Amos 2
2
1Imâk oᴋarpok Nâlegak: Idluitulinerit pingasut sitamallônêt pivlugit Moabe pidlartautailititsomângilara; Edomib ataningata sauningit ôngmagit maggalerijutiksangorlugit;
2Ikomamigle tilikleromavunga Moabemut, nungutsilârporlo Keriotib igloksoanginik; Moabelo toᴋolârpok pikablâdlartoᴋartilugo, ᴋaggudlartoᴋartilugolo, tiptulausijartoᴋartilugolo;
3Idluarsaijorlo pêjaromavara akornganit, angajoᴋâksoangillo tamaita toᴋotsomavakka tâmna ilagilugo, oᴋarpok Nâlegak.
4Imâk oᴋarpok Nâlegak: Idluitulinerit pingasut sitamallônêt pivlugit Jûda pidlartautailititsomângilara; Nâlekab perᴋojangit iperarmagit, tâpsomalo maligaksauᴋojangit malilungimagit, saglonermigle, atâtangita piniarnerilauktanginik malignermingnut tamartitaungmatta;
5Ikomamigle tilikleromavunga Jûdamut, nungutsilârporlo Jerusalemib igloksoanginik.
6Imâk oᴋarpok Nâlegak; Idluitulinerit pingasut sitamallônêt pivlugit Israêl pidlartautailititsomângilara; idluartut aulaingmagit silberemut, ajoksartullo kamiksiniutigilugit;
7Anernârsulivullo nunab saningit aklujut niaᴋunginêtok pijomavlugo, sinaungaitullo apᴋutingat sangutipât; angut atâtangalo tutingnikpuk uigasungmik tâpsomingatsainak, attera ivsornaitok naggonartitsomavlugo;
8Tunerguservit ilûnatik saningine inangavigivait annorât tauksiutiksaujut, gudingoarmiglo iglungane vainetorput pidlartaujut akkiliutânik.
9Sivurânginele Amoriterit nungulaukpakka, tâpkoa napârtotut Sideretut poᴋtotigilaukput, sôngotigilutiglo napârtotut sitijuksajatut; paungangille asserolaukpakka pângat, amângillo unangat.
10Majorartilaukpapselo nunamit Egiptenemit, inuᴋajuitokullo tesiolaukpapse jârit 40 nâvlugit, Amoriterit nunangat perᴋutigilugo piᴋovluse.
11Ernipselo ilangit nalautaijungortilaukpakka, inosuktupselo ilangit Gûdemut ingmiᴋôrtitangordlugit. Taimaingilâk, ilipse ᴋitorngaujose Israêlemût?
12Gûdemulle ingmiᴋôrtitat vainetortilaukpase; nalautaijulle inerterpase, oᴋarluse: Nalautainiarase.
13Ahâk, nênertoromârpapse inigijapsingne, sorlo ᴋamutîk aksaloalîk sanaugaksanik ᴋapitanik usidlartuk nênertaungmanik.
14Sukalisôngojorle assiojilârpok sukalinerminik, pitsartujorlo nukkiksainiarungnaipok nukkiminik, sôngojorlo piuliniangilak nangminerminik;
15Pitiksimiglo atorpaktok nangerungnarniangilak; sukalidlartomiglo aᴋpangertok piuliniangilak nangminerminik; horsemelônêt ikimajok piuliniangilak nangminerminik;
16ᴋoaksângaitorlo sôngojut akorngane usingavlune ᴋemâlârpok uvlorme tâpsomane, oᴋarpok Nâlegak.
Currently Selected:
Amos 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
