Joel 2
2
1Tiptulausijaritse Zioneme, kamasârileritse ᴋaᴋᴋamne ivsornaitome; nunab inungit ilûnatik sajudlarlit; Nâlekab uvlunga tikilermat, ᴋaniporlo;
2Uvloᴋ tâᴋtoᴋ niptaidlartorlo, uvloᴋ nuvujalik ᴋaujuitorlo, sorlo uvlub tâvliganga issivisimajoᴋ ᴋaᴋᴋane; inôᴋatigêksuit sôngojut aᴋtornartullo, sivorngane taimaitoᴋalauᴋsimangilaᴋ, kingornganelo taimaitoᴋaromângilaᴋ kinguvârêt unuktut jâringinut aglât.
3Sivuningine ikoma nungûtsivoᴋ, kinguninginelo ikoâlaneᴋ ikitsivoᴋ; nuna perorsêviktut Edeneme ipoᴋ sivuningine, kinguninginele sunaᴋajuitotut asserortaumariktoᴋ; ilâ, ᴋemaktaujoᴋangimarikpoᴋ tâpkonunga.
4Tautuᴋarput horsit tautungititut; pangalikpullo horsititut unatarnerme atortutitut.
5Kamutit unatautit aksaloalit pervalungningititut ᴋaᴋᴋat ᴋângine misiktarput, sorlo ivît kippakungita ikoalâdlarningatut, sorlo inugiartoᴋsoatitut sôngojutitut sorᴋsungnermut siaktutitut.
6Sângine inôᴋatigêksuit kapiasudlarput: kênait ilûnatik ᴋatalerput.
7Aᴋpangerput inuktitut pitsartujijutitut; avaluᴋsuit majorarpait sorᴋsuktuksatitut; siaklutik sivumuarput atunit inigijaksarijamine, kipungalungilallo.
8Aipaminik nimniortitsijoᴋangilaᴋ; ilûnatik apᴋutigijaksarijatik apᴋutigivait; sakkullo akornganut kajusigaloarunik kiktorautigingilait.
9Piglerput iglugasaksoarnut; ᴋarmaᴋsûb ᴋângane aᴋpangerput; majoarput iglunut; igalâᴋtigut itârput tigligomajotut.
10Nuna sajukpilukpoᴋ sângine; ᴋilait sajukput; seᴋineᴋ taᴋᴋerlo tâᴋsipuk, uvloriallo ᴋaumanitik saᴋᴋijârtailitipait;
11Nâlekablo nippine anitipâ sorᴋsuktoᴋatigêksoarme sivurâne; tangmârvinga angijoᴋsôdlarmat; oᴋausinganiglo nâmaksititsijoᴋ pitsartudlarpoᴋ; Nâlekab uvlunga angijôdlarmat sivôranartoᴋsôlarmelo; kia sapingikaûk?
12Sullele, sulle, oᴋarpoᴋ Nâlegaᴋ, sâgiaritse uvamnut ômamut tamânut, nerritailivluse, ᴋeavluselo, kiksarluselo;
13Omatiselo aliksigik annorâse pinagit, sâgiaritselo Nâlekamut Gudipsingnut; tâmna saimarosudlarmat, ilapsugosuktoᴋsôvlunelo, ningarsarailungitoᴋ, nâpkiniktoᴋsôvlunelo, ajortomiglo anusingorsarpoᴋ.
14Kina ᴋaujimavâ anusingorniangimangât issumatârlunelo, ᴋemainiangimangâllo saimanartomik kingunermine, tunergutiksamik nerᴋiksamik tunergutiksamiglo imiksamik Nâlekamut Gudipsingnût?
15Tiptulausijaritse Zioneme, nerritailiviksamik âᴋiksoileritse, katimaniksamik opinartomik katimaᴋojileritse;
16Inuit katersorsigik, ilagêt ivsornaitisigik, angajoᴋaujut katimaᴋosigik, sorutsit, amâmaktullo katersorsigik; uiksaᴋ anile iniminit, nuliaksarlo sinigvingminit.
