Apostelit Piniarningit 5
5
Ananîasib Safîrablo tuavitomik toᴋonîgingnik. Apostelit parngnanairsimavingmit tatamnartomik anititauninganik. Gamaliêlib tiliorininganik.
1Angutible Ananîasemik atiliub, nuliane Safîra ilagilugo, perᴋutine niorvgotigivait,
2Akingitalo kênaujat ilangit angiarivait, nuliane ᴋaujimatilugo, ilainangille ᴋaipait ilivlugillo Apostelit itiganginut.
3Pêtrusele oᴋarpok: Ananîase, sôk Sâtanasib ômatit ilumertipaûk, Anerneᴋ ajunginek sagloᴋidlarangne, perorsêviub akingita ilangit angiarilugît?
4Perorsêvigigangne, perᴋutigilaungipiûk? pisiarijaungmallo, akkingatauk ilingnut perᴋutiksaulaungilâᴋ? sôk ômatingne taimâk isumalauᴋêt? Inungnik sagloᴋitsingilatit Gûdemigle.
5Ananîasible oᴋautsit tamakkoa tusaramigit, ochovok anerneᴋarungnairlunelo. Tamattomingalo tusartut angijomik erksivut.
6Inôsuktulle angutit nikovidlutik imuserpât, anilâllo iluverlugolo.
7Kingorngagûlermallo, stundit pingasut kingorngatigut, nulianga iterpok, nalovlune ᴋanoetoᴋalernermangât.
8Pêtrusible oᴋautivâ: Oᴋautilaunga, perorsêvik taimâk akkitutigijomik niorvgutiginerpitikkô? kiovâ: Ahaila, taimâk akkeᴋalaukpok.
9Pêtrusible oᴋautivâ: Sôk adsigêktomik isumaᴋarpitîk Nâlekab Anerninga ôktoromavlugô? Ahâk uingnik iluversijut itigangit upkuab silatânêput, igvittauk aniniarivâtit.
10Tagvainarlo itiganginut ochovok anerneᴋarungnairlunelo. Tagva inôsuktut angutit iterput, toᴋungajorlo naipipât, anidlugolo iluverpât uingata sanianut.
11Ilagêktullo ilûnatik angijomik erksilerput, tusartullo tamattominga ilûnatik.
12Apostelille aggangitigut unuktunik nalunaikutanik tatamnartuniglo pijoᴋalaukpok inungne, ilûnatiglo adsigêktomik isumaᴋaᴋatigêklutik Salomob iglorusinganêput.
13Asingitale najorlugit sivôragivait, inuille opigivait.
14Nâlekamulle okpilertut unuksivalliavut, angutillo arnallo unuktoksuit.
15Kanimajut aglât apᴋosineâlungnut anipait, aumitinullo akkigautinullo ilivait, Pêtrusib sanarᴋokpagit, tachanganut ilangit tâktauᴋovlugit.
16Inugiartoksuittauk iglugasaksoarnit erkânêtunit Jerusalemut pivut, ᴋanimajullo, anernernullo maggojungnartunut kappiasuktitaujut tikiupait, ilûnatiglo âᴋiktauvut.
17Ajoᴋertuinerojorle nikovipok, ilagijangillo ilûnatik Saduzêeriojut ningarosulerlutiglo.
18Apostelillo tiguvait, parngnanairsimavingmullo pitilugit.
19Nâlekable Engelingata parngnanairsimaviub upkuanga angmarpâ unnuame, anitilugillo oᴋarpok:
20Aileritse, sakᴋerluselo katimaviksoarme, oᴋautsiniglo ômanartunik ukuninga tamainik oᴋâlatitse inungnut.
21Tamanna tusaramitsuk uvlârorlutik katimaviksoarmut ajoᴋertuijartorput. Ajoᴋertuinerojuble ilagijangitalo ᴋailutik katimaᴋolerpait kiglisiniarpaktut Israêliblo ᴋitorngangita angajoᴋângit tamaita, parngnanairsimavingmullo tiliklerput aijauᴋovlugit tâpkoa.
