Galâtsiamiunut 4
4
Gudib ᴋitorngangita kivgaungininganik piloringnartomik okpernerme Gudib angersimaninginik.
1Oᴋarpungale kingormgujijuksaᴋ sorusiotilugo, tâmnalo kivgarlo adsigêngitôngilak, tâmna angajoᴋaugalloarlune perᴋutinut tamainut.
2Ajoᴋertuijulle pairsijullo atanerivait neliutsiarivlugo atâtame perᴋojanga.
3Taimaktauᴋ uvagut sorusiotiluta kivgatitut ilingatitauvogut silatânêtunik ajoᴋertûtsinut.
4Neliuningale neliusimangmat, Gûdib ernine tilivâ, arnamit erniangojoᴋ, perᴋojanik nâleklune;
5Perᴋojanut kivgaujunik piuliklerᴋovlugo, ᴋitorngaunermik pititauᴋovluta.
6Kitorngaugapsele, Gûdib Ernerme Anerninga ômatipsingnut pitipâ, tâmna nipliajoᴋ: Abba Atâtak!
7Taimaimat kivgaujungnairpotit, ᴋitorngauvotille; ᴋitorngauguville, Gûdemittauᴋ kingormgujijuksaugivotit Kristusikut.
8Ilipsele taipsomane Gûde ᴋaujimanginapsiuk, ingergarmik Gûdeungitut kivgartulauᴋpase.
9Mânale Gûde illitarigapsiuk, piluartomigle Gûdemut illitarijaugapse, sôᴋ sanguvigilerᴋisigîk ilusit ipkoa sangêtut ajulertullo, nutâmik kivgartoromavlugît?
10Uvlut, taᴋᴋillo, neliutullo, jârillo uvloᴋsiorutigivase (Jûdititut).
11Sivôratigivapse sulinanga senavigilaurasugiluse?
12Katangutikka, ᴋenuvigivapse: Uvaptun-iniaritse, ilipsituninama. Idluitulivigilaungilapsinga.
13Kaujimavapsingale, oᴋautsinik tussarnertunik oᴋâlatainalaurama ilipsingnut uvinipkut sangêtunga.
14Ajaktornangalo nachogilaungilapsinga, uvinipkut ôktortaugama, Gûdible Engelingatut illaliulauᴋpapsinga Kristuse Jêsusetut aglât.
15Taipsomane angijomik piloridlalauᴋpose! oᴋautigijungnarpapse imâk: ajornalaungipat ijise aglât pêjarlugit, uvamnut tunitiginajalauᴋpase.
16Tagva tamanna pivlugo ômigilerpisingâ, okpernartomik oᴋarvigigapsê?
17Ipkoa ilungertûtigivâse idluangitomigle; tunutserᴋojomavluse uvamnik, ilungertorᴋojomavluselo taipkoa ungagilerlugit.
18Ilungertorneᴋ idluarpoᴋ, ajungitoᴋ pivlugo pitsainarpat, najortigigupsinga kissiane pingipat.
19Kitorngârsukka, ama kappiaktoadlarlunga erniliarijakka, Kristusib adsinganik ilumertautsiarivluse.
20Tussudlarpungale najoromavluse mâna, assianiglo oᴋauseᴋarungnarlunga; nakimarnijutigigapse.
21Oᴋautisinga, perᴋojanik kivgartoromajose, perᴋojat oᴋausertanginik tussalaungilasê?
22Aglaksimangmat, Abrahâ maggungnik erneᴋalaungmat; aipanga arnamit kivgaujomit, aipâle arnamit kivgaungitomit.
23Arnable kivgaujub erninga uviningmit erniangovoᴋ; kivgaungituble erninga angersimanermut erniangovoᴋ.
24Tamakkoa oᴋautsit adsigêgutiksauvut. Tâpkonunga (taijaungmanik) Testamentik magguk; aipâ ᴋaᴋᴋamit Sinaimit pijoᴋ, kivgartortuksanik ernilijoᴋ; tagva Hagar.
25Kaᴋᴋaᴋ Sinai Arabiamêngmat; tâpsomale (Hagarib) Jerusalem neliunerme tamattomanêtoᴋ adsigigivâ, kivgaujoᴋ ᴋitorngane illagivlugit.
26Jerusalemele pânêtoᴋ, tâmna kivgaungitoᴋ; tamapta tâmna anânagivavut.
27Aglaksimangmat: Kitorngisuitotit, ernisuitotit opigosugit, singaingitotit erᴋiertorlutit iggiaᴋomijârit! Aipaᴋarungnairtoᴋ ᴋitorngaᴋarnersaungmat aipaᴋartomit. #Jes. 54:1.
28Uvagulle, ᴋatangutikka, angersimanerub ᴋitorngarivâtigut, sorlo Isaaᴋ.
29Sorlole taipsomane uviningmit erniojub unangmidlarmago Anernermit erniangojoᴋ, mânatauᴋ taimainivoᴋ.
30Aglaille ᴋanoᴋ pivât? (Imâk:) Kivgaᴋ taimna erningalo ᴋenugikik, kivgab taipsoma erningata kingormgujiᴋatigijaksaringimago ernera Isaaᴋ. #Gen. 21:10.
31Tagva ᴋatangutikka, arnab kivgaujub ᴋitorngaringilâtigut, kivgaungituble.
Currently Selected:
Galâtsiamiunut 4: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
