Mattêuse 20
20
Adsiujomik stundine sunatuinarne senaᴋojaujunik perorsêvingme vainiliksatalingme. Nalautainermik Kristûsib ânianginik. Zebedêusib ernîkita anânangata ᴋenuninganik. Tautungituk maggûk âᴋiktaunîgik.
1Gûdib nâlegauvingata adsigivâ iglub inua, uvlârortok sanajuksarsioriartorlune perorsêvingminut vainiliksatalingmut.
2Sanajuksallo angeᴋatigijarêramigit, kênaujamik atautsemik akkileromavlugit, uvluᴋ nâvlugo sanaᴋovlugit, tilivait perorsêvingminut vainiliksatalingmut.
3Stundik pingjuangne anigame, assingit takovait niuvervingmêtut suliaksaᴋangitut,
4Oᴋautivlugillo: Ilipsetauk aileritse perorsêvingmut vainiliksatalingmut; nâmaktomik akkileromavapse.
5Aivut tâva. Ama anigivok stundit 6 ingane 9 inganalo, taimailiormivlune.
6Stundille 11 ingane ama anigivok, assingittauk suliaksaᴋangitut tikinivait, oᴋautivlugillo: Sôᴋ uvlok nâvlugo suliaksaᴋarase tagvanêᴋisê?
7Oᴋautivât: Tilijeᴋanginapta. Oᴋautivait: Ilipsetauk aileritse perorsêvingmut vainiliksatalingmut; nâmaktomiglo akkilernairpapse.
8Unnulermalle, perorsêviub vainiliksataliub inuata pimaklertokotine oᴋautivâ: Sanajut ᴋaiᴋolugillo akkilikit, pigialerillo kingorlermit sivorlek tikidlugo.
9Tagva stundit 11 ingane sanaᴋojaujut sakᴋerput, ilûnatiglo adsigênik kênaujanik atautsinik pivut.
10Sivorlît tikinamik, ununersanik piniarasugivut; tâpkoatauk ilûnatik adsigênik kênaujanik atautsinik pigivut.
11Atautsemiglo pigamik, perorsêviub inua oᴋarnerlôtilerpât.
12Oᴋarlutiglo; Kingorlît makkoa, stundeme atausênarme sanalauktut, uvaptingnut adsiutipatit, uvlub oᴋumainarninganik kiangoninganiglo tukkisilauralloarapta.
13Kiovaille, ilangallo oᴋautivlugo: Ilannâra, akkilênerlugvigingilagit. Angeᴋatigêlaungilagûk kênaujamik atautsemîk?
14Kênaujat piuk, aularlutillo! Kingorlerle tâmna iliktut akkileromavara.
15Perᴋutimniglônet issumamnik piniartuksaungilangâ? Katalungavêt pitsiarnera pivlugô?
16Taimâk kingorlît sivorliojomârput, sivorlîllo kingorliojomârput. ᴋaiᴋojaujut unudlarmatta, anerimajulle ikidlarput.
17Jerusalemullo majorarpok; ingergavlutiglo ilinniartine 12 it ingmigolivlugit ingminut pitipait, oᴋautivlugillo:
18Ahâk, Jerusalemut majorarpogut, Inûblo Erninga pititaulârpok ajoᴋertuijoksoarnut, aglangniglo ilisimajunut, taipkoalo toᴋotaksautilârpât.
19Nalojunullo pitilârpât; taipkoalo mitautigilârpât, issaᴋavlugolo kikiaktulârpât; uvluglo pingajuangne makilârivok.
20Taipsomane Zebedêusib ᴋitorngangita anânangata ernîngne illagivlugik tikipâ, pâmaktervigivlugolo sumik tuksiarvigivâ.
21(Jêsusiblo) oᴋautivâ: Sumîk pijomavêt? Oᴋautivâ: Ernîkka ikkua iksivaᴋokik nâlegauvingne, aipâ talerpikpît tungâne, aipangalo saumikpît tungâne.
22Jêsusible kiovâ oᴋarlunalo: Tuksiararijase nalovase. Ermgusiârsub (imanga) imigaksara imerungnarpitikô baptitauniksaralo baptitauniksarijungnaralloarpitikô? Kiovâk: Âhailâ, ajungikalloarpavuk.
23Oᴋautivaglo: Ermgusiârsub (imanga) imigaksara imerniaralloarpatik, baptitauniksamnullo baptitaujuksaugalloarpotik, talerpingmale tungâne, saumingmalônêt tungâne iksivajomârnek, uvamnut perᴋojaksaungilak (ilîptingnut), Atâtamale iksivaᴋojangit, taipkoa iksivajomârput.
24Ilinniartut 10 it tamanna tussaramitsuk, anûjutigilerpakit nukarêk ukkua.
25Jêsusible ᴋaiᴋovait ingminut, oᴋautivlugillo: ᴋaujimavose, nunab ataningit ataniotingmatta, atanivîllo pitsartuneᴋarmatta.
26Ilipsele taimaituksaungitose, anginerojomajorle akunapsingne, kivgaulerle ilipsingnut.
27Angajoᴋaujomajorlo kivgaulerle ilipsingnut:
28Sorlo Inûb Erninga tikingimat, kivgartortaujomavlune, kivgartoriartorlunele, inôserminiglo tunijivlune unuktut piulijaujutiksanganik.
29Jerichomillo aularmatta, inugasaksuit malikpât.
30Ahâglo, tautungituk maggûk apᴋosinerme iksivavuk; Jêsuselo ᴋângiutiniartok tussaramikko, niplialerpuk oᴋarlutiglo: Nâlegak, Davidib Erninga, nâpkigitiguk!
31Inuille inerterpakit, nippangerᴋovlugik. Niplialualerpugle, oᴋarlutiglo. Nâlegak, Davidib Erninga, nâpkigitiguk!
32Jêsusele nokᴋalerpok, ᴋaiᴋovlugiglo aperivak: Sumîk uvamnit pijomavitîk?
33Kiovâk: Nâlegak, ijivuk uititauᴋovlugik.
34Jêsusiblo nâpkigilerpak, ijîkikullo aktorpak; tagvainarlo ijîgik tautugungnalerpuk; malikpâglo.
Currently Selected:
Mattêuse 20: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
