Wat zum 6
6
1Bage ɗiŋnedin jan Musa go: «Se no, mo mbo kwa kaŋ ge mbi ne mbo ke Faraon ya. Ne pool ge mbi ne, na sḛ mbo ya̰ Israyela vya ma mborra. Ne pool ge mbi ne, na sḛ mbo yan nama ne na suwal go uzi.»
Wak tuli ge Dok ne ne zurra ge Israyela vya ma ne pe
2Dok gwan jan Musa go: «Mbi Bage ɗiŋnedin ne. 3Mbi dya̰ tene Abraham ta, Isaku ta ne Yakub ta dimma ne Dok ge Pool Pet go, amma mbi be ke tene kwarra nama ta ne mbi dḭl ge Bage ɗiŋnedin to. 4Mbi ke wak tuli ne nama go, mbi mbo hon nama suwal Kanan, suwal ge nama sḛ ne ka mbay go. 5Mbi za̰ fyaso ge Israyela vya ma ne, ne mo̰r ge Masar ma ne ke nama pe, mbi dwa ne mbi wak tuli no. 6Ne no pe, jya̰ Israyela vya ma go: Mbi Bage ɗiŋnedin, mbi mbo ndage aŋ ne temel yál ge Masar ma ne zi ya uzi, mbi mbo zur aŋ ne nama mo̰r zi ya, ne pool ge mbi ne, mbi mbo zur aŋ ne sarya kunna ge ɓaŋlaŋ nama pal. 7Mbi mbo abe aŋ, aŋ mbo saŋge mbi naa ma, mbi mbo gá aŋ Dok, aŋ mbo kwa go mbi Bage ɗiŋnedin, mbi aŋ Dok ne, na ge ne ndage aŋ ne temel mo̰r ge Masar ma ne zi ya. 8Mbi mbo gene aŋ mbo wat suwal ge mbi ne guni tene hon Abraham, Isaku, ne Yakub, mbi mbo hon aŋ na joo dedet.»
9Musa mbo jan Israyela vya ma go mbe no. Amma a za̰ Musa to bat, ne wan ta to ne temel mo̰r ge a ne ka ke nama pe. 10Bage ɗiŋnedin jan Musa go: 11«Mbo jan Faraon gan ge suwal Masar ne go, na ya̰ Israyela vya ma mborra ne na suwal go.» 12Musa gwan ne Bage ɗiŋnedin janna go: «Kadɗa Israyela vya ma be za̰ mbi to ɗe, ke ma̰ gyana Faraon ba za̰ mbi ge mbi wak ne jan fare dṵṵl ɗaa?» 13Bage ɗiŋnedin jan Musa ma ne Aaron go nama mbo ɓol Faraon gan ge suwal Masar ne, ne Israyela vya ma pe, ne da pe, na ya̰ Israyela vya ma mborra ne suwal Masar go.
Musa ma ne Aaron báŋ ma dḭl
14Ga̰l ma ge ne vuwal pe ge Israyela vya ma ne ma dḭl ma no:
Ruben ge Israyela vya pul soy vya ma dḭl no: Henok, Pallu, Hesron ne Karmi. No a vuwal pe ge Ruben ne ma ne.
15Simeyon vya ma dḭl no: Yemwel, Yamin, Ohad, Yakin, Sohar, ne Sawul ge na gwale ge suwal Kanan ne vya. No a vuwal pe ge Simeyon ne ma ne.
16Levi vya ma ne bama vuwal pe go ma dḭl no: Gerson, Kehat ne Merari. Levi ke suwar pal del kis para tapolɗu para ɓyalar.
17Gerson vya ma dḭl no: Libni ma ne Chimey, ne bama vuwal pe ma go.
18Kehat vya ma dḭl no: Amram, Isar, Hebron ne Uziyel. Kehat ke suwar pal del kis para tapolɗu para ataa.
19Merari vya ma dḭl no: Mali ma ne Muchi. No, a vuwal pe ge Levi vya ma ne, ne bama hir ma go.
20Amram san Yokebed ge na dá. Tol na Aaron ma ne Musa. Amram ke suwar pal del kis para tapolɗu para ɓyalar.
21Isar vya ma dḭl no: Kore, Nefeg, ne Zikri. 22Uziyel vya ma dḭl no: Mikayel, Elsafan ne Sitri.
23Aaron san Elicheba, ge Amminadab vya, ge Nason ná vya ge gwale, na sḛ tol Nadab, Abihu, Eleyazar ne Itamar.
24Kore vya ma dḭl no: Asir, Elkana ne Abiyazaf. No a vuwal pe ge Kore ne ma ne.
25Eleyazar ge Aaron vya san Putiyel vya a̰me ɗu. Na sḛ tol na Pineyas. No a ga̰l ge Levi vya ma ne ma ne bama vuwal pe ma go.
26Bage ɗiŋnedin ho̰ Aaron ma ne Musa wak go: «Abe me Israyela vya ma ne suwal Masar diŋ ya zum, ne bama ɓase ma pe go.» 27A Musa ma ne Aaron jya̰ Faraon gan ge suwal Masar ne fare ne go, na ya̰ Israyela vya ma mborra ne suwal Masar go.
Bage ɗiŋnedin gwan ke wak tuli ne Musa
28Swaga ge Bage ɗiŋnedin ne jya̰ Musa fare suwal Masar go ɗe, 29Bage ɗiŋnedin jya̰ Musa go: «Mbi Bage ɗiŋnedin ne, gwa̰ mbo jan Faraon gan ge suwal Masar ne fare ge mbi ne jya̰ mo ma mwaɗak.» 30Musa gwan ne Bage ɗiŋnedin janna go: «Mbi ge mbi wak ne jan fare dṵṵl, ke ma̰ gyana Faraon ba za̰ mbi ɗaa?»
Currently Selected:
Wat zum 6: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
