Saggaria 9
9
1Oᴋausek oᴋumaitok Nâlekab oᴋauserijanga Hâdrakib nunanga pivlugo, tôlârporlo Damaskusemut; Nâlekab inuit takonârmagit, Israêliblo kinguvângit tamaita.
2Hâmatiblo kigleᴋatigijanganut, Tirusemullo, Sidonemullo, silatonasugijunut.
3Tiruselo ingminut ungalulijoᴋsoaliolaukpok, silberemiglo katersoilune nunab sanningititut, goldelo aᴋilupiaktut apᴋosineâlungnêtotut.
4Ahâk, Nâlekab piksairutijomârpâ, annauniklunelo pitsartuninganik imarbingme; ikomamullo nungutaujomârpok.
5Askalonib tamanna takojomârpâ, sivôralârporlo; Gasablo, angijomiglo ânialârpok; Ekroniblo, nerriungnerijanga kangusuktitaujomârmat; Gasablo ataninga aserortaujomârpok, Askalonelo inuᴋarungnairomârpok.
6Tamângainâgarlo ataniojomârpok Asdodeme, Filisterillo inornautigijangat kipiniaromârpara.
7Aungalo pêjaromârpara ᴋaninganit, maᴋojungnartoᴋotingalo kigutingita akornganit; tâmnalo amiakôjomârpok Gudiptingnut; Jûdamelo angajoᴋâksoatut ilingajomârpok, Ekronelo Jebusiteritut.
8Tangmârteromârpungalo igluga ilumavlugo sorᴋsuktoᴋatigêksoatitut, tamaunârtoᴋarᴋonago utertoᴋarᴋonagolônêt: oᴋumaiksartitsijorlo tamauna apᴋotiksaᴋarungnairomârpok kingorngane; mâna nangminek ijimnut tautugama.
9ᴋuviasudlarit, Zionib pania; ᴋaggudlarit, Jerusalemib pania; Ahâk, atanît ᴋaivok ilingnut: idluarpok ajugauvlunelo; sinaungaidlune, siuterᴋortojome iksivavlune, siuterᴋortojûblo nangmarpaktûb noggangata ᴋânganêdlune.
10ᴋamutillo unatautit pêjaromârpakka Efraimit, horsillo Jerusalemit, pitikselo sorᴋsût pêrtaujuksauvok; inôᴋatigêksuillo ulapirksaumik oᴋarvigilârpait; nâlegauvingalo imarbingmit imarbiub aipânut pijomârpok, kôksoarmillo nunaksûb isua tikidlugo.
11Igvillo ômât, auk ilingnut angerutaulauktok pitjutigilugo parngnanairsortaumajoᴋotitit aulartitsomârpakka itsarmit imeᴋangitomit.
12Ungalujijoksoarmut uteritse nerriungnartomik parngnanairsortaumajose: uvlome kigligiutjivunga maggortortomik akkileromârapkit.
13Juda ᴋelugapko pitiksitut, Efraimelo noᴋaktigilugo; ernitillo, Zione, aulajârtitsomârpakka akkerartorᴋovlugit ernernik, Grîkenlande, pitsartujûblo saviksoangatut îtitsomârpagit.
14Nâlegarlo sakᴋijâromârpok tâpkoa ᴋolâtigut, ᴋargjungalo anijomârpok ᴋaumalaktut: Nâlegarlo Nâlegaujok tiptulausijaromârpok, ingeraromârporlo uarngniluakut.
15Nâlekab Zebaotib serngnigijomârpait; nerrilârpullo tuplerlutiglo iloereutinik; imilârpullo, pervaluklutiglo vainetorsimajutitut; ulipkilârpullo pôgutatut serparsaiviktut, tunerguserviub terreᴋungatut.
16Nâlekablo Gudingata piulijomârpait uvlorme tâpsomane inuᴋotigijamitut saugaᴋutaujutitut; niaᴋôtib ujarangititut îtsomârmatta, ᴋebleriklutik nunangane.
17Ajunginingat angijôdlarmat, takoranidlarningit inerᴋonadlarput! Sanaugaksat nukappait nakojksijutigilârpait, vainiksallo iptingata niviarsiat nakoksitilârpait.
Currently Selected:
Saggaria 9: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
