Apostelit Piniarningit 7
7
Stefanusib toᴋotauninganik ujarᴋanut milortauvlune.
1Tagva ajoᴋertuinerojok oᴋarpok: Tamanna taimaikâ?
2Oᴋarporle Stefanuse: Angutiojose, ᴋatangutigêktose atâtaujoselo, nâlagitse! Gûde ânanaujotuak takotipok ingminik atâtaptingnut Abrahamut, sule Mesopotâmiamêtilugo, Haraneme nunaᴋalauᴋârtinago.
3Oᴋautilâllo: Aularit nunagijarnit ilangnillo, ailerillo nunamut unertôtigijomârtamnut ilingnut.
4Tagva Kaldêamiut nunanganit aularpok, Haranemelo nunaᴋalerdlune. Atâtangalo toᴋolaungmat, tagvangat aulartinivâ nunamut tâpsomunga, nunagijapsingnut mâna.
5Tagvanelo nunamik nangminerijaksanganik tunitjivigingilâ, tumitut siliktigijomiglônêt, angervigivâlo tunijomârlugo tapsomunga kinguvâksanginullo kingorngane, sule ᴋitorngaᴋarᴋârtinago.
6Gûdele oᴋalaukpok imâk: kinguvâksatit takorngartaujomârput nuname perᴋutigingitamingne, taikanelo kipalôtitaujomârput kappiasuktitaujomârlutiglo jârit 400 it nâvlugit;
7Inuille tâpkua kipalugijomârtingit erᴋartoromavakka, Gûde oᴋalaukpok; kingorngagullo aularomârput, tamânelo kivgartoromârpânga.
8Kipinermiglo angeᴋatigêngnerub nalunaikutanganik atorᴋovâ. Isaarlo ernetârigamiuk, uvlut sitamaujungane kipivâ. Isaablo ernetâriva Jâko, Jâkoblo ernetârivait atâtaunerpaujut 12 it.
9Atâtaunerpaujullo Jôsefe idluigivât, Egiptenemullo niorvgotigilugo; Gûdible ilagivâ,
10Piulivlugolo kappiasungninginit tamainit, saimartilâllo silatutipâ Faraub Egiptenemiut ataningata sângane; tâpsoma angajoᴋângortipâ Egiptenemiunut, iglominêtunullo ilûnainut.
11kângnartoksoaᴋalerporle Egipteneme ilûnâne, Kanaanemelo, kappiasuvaksoadlarpullo, atâtagijavullo nerᴋiksamik nagvâlaungilat.
12Jâkoble tusarame, ᴋakᴋôjaksanik pisiaksaᴋarmat Egipteneme, atâtagijavut tilivait sivorlerpâmik.
13Aipânigle pigamik, Jôsefe ilitarijaulerpok angajungminut, Jôsefiblo ilagasangit ᴋaujijaulerivut Faraomut.
14Jôsefible tiliklerlune atâtane Jâko aijauᴋovâ, ilanelo ilûnaita 75 iojut.
15Jâkolo Egiptenemut atersârpok, tagvanelo toᴋovok, tâmna atâtagijavullo,
16Siᴋememullo âtaulaukput ilijauvlutiglo iluvermut, Abrahab pisiarilauktanganut kênaujanut, Hemorib, Siᴋemib atâtangata, ᴋitornganginit.
17Gûdible Abrahamut angersimaningata nalautsivia ᴋaglilermat, inuit aglisikput unuksivalliavlutiglo Egipteneme.
18Asianiglo atanitârput, Jôsefemik ᴋaujimangitomik.
19Tâpsoma uivêtôvlune ilaptingnut, atâtagijavut kappiasuktipait, nutaranginiglo egitautitsivok, inôᴋojomanagit.
20Taipsomane Môsese inûlerpok, nutarârsôvlunelo pinnarnartoᴋ Gûdib sângane, takᴋiniglo pingasunik atâtangata iglungane amâmaktitaulaukpok.
21Ilijaulermalle (kôngmut), Faraub paningata ilaliulaukpâ inugoilerdlugolo erniksarijomagamiuk.
22Môseselo ajoᴋertortaulerpok Egiptenemiut ilisimaninginik tamainik, pitsartudlalilarmelo oᴋautsinik piniarnerniglo.
23Jâreᴋaleramele 40 nik, isumaᴋalerpok ᴋatangutine takojomavlugit, Israêlib ᴋitorngangit.
24Tâpkoa ilangat takogamiuk, akᴋunartaungmat, saputivâ akkiniarlugo kappiasuktitaujok, Egiptenemiorle annauvâ toᴋodlugole.
25Katangutinele tukisiniarasugivait, Gûdib piulijomangmagit tâpsoma aggangitigut; tukisilaungilâlle.
26Kaungmallo tikidlugit, maggok aivalertuk takogamigik, sorairᴋolerpak oᴋarlunelo: Nagliktâkka angutik, ᴋatangutigêkpotik; sôk iliptingnut idluitomik pivitîk?
27Aipaminulle idluitomik pijub ajakpâ oᴋarlunelo: kia ataniotilaukpâtît erᴋartuijuksautilarpillo uvaptingnîk?
28Toᴋotsomavingatauk, sorlo ikpaksak Egiptenemiok toᴋolaurangnê?
29Oᴋautsille tamakkoa pitjutigilugit Môsese ᴋemavok takorngartaulerlunelo Midianib nunangane; tagvane ernetâlerpok maggungnik.
30Jârillo 40 it nângmatta, Nâlekab Engelinga takotipok tâpsomunga inuᴋajuitome, ᴋakᴋame Sinaime, ikomame napârtunêtome.
