1 Juan 4

1Che raŷjupára cuera, ani perovia opaichagua ânga rejeguape. Tecôtevê pejaâ pôrâ umi ânga rejeguape, yajecha Tûpâ Ñandeyára rejeguapa? Jeta oñemoñeê guau reíva oñemuasâi co ybyari. 2Coicha ñande yajechacuaa Tûpâ Ñandeyára Espiritu: oime ramo ânga rejegua omombeúva Jesu Cristo ou jague cuimbae ramo jete rejeve, upéva Tûpâ Ñandeyára rejegua, 3ja oime ramo ânga rejegua omomârâva Jesuspe, upéva na Tûpâ Ñandeyára rejeguavái, ja cóva voi pe Cristo reje iyaé-ŷ-va rejegua, pejendu jague ou vaerâjá, ja coanga voi oime yby ári. 4Peêcuera Tûpâ Ñandeyára rejegua voi, che raŷcueramimi, ja pende puacama umiva rejeve. Tuvichavé voi pe oiva pende pype umi ybypóra recopegua pype oiva gui. 5Jaecuera ybypóra recopegua, ja upeareje voi jaecuera oñeê ybypóra reco rupi, ja umi ybypóra cuera oyapysaca jesecuera. 6Ñande voí Tûpâ Ñandeyára rejegua voi, ja pe oicuaava Tûpâ Ñandeyára oyapysaca ñandereje: upe Tûpâ Ñandeyára rejegua-ŷ ndo yapysacai ñandereje. Upeicha icatu yajechacuaa pe ángarejegua jecopegua rejeguava, ja pe ânga rejegua oyabŷva rejeguavape.

7Che rayjupára cuera, yayojayju oñondive. Pe mboraŷju Tûpâ Ñandeyára rejegua voi, ja oime ramo jayjujára, upéva Tûpâ Ñandeyára ñemoñaré ja oicuaa Tûpâ Ñandeyárape. 8Pe ojayju-ŷ-va ndoicuaai Tûpâ Ñandeyárape. Tûpâ Ñandeyára voi pe poraŷju. 9Coicha oyecuaauca ñandeve Tûpâ Ñandeyára ñande rayjujá ñandeve ombou jaguepype Tûpâ Ñandeyára Taŷra peteîme ybyari ñande yaicove jaguâ Jaerupi. 10Cova pe poraŷju jaetéva ñande yajaŷjú-ŷ-ramo yepe Tûpâ Ñandeyárape, upeicharamo yepe, Jae ñande rayju ñandeve ja ombou Tayrape omoñyrôjarârâ ñane angaipa reje. 11Upeicharamo, che rayjupára, ñande rayju rire Tûpâ Ñandeyára coicha, upeicha ñande avei yayojayju vaerâ oñondive. 12Avave máramo ndojechai Tûpâ Ñandeyárape. Ñande yayojaŷju ramo oñondive, Tûpâ Ñandeyára opyta ñande pype, ja iporaŷju oimbaité jecope ñandepype. 13Coicha ñande yaicuaa ñande yapytajá jecope ipype, ja Jae opytajá ñandepype Jae omeê jaguereje ñandeve Espiritu gui, 14ja ore rojecha vaecue ja roicuaauca roina pe Túva ombou jague Taŷrape umi ybypóra cuera mopôtíjarârâ. 15Oimeraêva omombeúva Jesus Tûpâ Ñandeyára Raŷjá, Tûpâ Ñandeyára opyta ipype, ja Jae opyta Tûpâ Ñandeyára pype. 16Ñande voi yaicuaama ñande rayju jâtâjá Tûpâ Ñandeyára, ja yayerovia upeareje. Tûpâ Ñandeyára jae poraŷjú. Ja pe opytáva porayjúpe opytá Tûpâ Ñandeyára pype, ja Tûpâ Ñandeyára opyta ipype. 17Coichavo oimbáne jecope ñande poraŷjú yareco jaguâ yayerovia jaguâ jecope pe ára pajávo oporomojendajápe: pe jeco Jae oi jaicha jina, upeicha avei ñande co ybyari. 18Pe poraŷjujápe ndaiyai yakyjŷyé jaguâ. Pe poraŷjú jaeteva omombo ocape pe kyjŷyejá. Pe kyjŷye oicojápe oico pyá tyai. Ja oime ramo okyjŷyéva nda jecopeguai iporaŷjú. 19Ñande yajaŷjú Jae ñande raŷjú jague reje. 20Oime ramo jeiva ojaŷjújá Tûpâ Ñandeyárape, ja upeyaveve oñamotareŷva jina japichápe, iyapúva upéva. Pe ojayju-ŷ-vape japichápe ojecha vaecue ndicatui ojayju Tûpâ Ñandeyára ndojechai vaecuepe. 21Ja cova co jembiapoucapŷ yareco Ichugui voi, upe ojayjúva Tûpâ Ñandeyárape tojayju avei japichápe.

Currently Selected:

1 Juan 4: GRN1913

Highlight

Copy