Wat zum 5

Mborra ge Musa ma ne Aaron ne gan ge suwal Masar ne ndwara se

1Go̰r go ɗe, Musa ma ne Aaron mbo Faraon ndwara se ya, a jan na go: «Bage ɗiŋnedin, Dok ge Israyela ne jan go: Ya̰ mbi ɓase ma mborra, ndwara mbo ke vḛso ge mbi ne ge babur pul go.» 2Faraon jan go: «Bage ɗiŋnedin a wuɗi ne, ge mbi ba gwan ne mbi pala na pe se, mbi ba ya̰ Israyela mborra ɗaa? Mbi kwa Bage ɗiŋnedin mbe to, mbi ya̰ Israyela mborra to me.» 3Nama sḛ ma jan na go: «Dok ge Ibriniya ma ne dya̰ tene ya i ta ne, ya̰ i, i kee dam ataa mbo babur pul zi ya, i ba mbo tyare tuwaleya hon Bage ɗiŋnedin Dok ge i ne, ne da pe, na kaage na iya i ne mbogom, ko ne pore mballa to.» 4Gan ge suwal Masar ne jan nama go: «Musa ma ne Aaron, aŋ te é ɓase ma kan bama tok digi ne temel ta gyana ɗaa? Gwa̰ me aŋ temel ma wak ya. 5Se no aŋ kwa go naa mbe ma hatɗa ɓase gḛ suwal go ɓya, aŋ ba ɗage tele nama be ke temel ɗaa?»

Faraon gwan hon Israyela vya ma temel dṵṵl waɗeya

6Dam mbe go juju, Faraon hon naa ge ndil temel ma ne naa ge ɗame temel ge Israyela vya ma wak go: 7«Aŋ gwan hon nama dṵso ge iyal jalab dimma ne ge zaŋgal go to, nama sḛ ma mbo goole bama dṵso ya ne. 8Aŋ é nama iyal jalab ne a ne ka iyalla din go, aŋ gwa̰ ne nama jalab iyalla se to, ago a naa ge uwal ma ne. Ndi, da ne pe no, a á ta janna no go: ‹Ya̰ i mbo ke tuwaleya hon i Dok›. 9Aŋ njoy naa mbe ma ne temel kerra, aŋ wa̰ nama pe digi cemet, na kaage nama é nama togor za̰ fare ge hale mbe ma no to bat.»

10Naa ge ndil temel ma ne naa ge ɗame temel ge Israyela vya ma mbo jan ɓase ma go: «Faraon jan go, na gwan hon aŋ dṵso to. 11Aŋ sḛ ma gá mbo goole aŋ dṵso ma ya ne, ne swaga ge aŋ ne mbya ɓol na ne ya, ago a kun aŋ temel kerra wak uzi to bat.»

12Ɓase ma ɓarse ta se teteŋ suwal Masar go mbo goole dṵso ya. 13Naa ge ndil temel ma ka terse nama janna go: «Á me aŋ temel ge dam ge ma̰ ge wak, dimma ne a ne ka hon aŋ dṵso go.» 14A ka fol naa ge ɗame temel ge Israyela vya ma ne, nama ge naa ge ndil temel ge Faraon ne ma ne é nama nama pal ma, a jan nama go: «Kyaɗa aŋ ba á jalab ge dana ma ne ge ma̰ ma isiya dimma ne ge zaŋgal go to ɗaa?»

15Naa ge ɗame temel ge Israyela vya ma ne ma mbo fyal ta Faraon ta, a jan na go: «Kyaɗa mo ba ka ke i ge mo dore ma yál go ɗaa? 16A gwan hon mo dore ma dṵso to, a ka jan i go, i sḭ jalab me, a ka gwan fol i pal. Mo naa ma ke sone.» 17Faraon jan nama go: «Uwal ma! Aŋ naa ge uwal ma ne! Da ne pe no aŋ jan no go aŋ mbo ke tuwaleya ma hon Bage ɗiŋnedin! 18Ne se no, gwa̰ me aŋ temel ma wak ya. A gwan hon aŋ dṵso to, aŋ mbo ka iyal jalab dimma ne ge dḛ zaŋgal go.»

19Naa ge ɗame temel ge Israyela vya ma ne ma kwa go bama ya yál zi, ne jo̰ a jya̰ nama go: «Aŋ ne pool ge ndage jalab ge aŋ ne iyal dam ne dam wak uzi to.» 20Swaga ge a ne wá ne Faraon diŋ ya zum ɗe, a ɓol Musa ma ne Aaron ne swaga da̰re bama go. 21A jan nama go: «Ya̰ Bage ɗiŋnedin na kwa aŋ fare ne, aŋ hat i ya seŋgre Faraon ma ne na naa ga̰l ge temel ma ta. Aŋ hon kasagar ya nama tok go nama hṵ i uzi.»

22Musa gwan’a Bage ɗiŋnedin ta, jan na go: «O mbi Bageyal, kyaɗa mo ba zwal yál ya mo ɓase mbe ma pal go ɗaa? Kyaɗa mo ba teme mbi ya ɗaa? 23Ne swaga ge mbi ne mbo Faraon ta ya mbo jan na fare ne dḭl ge mo ne go day, na sḛ gá ke mo ɓase ma yál ge be ɗo to, amma mo be zur mo ɓase mbe ma to.»

Currently Selected:

Wat zum 5: FGN2013

Highlight

Copy