Mattêuse 3
3
Johannesib ajoᴋertuininganik baptitsininganiglo. Jêsusib baptitauninga Johannesemut.
1Taipsomane Johannese baptiterijok tikipok, ajoᴋertuilerlune inuᴋangitome Judêamêtome.
2Oᴋarlunalo: ᴋaᴋialeritse, nâlegauvik ᴋilangmêtok ᴋanitomut tikisimangmat.
3Taimnauvorle nalautaijub Jesaiasaib oᴋautigilauktanga, oᴋarame: Ajoᴋertuijub nippinganik inuᴋangitomêtoᴋarpok: Nâlekab apᴋotiksanga âᴋiksorsiuk, apᴋosiningillo naggotisigik.
4Tâmnale Johannese, annorâlik nergjutsûb Kamêlib merᴋunginik tapseruteᴋarlarmelo amivinermik; piglertaujârtulle igupsaujârtullo orᴋsungit nerᴋigivait.
5Tagva Jerûsalemiut nalipsarpât, Jûdêamiullo, Jordanib erᴋânêtullo ilûnatik,
6Baptitaujomavlutik tâpsomunga Jordaneme kôngme, idluinitiglo kigligiksautigivlugit.
7Farisêerillo Saduzêerillo unuktut tikitine baptitsivingminut takogamigit, oᴋautivait: Kuglugiangojârtose ilipse, kia ᴋemâᴋovâse ningautsemit pijomârtomît?
8Attêle, sakᴋêgitse paunganik nalonaijaijunik ᴋaᴋialernipsingnik!
9Issumaniarase, ilupsigut oᴋaromavluse: Abraha atâtagivavut. Oᴋautivapse: ujarᴋanit makkonangat Gûdib Abraha ᴋitorngititsungnarpâ.
10Ullimaut napârtub mimernanganêlerêrpok. Tamanna pivlugo napârtut naliat ajungitunik paungaᴋangitok kipijaunairpok, egitauvlunalo ikomamut.
11Uvanga imermut baptipapse nutâmik issumaᴋarᴋovluse; kingunipkulle tikituksak pitsartunersauvok uvamnit; nalopᴋotivungalo, tâpsoma itigagutinginik tigumiarnermik; tâpsoma baptitsomârpâse Anernermut ajunginermut ikomamullo.
12Tâpsoma ipsortûtine tigumiarpâ; ᴋematulivingme natinga sanneromârpâ, ᴋakᴋôjaksatsiallo ᴋematulivingminut katitsomârpait; piungitulle ôtsomârpait ikomamut ᴋamisuitomut.
13Taipsomane Jêsuse Galilêamit Jordanemut Johannesemut pivok, baptitaujomavlune tâpsomunga.
14Johannesible ᴋipilukpâ oᴋarlunalo: Baptitaujariaᴋaralloarpunga ilingnut; igville tikiparmâ?
15Jêsusible kiovâ oᴋautivlugolo: Mâna taimailerle; taimâk idluarnernik tamainik nâmaksititsijuksauvoguk. Johannesib perᴋovâ tagva.
16Jêsuse baptitaugame, tuavidlune kôngmit ᴋakᴋivok; ahâglo, ᴋilak ᴋolâne angmalerpok. Johannesiblo Gûdib Anerninga takovâ, tingmiatut taubetut akᴋartok, Jêsusemullo pijok.
17Ahâglo, nippe ᴋilangmit oᴋarpok: Tagva ernera nagliktara, tâmna ᴋuviagijara.
Currently Selected:
Mattêuse 3: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