31Môsesible tamanna takogamiuk, takotitak tamanna tataminiarivâ. Ulernairiartormagole, Nâlekab nipingata pivâ:
32Atâtagijavît Gûdigivânga, Abrahab Gûdigivânga, Isaablo Gûdigivânga, Jâkoblo Gûdigivânga. Môsesele sajulerpok, takosarnerlo saperpâ.
33Nâlekable oᴋautivâ: Itigagutîkik itigangnit pêkik, nuna tullerartat ivjornaingmat.
34Inuᴋotima Egiptenemêtut kappiasungningit takogapkit, anersauminingillo tusalaurapkit, akᴋarpunga piulijartoromavlugit. Mânalo ᴋailerit, Egiptenemut tilijomagapkit.
35Môsese taimna, nâlegomangitangat, oᴋaramik: kia ataniotilaukpâtît erᴋartuijuksautilarpillo uvaptingnîk? tâmna Gûdib tilivâ, atanioᴋovlugo piuliklerteoᴋovlugolo Engelib aggangitigut, tapsomunga takotitub napârtune.
36Tâpsoma aulartipait, piniarlunelo tatamnartunik nalunaikutaniglo Egipteneme, imarbingmelo aupaluktame, inuᴋajuitomelo jârit 40 it nâvlugit.
37Tâmnauvok Môsese, Israêlib ᴋitornganginut oᴋalauktok: Nâlekab Gûdipse nalautaijomik tunitjivigijomârpâse ᴋatangutipsingnit, uvaptun-itomik; tâmna tusâgôraksarivase.
38Tâmnauvok ilagêktunêlauktok inuᴋajuitome, Engele ᴋakᴋame Sinaime oᴋautjine ilagivlugo, atâtagijavullo ilagivlugit; tâmna oᴋautsinik ômanartunik pititaujok, tunitjivioᴋovluta.
39Tâmna atâtagijapse nâlegomangilât, ajaktorlugole pivât, ômatimikullo mumikput Egiptenemut,
40Oᴋarlutiglo Aronemut: Gûdiksaptingnik sanajoᴋarle, sivorliksaptingnik, Môsese imna Egiptenemit aularutjijigilauktavut ᴋanoelingangmangât nalogaptigo.
41Uvlunelo taipkonane nochangoaliorput tunergutiksaniglo ᴋaitsivut Gûdeungitomut, aggangmiglo sanajangit ᴋuviasûtigivait.
42Gûdible allarpait, tunilaitalo kivgartorᴋovlugit ᴋilaub uvlorianginik, aglaksimangmat nelautaijut aglangine imâk: Ilipse Israêlib kinguvângit, tunergutiksanik, nergjutiniglo toᴋotaksanik Jârine 40 ne inuᴋajuitome tunitjivigilaukpisingâ?
43Môlochiblo tupinga pivase, Gûdipselo Remfanib uvloriangit, arngoase sanalauktase tuksiarvigijomavlugit; tamanna pivlugo nûtitsomavapse Babilonib ungatânut.
44Tupek perᴋojaktalik atâtagijaptingnêlaukpok inuᴋajuitome; taimâk (Gûdib) perᴋungmagit, Môsese adsilioraksak takolauktane adsilivlugo perᴋogamiuk.
45Atâtagijaptalo, (tupermik) tamattominga pititaujut, Jôsua ilagilugo naksarpât nunamut (Kanaanemut), nalojut pigijanganut, Gûdib pingujadlartangita atâtagijapta kênanginit, Dâvidib naliuninga tikidlugo.
46Tâmna Gûdemut saimarviolaukpok, ᴋenuvigivâlo igloliorᴋojaujomavlune Jâkob Gûdinganut.
47Salomoble igluksoanga sanavâ.
48Kotsingnerpângojuble inigingilait katimaviksuit aggangnut sanamajut, sorlo nalautaijok oᴋarmat:
49Kilak iksivautarivara, nunalo itikama ikkoggarivât; sunamik uvamnut iglolioromavisê? Nâlegak oᴋarpok; nanelônêt merngoerserviksamnîk?
50Makoa tamaita aggama sanalaungilagît?
51Tapatojoksôjose kipimangitoselo ômatipsigut siutipsigullo, akkerartutsainarpase Anernek ajunginek. Atâtagijapsitut ilipsetauk taimailiorivose.
52Nalautaijut nalît atâtagijapsingnut unangmijaulaungilât, toᴋotaulaungilâllô? Sivorngagut oᴋâlalauktut idluartub tâpsoma tikitsomârninganik! mâna tâpsominga pititsijungolaurivose inuartungolapselo.
53Perᴋojat pivase Engelit pititsiningitigut nâlengnagillo.
54Tamanna tusaramitsuk, ômateroktauvut, nêrᴋolârtsivlutiglo tâpsomunga.
55Stefanusele Anernermik ajunginermik angijomik ilumertaugame, ᴋilangmut ârlorpok, takolugolo Gûdib ânanauninga, Jêsuselo Gûdib talerpiane nangertok.
56Oᴋarporlo: Ahâk, ᴋilak angmajok takovara, Inûblo Erninga nangertok Gûdib talerpiane.
57Nipliadlalerpulle siutitik mattuvlugit, atautsikullo sorsugvigijartorpât.
58Pingujarlugo iglugasaksoarnit, milulâllo ujarᴋanut. Pasiklertullo annorâtik ilivait inôsuktub itigangita sânganut, Saulusemik atiliub.
59Stefanuselo ujarᴋanut milorpât, tuksiartok oᴋarlunelo: Nâlegak Jêsuse, anernera piuk!
60Sêrᴋortolerporle nipliadlarlunelo: Nâlegak idluitulininganit tamattomangat isumagijungnairvigikit! Tamattomingalo oᴋarêrame sinisilerpok.
Currently Selected:
Apostelit Piniarningit 7: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
