Galâtsiamiunut 5
5
Galâtsiamiut kaiblartauvut, okpertut kipalôjungnaininginik iperaiᴋonagit, arvertarᴋovlugille Anernerme naglingnermelo.
1Taimaimat Kristusib kivgaujungnaitingmatigut, kivgaunginise oᴋosertailiniarsiuk, kingornganelo ama kipalungortailitiniaritse.
2Ahâk, uvanga Pauluse oᴋaupapse: kipijauᴋojilerupse ilipsingnik, Kristuse ilipsingnut atungilaᴋ.
3Ama kigligiudsivigivakka kipijaulertut ilûnaita, perᴋojat ilûnaita nâmaksititaksaringmagit sulle.
4Kristusemik assiojivose, perᴋojanut idluartitaujomajose, saimaneᴋ atorungnairpase.
5Uvagulle Anernerme utaᴋivogut idluarsititauniarnermik okpernermut nerriugijaksaᴋarluta.
6Kristuse Jêsuseme kipimanerlônêt kipimanginerlônêt atungimanik; okpernerle naglingnikut piniarnernik saᴋᴋertitsijoᴋ.
7Aᴋpangitsialauᴋtose, kia noᴋᴋartipâsê mikseᴋârneᴋ nâlegungnairlugô?
8Ilipsingnik ᴋaiᴋojijomit noᴋᴋangatitauneᴋ taimaitoᴋ pingilaᴋ.
9Pudjusautiarsûb senaugaᴋ ilûnât pudjutipâ.
10Sungertûtigivapse Nâlekame, assianik issumaᴋarnianginapse. Ilipsingnigle asseroijoᴋ pidlartaujomârpoᴋ, kinaungmangâllônêt.
11Uvangale ᴋatangutikka, sulle kipinermik oᴋâlaguma, sôᴋ sulle unangmijauvîk? Seningajolik tagva sinaungasautigijaujungnairajarpoᴋ.
12Kanoᴋtôᴋ avisârtaulittauᴋ ilipsingnik asseroijut!
13Ilipsele ᴋatangutikka, kivgaujungnairᴋovluse ᴋaiᴋojaumavose. Udsertoritsele, kivgaungineᴋ atornerluktailivlugo, uviningmut akkuliuterᴋonago; kivgartortigêklusele pititse naglingnermut.
14Perᴋojat ilûnatik nâmaksititaungmatta oᴋautsemut atautsimut, mattomunga: Inuᴋatit iliktut nagligiuk.
15Kêjigêdlarupsele nerrijigêdluselo, kamaleritse, ilipsingnut nungutigêᴋonase.
16Oᴋaupapsele: Anernerme arvertaritse, uvingûb ikliguningit tagva nâmaksitiniangilase.
17Uvingûb ikliguningata Anerneᴋ akkerartormago, Anernerûblo kajungersainingata uvinik akkerartorivâ. Tâpkoa taimak akkerartortigêngmanik, pijomajapsingnik aglât piniarungnangilase.
18Anernermulle tessiortaugupse, perᴋojat ataniongilat ilipsingnut.
19Uvingûble pingit nelonangilat, imaitut: Nuliarêngnermik asseroineᴋ, assiniarnek, maᴋojungnartulineᴋ, illoᴋeudlarnerlo,
20Gûdeungitunik kivgartorneᴋ, angakoniarneᴋ, ᴋenugosungneᴋ, ômisungneᴋ, anerutjineᴋ, ningarneᴋ, aivaneᴋ, akkerartorneᴋ, ileratsârneᴋ, ᴋaningaumajarneᴋ, inuarneᴋ,
21Tallaneᴋ, nerrituneᴋ, assingillo taimaitut; tamakkoninga sivorngagut oᴋautilauᴋpapse, ama sulle sivorngagut oᴋautivapse: taimailiortut Gûdib nâlegauvinganik kingormgujiniangilat.
22Anernerub perortisangangit tamadja: Naglingneᴋ, ᴋuviasungneᴋ, ullapirsaineᴋ, ᴋenuersârneᴋ, inôtsiarneᴋ, pitsiarneᴋ, okperneᴋ, piojoringineᴋ, ikliguktailineᴋ.
23Perᴋojat taimailiortut akkerartungilait.
24Kristusible inuᴋotingita uvinitik ikligunerit kajungilârnerillo illaliudlugit pitipait seningajolingmut.
25Inôniarupta Anernerme, arvertalaungmitatauᴋ Anernerme.
26Suksaungitomik nertortauniksarsiorata, annuliutigêgatalo ômisuktigêgatalo!
Currently Selected:
Galâtsiamiunut 5: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
