Joel 3
3
1Ahâk, uvlune tâpkonane, neliutomelo tâpsomane, Jûdab Jerusalemiblo aularutijaujungit utertikupkit,
2Inôᴋatigêksuit tamaita katersoromârpakka tikiutilugillo Jôsafatib naᴋsanganut; tagvanelo erᴋartoromârpakka inuᴋotikka kingormgutijakkalo Israêle pijutigilugit, siamartitangit inôᴋatigêksuit akornganut, nunalo piga avgoarlugo.
3Inuᴋotikkalo imerautigilauᴋpait; nukappiarlo tauᴋsiutivât anguniarpaktomut, niviarsiarlo vainesiutigivât imerungnarᴋovlugit.
4Ilipselo Tiruse, Zidonelo, Filisterillo erᴋât, suksauvisê uvamnût? Akkiniaromavisê uvamnîk? Akkiniaraloarupsingalo uteromalerivunga tuavidlunga erinesuklungalo akkiniarniselo utertitsomavlugo niaᴋupsingnut.
5Silbereᴋotiga goldeᴋotigalo tigugapsigik, pikkalo pikuminartut ajungitullo âgapsigik katimaviᴋotipsingnut;
6Jûdablo ᴋitorngangit Jerusalemiblo ᴋitorngangit aulailaurapsigik Griggit erninginut, ungasiktitsijungnarᴋovluse tâpkoninga nunamingnit;
7Ahâk, aulartitsomavaᴋᴋa nunamit aulaivigilauᴋtapsingnit tâpkoninga, akkiniarniselo utertitsomavlugo niaᴋupsingnut;
8Erniselo paniselo aulaijomavakka Jûdab ᴋitorngangita agganginut, tâpkoalo aulaijomârivait ama Sibamiunut, inôᴋatigêksoarnut ungasiktunut: Nâlegaᴋ taimak oᴋalaungmat.
9Tamanna aᴋpautigisiuk inôᴋatigêksuit akorngane: Unatarnermik âᴋiksoileritse: angutit sôngojut aulasigik; sorᴋsuktuksat ilûnatik ᴋaglilerlit majoarlillo.
10Ibjomik makperteriutise kauktorsigik saviksoangortilugit, iviksukatautiselo ᴋalugiangortilugit; sangêtut oᴋarlit: Sangijôvunga.
11Tuavigitse ᴋailuselo, ilûnase inôᴋatigêksoangojose, avatânêtose, katimaleritselo: tagvunga aᴋᴋartikit pitsartujoᴋotitit, Nâlegaᴋ.
12Inôᴋatigêksuit aulajârlit, majoarlutiglo Jôsafatib naᴋsanganut: tagvane iksivajomagama inôᴋatigêksuit avatânêtut erᴋartoromavlugit.
13Iviksukataut atorsiuk, katersoraksat innersimangmatta; ᴋaigitse, tullerajârileritse, iptejaivik tatadlarmat, ipteᴋautillo ulipkidlarmatta; idluiningat angijôdlarmat.
14Inugiartoᴋsuit, inugiartoᴋsuit naᴋsarme erᴋartuivingme! Nâlekab uvlunga ᴋaglimat naᴋsarme erᴋartuivingme.
15Seᴋineᴋ taᴋᴋerlo tâᴋsilerpuk, uvloritjallo ᴋaumanitik saᴋᴋijârtailititsomârpât.
16Nâlegarlo ᴋalingoaromârpoᴋ Zionemit, nippinelo anitilugo Jerusalemit; ᴋillaillo nunalo sajugomârput: Nâlegarle ᴋemâviksaujomârpoᴋ inuᴋotiminut, saputjauviksauvlunelo Israêlib ᴋitornganginut.
17Taimak ᴋaujilârpose uvangaugama Nâlegaᴋ Gudise, Zioneme ᴋaᴋᴋamne ivsornaitome ineᴋartunga: Jerusalem tagva ivsornaijomârpoᴋ, takorngartallo apᴋutigijungnairomârpât.
18Uvlorme tâpsomane ᴋaᴋᴋaᴋsuit kusseromârput vainemik mamaktomik, ᴋaᴋᴋallo ᴋôᴋalârput imungmik, Jûdablo kôngit ilûnatik kôlârput imermik; puilajorlo anilârpoᴋ Nâlekab iglunganit, Sittimib naᴋsanga koverarlugo.
19Egipten asserornerlukungoromârpoᴋ, Edomelo sunaᴋajuitungoromârpoᴋ asserorsimanelik, idluitulineᴋ piniarutaujoᴋ Jûdab ᴋitornganginut pivlugo, auk passijaksaungitoᴋ kovilaungmatsuk nunangane.
20Jûdalo soraijuitomik inuᴋaromârpoᴋ, Jerusalemelo kinguvângoᴋatigênit kinguvângoᴋatigênut.
21Aungallo ivsornaitilaungitara ivsornaitilârpara; Nâlegaᴋ ineᴋarmat Zioneme.
Currently Selected:
Joel 3: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
