge suwal Masar ma gwan day njot na to. Mam ge ne suwal Masar go ma mwaɗak a saŋge swama. 22Mbole ge suwal Masar ne ma ke go no ca me, ne bama kaŋ mbuɗiya ma. Faraon togre na dulwak ndiŋ ndiŋ, za̰ Musa ma ne Aaron to, dimma ne Bage ɗiŋnedin ne jya̰ nama go. 23Faraon gwan na yadiŋ, iigi tene ne fare mbe pe to.

24Masar ma mwaɗak, a al tub ma maŋgaɗam Nil wak go, ndwara ɓol mam njotɗa. Ago a be gwan day njot mam ge Nil ne to bat. 25Ne swaga ge Bage ɗiŋnedin ne iya mam Nil ya day, dam kale ɓyalar.

Kaŋ ŋgayya ge azi: Móy ma

26Bage ɗiŋnedin jan Musa go: «Mbo ɓol Faraon, mo jan na go: Bage ɗiŋnedin jan go: Ya̰ mbi ɓase ma mbo ke mbi temel mo̰r. 27Kadɗa mo ya̰ nama mborra to, mbi mbo wi mo suwal ne móy. 28Maŋgaɗam Nil mbo wi ne móy, a mbo ndé ya digi, a wat mo yadiŋ, mo zok dwamma zi, a ndé mo saŋgal digi, ne mo naa ga̰l ge temel ma yàl ma diŋ, ɗiŋ a wat mo ɓase ma diŋ, ne mo sagar ma zi, ne mo swaga ke kaŋzam ma go. 29Móy ma mbo ndé mo ta digi, mo ɓase ma ta digi, ne mo naa ga̰l ge temel ma ta digi pet me.»

Currently Selected:

Wat zum 7: FGN2013

Highlight

Copy