Mâlaki 3
3
1Ahâk, sivorlerijara tilivara, tâpsomalo apᴋutiksaᴋ âᴋiksolârpâ sivunamne: Nâlegarlo, ᴋenertase, tikiaᴋilârpoᴋ katimaviksoaᴋôtiminut: angiᴋatigêngnerub sivorlerijanga, ᴋuviagidlartase, ahâk, tâmna ᴋaivoᴋ, oᴋarpoᴋ Nâlegaᴋ Zebaot.
2Kiale uvloᴋ tikiviksanga sapingilârᴋaûk? Kinalo nangerungnalârᴋâ tâmna saᴋᴋijârpât? Goldemik auksititsijûb ikomangatut ipoᴋ, ergortuijûblo ubvautingatut;
3Iksivajomârporlo auksititsilune sujungaititsilunelo silberemik, Lêviblo erningit sujungaititsomârpait, epᴋêjarlugillo goldetut silberetullo; tunergusilârpullo Nâlekamut tunergutinik nerᴋiksanik idluarnerme.
4Tagva Jûdab Jerusalemiblo tunergutingit nerᴋiksat Nâlekab ᴋuviagilârpait sorlo itsarsoarme, sôrlo jârine nutângojungnaitune.
5Kiglisiniarlungalo najoromârpapse, erinesuavlungalo angakuit, assiniartullo, saglovlutiglo angertut kigligiutjivigijomârpakka; oᴋumaiksartitsijullo kivganik ikajusingine, uigarnerniglo, illiarsungniglo, arᴋtainiktullo takorngartanik idluarijanginik, sivôralugatiglo uvamnik, oᴋarpoᴋ Nâlegaᴋ Zebaot.
6Uvanga Nâlegaᴋ soᴋosijuigama; taimaimat ilipse Jâkob ᴋitorngangit nungutaungilase.
7Atâtapse uvlunginit aglât sanguvose maligaksauᴋojamnit, nâlengnagillo. Uteritse uvamnut, uvangalo uteromagivunga ilipsingnut, oᴋarpoᴋ Nâlegaᴋ Zebaot. Oᴋarposele: ᴋanoᴋ ilivluta utertuksauvitâ?
8Inûb Gude arᴋtaiviginiarᴋaûk? Ilipsele arᴋtaivigivapsinga. Oᴋarposele: Sunamik arᴋtaivigivitigît? Katersortapse tellimaujoanik tunergutiniglo isautijaujunik.
9Ôminarsijauvose ôminarsiᴋojinermut; arᴋtarapsinga, ilâ, inôᴋatigêksuit tamakkoa iluengartut.
10Katersortapse tellimaujoat ilûnaita âsigik ᴋematulivingmut, nerᴋiksaᴋarᴋovlugo iglumne, ôktorsingalo mâna mattomunga, oᴋarpoᴋ Nâlegaᴋ Zebaot, ᴋilaub igalângit angmaromângimangâpkit ilipsingnut, saimanartoᴋsoarmiglo koveriluse nimniornadlartomik.
11Pivluselo nerrijiniktoᴋ inerteromârpara, asseroiᴋonago nunapse perortunginik; vaineliksataliselo kataiᴋonagit paungamingnik perorsêvingme neliutiᴋârtinago, oᴋarpoᴋ Nâlegaᴋ Zebaot.
12Inôᴋatigêksuillo ilûnatik pilloringneraromârpâse: nunaselo inerᴋonadlaromârmat, oᴋarpoᴋ Nâlegaᴋ Zebaot.
13Pingijaidlartunik oᴋauseᴋarpose uvamnut, oᴋarpoᴋ Nâlegaᴋ. Oᴋarposele: Kanoetunik oᴋauseᴋarᴋitâ ilingnût?
14Oᴋarpose: Gude kivgartorlugo tukkeᴋalungilaᴋ: sumiglo piksarsivitâ perᴋojangit malikuptigîk, arvertarlutalo kiksarluta Nâlekab Zebaotib sânganê?
15Mânalo piojorijut pilloringnerarpavut; ilâ, idluitulijut pilluangovut; ilâ, Gude ôktolukpât, ᴋanoetomullo tikitaungilat.
16Tagva Nâlekamik sivôrajut oᴋaᴋatigêlerput: Nâlegarlo nâlakpoᴋ tusarlunelo, aglaillo erᴋaumajutiksat aglaktauvut tâpsoma sângane, Nâlekamik sivôrajut pivlugit, attinganiglo erᴋaijut pivlugit.
17Perᴋutigijomârpakkalo, oᴋarpoᴋ Nâlegaᴋ Zebaot, uvloᴋ adseungitoᴋ perᴋutiksaliorviga neliutikpat; nikagijomârpakkalo, sôrlo angutib ernine kivgartortine nikagingmago.
18Uteromârpose tagva ulernairtuiluselo idluartullo idluitullo adsigêngininginik, Gudemiglo kivgartortut, tâpsomingalo kivgartolungitut adsigêngininginik.
Currently Selected:
Mâlaki 3: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