22Kivgalle tagvunga pigamik parngnanairsimavingmêlauktut kingorarpait; angergarivut tâva unipkâriartorlutik,
23Oᴋarpullo: Parngnanairsimavik naipigalloarpavut palangairsimatsiartok, udjertortullo silatânêtut; upkuêraptigole inuksingilagut.
24Ajoᴋertuinerojuble, katimaviksoarmelo aulatsijub, ajoᴋertuijoksuillo oᴋautsit tamakkoa tusaramigit, ᴋoaksângalerput, ᴋanok tamanna ilinganiarmangât.
25Tagva unipkâriartortoᴋarpok tâpkonunga imâk: Ahâk, angutit parngnanairsimavingmut pitilauktase katimaviksoarmêput, nangerlutiglo inuit ajoᴋertorpait.
26Tagva aulatsijub kivgane ilagilugit pijartorpait, aksorornagille, inuit sivôragigamigit, ujarᴋanut milortauniarasugilutik.
27Tikiutigamigillo, kiglisiniartunut pitipait. Ajoᴋertuinerojublo apersorpait,
28Oᴋarlunelo: Inertilaungilapsê ilungertorluta, ajoᴋertuerᴋonase tâpsoma atinganê? Ahâglo, ilipse Jerusalemiut ilumertipase ajoᴋertûtipsingnut tamattomunga, inûblo tâpsoma aunga uvaptingnut pititsomavase.
29Pêtrusible kiovait Apostelillo oᴋarput: Gûde nâlengnarnersauvoᴋ inungnit.
30Atâtagijapta Gûdingata Jêsuse makitilaukpâ, toᴋolauktase nivingalauktaselo ᴋejungmut.
31Tâmna Gûdib talerpingmigut Nâlegangortilaukpâ piuliklertungortilâllo, Israêlitit ᴋaᴋialerneᴋartitauᴋovlugit isumangnarungnaitoᴋartitauᴋovlugillo ajortunit.
32Uvagullo, Anernerlo ajunginek, Gûdib tunilauktanga nâlektiminut kigligiudsijôvogut oᴋautsit tamakkoa pivlugit.
33Tamanna tusaramitsuk, ômateroktauvut, toᴋotsomavlugillo isumalerput.
34Tagvale Farisêerit ilangat nikovipok kiglisiniartut akorngane, Gamaliêlemik atilik, aglangnik ilisimajok, inuit ilûnatik opigijangat; tâpsoma Apostelit anikitomik anititauᴋovait.
35Oᴋautivaillo: Ilipse angutit Israêlitiojose udjertoritse nangminipsingnik inuit ukua pivlugit, ᴋanok piniaromangmangâpsigik.
36Uvlut tamakkoa sivorngatigut Tiudase sakᴋerpok, ingminiglo pimariuterlune, angutigasaksuillo 400 it taimna ungagivât; taimna toᴋotauvok maliktullo taipsominga ilûnatik siamardlutik nungutauvut.
37Taipsoma kingorngagut Jûdase Galilêamiok sakᴋerivok, uvlut (inungnik) aglaktauvît naliutingmatta; taipsoma inuit unuktoksuit uivêrivlugit ilagivait; taimnatauk nungutaugivok, ilûnatiglo maliktut taipsominga siamartitauvut.
38Mânalo oᴋautivapse: Inuit ukua allarsigik, aularlit! Oᴋautsit piniarnerillo ukua inungnit pituinarunik, nungujomârput;
39Gûdemille pikpatta, aserorlugit ajorpase; Gûdemut akkerartoromajutitut naipitauᴋonase.
40Nâlekpât tagva, Apostelillo ᴋaiᴋovait isaᴋalaitalo, inerterlugillo Jêsusib atingane oᴋarᴋonagit, aularᴋovaillo.
41Kuviasuklutigle tagva kiglisiniartut kênanginit aularput, nikagijaunginamik mitautigijauvlutik Jêsusib atinga pivlugo.
42Sorairatiglo ajoᴋertuivut uvlut tamaita katimaviksoarme iglullo nallîne, oᴋautigilugillo oᴋautsit tusarnertut Jêsuse Kristusemik.
Currently Selected:
Apostelit Piniarningit 5: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