17Ajoᴋertuijut, Nâlekab kivgangit, ᴋugviorlit torᴋsukattâb tunerguserviublo akorngangne, oᴋarlillo: inuᴋotitit naiperᴋutigilaukit, Nâlegaᴋ, kingormgutijatillo tuniniarnagit mitautiksauᴋovlugit, inôᴋatigêksuit nâlegauᴋonagit tâpkonunga: sôᴋ inôᴋatigêksuit akorngane oᴋartoᴋartuksauvâ: Gudingat naûk?
18Nâlegak tagva ilungertulerpoᴋ nunane pivlugo, inuᴋotinelo naiperᴋutigivait.
19Kiovlunelo Nâlekab inuᴋotine oᴋautivait: Ahâk, tiliklervigijomavapse senaugaksanik, vainemiglo, orᴋsumiglo, nâmaksititaulârposelo tâpkonunga; mitautiksautitsomairpapselo inôᴋatigêksuit akorngane;
20Sorᴋsuktoᴋatigêksuillo avangat pijut ungasiktomut ilipsingnit nûtilârpakka, ajaktorlugillo nunamut panertomut sunataᴋangitomullo, sivorlingit imarbingmêtilugit kitidlerme, kingorlingillo imarbingme ᴋangidlerme; tipersoangalo igunâniningalo ᴋongmualârpuk, angijoᴋsoarnik piniarneᴋalaungmatta.
21Sivôraniarnak, nuna, ᴋuviasugit erᴋiertorlutillo; Nâlegaᴋ angijoᴋsoarnik piniarmat.
22Erᴋsiniarase, ilipse nergjuteojose naternarme; iviksukat sunaᴋajuitome perolermatta, napârtullo paungatâlermatta, napârtut vaineliksatalît napârtullo paungatannaktalit pitsartunermingnik saᴋᴋêlermatta.
23Taimaimat ᴋuviasudlaritse, ilipse Zionib ᴋitorngangit, serigitselo Nâlekame Gudipsingne; tâpsoma tunitjivigingmase silalungmik sivorliojomik nâmaktomik, pivluse silaluk kovivâ, silaluk sivorleᴋ silaluglo kingorleᴋ, taᴋᴋerme sivorlerpaujome.
24Nattillo tatadlalârput senaugaksanik, ipteᴋautillo ulipkilârput vainemik orᴋsumiglo.
25Nâmaksititsomavakkalo ilipsingnut jârit ᴋopergut piglertâraillo piglertallo piglertaujallo sorᴋsuktokatigêksoama ilipsingnut tililauᴋtama nerrijangit.
26Amigangitomiglo nerrilârpose aᴋᴋeartorniarluselo, Nâlekablo Gudipse, tatamnadlartomik piniarvigijipse, attinga nakorilârpase; inuᴋotikkalo kangusujuidlalârput.
27Kaujilârposelo uvanga Israêlikut akornganênama, Nâlegaugamalo Gudise, asseᴋanginamalo: inuᴋotikkalo kangusujuidlalârput.
28Pijomarporlo tamattoma kingorngane, anernera kovijomârapko uvinilingnut tamainut; erniselo paniselo nelautaijomârput, ituselo sinnartomajomârput, inôsuktoselo takotitjutinik takojomârput;
29Uvlunelo tâpkonane anernera kovijomârpara kivganut angutinut kivganullo arnanut.
30Tatamnadlartuniglo saᴋᴋijârtitsijomârpunga ᴋilangmelo nunamelo, aungmik, ikomamiglo, isserlungniglo napajunik.
31Seᴋineᴋ ablatsangoromârpoᴋ tâᴋtomut, taᴋᴋerlo aungmut, Nâlekab uvloᴋsoanga sivôranartoᴋ neliutiᴋârtinago.
32Imaitsomârporlo, neliaᴋ Nâlekab attinganut ᴋiagarsuktoᴋ piulijaujomârpoᴋ: ᴋaᴋᴋame Zioneme Jerusalememelo piulijauviksaᴋaromârpoᴋ, sorlo Nâlegaᴋ oᴋarsimangmat, amiakôjunelo Nâlekab ᴋaiᴋojangine.
Currently Selected:
Joel 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.