Apostelit Piniarningit 6
6
Tunergutinik aulatsijut anerijauninginik. Stefanusib pasijauninganik.
1Uvlunele taipkonane ilinniartut unugannermatta, Grîkit avamudlarput Ebrêerinut uigarnitik pivlugit, isumagingimagit ajortanginik uvlut tamaita.
2Tagva 12 it ilinniartigasaksuit katerᴋolerpait oᴋautivlugillo: Idluangilak, Gûdib oᴋausingit kamagingikuptigik, kivgartorlutalo nerrimârtunik.
3Taimaimat, erdlingnartose ᴋatangutigêt, angutinik 7 nik ᴋenilauritse akunapsingne, idluartoᴋutaujunik Anernermiglo ajunginermik silatunermiglo ilumertaujunik, kivgartorᴋojaksaptingnik tamattomunga.
4Uvagulle sorairata tuksiarlutalo oᴋâlajomavogut oᴋautsinik tusarnertunik.
5katimajullo oᴋautsit tamakkoa idluarivait; Stefanuselo anerivât, angut okpernermik Anernermiglo ajunginermik ilumertaujoᴋ, Filippuselo, Proᴋôruselo, Nikânorlo, Tîmonelo, Parmênaselo, Nikolauselo Jûdioᴋataujoᴋ Antiochiamit.
6Tâpkoa Apostelit sânganut pitipait, tuksiarlutiglo aggangmingnullo patingmivlugit.
7Gûdiblo oᴋausingit aglivalliavut, ilinniartullo unuktoksôlerput Jerusaleme; ajoᴋertuijuttauk unuktut okpilerlutik nâlakput.
8Stefanusele okpernermik pitsartunermiglo angijomik ilumertauvlune tatamnartulivok nalunaikutaksoarniglo pivoᴋ inungne.
9Tagva ilangit sakᴋerput katimavingmit, taijamit Libertinerit, Zirênemiullo, Aleksandriamiullo, Ziliziamiullo Asiamiullo katimavinganik, Stefanuselo apersoᴋatigivât.
10Sillatuningalo anernerlo oᴋâlajutigijanga akkerartorungnangilaᴋit.
11Tagva angutit ilangit ajoᴋertorlugit oᴋarᴋovait imâk: Tusalaukpavut oᴋauserluktok Môsesemullo Gûdemullo.
12Inuillo pikablâtipait, angajoᴋâllo, aglangniglo ilisimajut; tikidlugo tassigoarpât, kiglisiniartunullo âpât.
13Saglotujoksoarniglo sakᴋertitsivut oᴋâlajunik: Inuk inna soraingilak oᴋauserlungnik oᴋarlune iglugasaksoarnut ivjornaitunut makkonunga, perᴋojanullo.
14Tusalauraptigo oᴋartok: Jêsusib Nazaremiub aseroromârpait iglugasaksuit makoa, ilusillo ablatsautilugit, Môsesib perᴋojangit uvaptingnut.
15Takunârpâllo kiglisiniarvingme iksivajut ilûnatik kênangalo takovât, sorlo Engelib kênangatut.
Currently Selected:
Apostelit Piniarningit 6: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
