Apostelit Piniarningit 3

Angutib sibvêtub âᴋiktauninganik Pêtrusemut Johannesemullo. Pêtrusib oᴋâlaninganik ᴋaᴋialerᴋojijomik.

1Pêtrusele Johanneselo majoraᴋatigêkpuk katimaviksoarmut, stundit 9 ingane, tuksiarviovaktok naliutitilugo.

2Anguteᴋalaukporlo sibvêtomik nutaraunerminit; tâmna akkigarlugo uvlut tamaita ilivât katimaviksûb itertarviata pinnarnartomik taijaujub kiglinganut, katimaviksoarmut iteriartortunik ᴋenuveᴋarᴋovlugo tunergumik.

3Tâpsoma Pêtruselo Johanneselo katimaviksoarmut iteromajuk takogamigik, ᴋenuvigivak tunergumik.

4Pêtrusible Johannesiblo takunarpâk oᴋarlutiglo: Takusartiguk!

5Takusarpak tagva, sumik tunitjivioniarasugailune.

6Pêtrusele oᴋarpok: Silberemik goldemiglônêt peᴋangilanga, pigijamnigle tunitjivigivagit: Jêsusib Kristusib Nazaremiub atingane nikovilutillo pisugit!

7Talerpiagullo tiguvlugo nikovitipâ. Tagvainak niûgik kanâgiglo nukeᴋalerput.

8Kigilaukpok, nangerungnarlarmelo pisugungnarlunelo, katimaviksoarmullo ilagilugik iterpok, arvertarlunelo ᴋigertarlarmelo Gûde nakoridlarpâ.

9Inuillo ilûnatik pisuktok Gûdemiglo nertordlertok takovât.

10Ilitarivâttauᴋ, taimnaungmat katimaviksûb itertarviata pinnarnartub kiglingane iksivalauktok, tunergumik ᴋenuvlune; taimailiorviongmat ᴋoaksângalarmiglo tataminiadlarput.

11Pisujuitôlauktub, mânale pijungnairtub, Pêtruselo Johanneselo najugaringmagik, inuit ilûnatik aᴋpangerdlutik nalipsarpait Salomob iglorosinganik taijamut, tataminiarlarmiglo.

12Pêtrusib takogamigit, inuit oᴋautivait: ilipse angutit Isrâelitiajose, soᴋ tamattominga tataminiarᴋisê? Sôlo uvaptingnik tikunârkisê, uvaguk pisuktitsinasugilunuk ôminga, pitsartuniptingnut piniarniptingnullo nangminerijaptingnût?

13Abrahab Isaablo Jâkoblo Gûdingata, atâtagijapta Gûdingata, ᴋitorngane Jêsuse ânanausitilaukpâ, unertujutigilauktase misiarutigilauktaselo Pilatusemut, taipsoma aularᴋojomagalloarmago.

14Ilipsele ajungitotuaᴋ idluartotuarlo misiarutigilaukpase, tuksiarluselo inuartok pijomavlugo;

15Inôtsible Nâleganga toᴋolaukpase; tâmna Gûdib tupaktilaukpâ toᴋungajunit, uvagut tamattominga kigligiutsijiovogut.

16Okpernermullo tâpsoma atinganut, tâpsoma atingata nakoksitilaukpâ una takojase ilitarijaselo; okperamelo tunitjiviovoᴋ ᴋanoengitsiarnermik mattominga, ijipse sângane.

17Tagva ᴋatangutikka, ᴋaujimavunga, nalomut taimailiulaurapse, taimaktauk angajoᴋâse.

18Gûdible nalautaijut ilûnatik ᴋaningitigut sivorngagut oᴋautigilauktane, tagva Kristusib âniatitaujuksauninga, nalautsimatipâ.

19Tagva mâna ᴋaᴋialeritse sâgiarluselo, ajornise pêjartauᴋovlugit.

20Uvlut nakoksijauviksat naliutilerᴋovlugit Nâlekab kênanganit, tâmna tilijomârpago, sivorngagut oᴋautigijaujok ilipsingnut, Jêsuse Kristuse.

21Tâmna iteriaᴋalaukpok ᴋilangmut, naliunek tikidlugo, tamaita nâmaksititauvingat, Gûdib oᴋautigilauktangita nalautaijut ilûnatik ᴋaningitigut silaksûb pigiarninganit.

22Môsese oᴋalaungmat atâtagijaptingnut: Nâlekab Gûdipse tunitijivigijomârpâse nalautaijomik ᴋatangutipsingnit uvaptunitomik; tâpsoma oᴋausingit ilipsingnut tusagôaksarivase tamaita.

23Imaitsomârporlo, naliat tâpsominga nalautaijomik tusagôngitok pêrtaujomârpok inuᴋatigênit.

24Nalautaijullo ilûnatik Samuêlemit kingornganelo oᴋâlalauktut ilûnatik, uvlut tamakkoa sivorngagut oᴋautigilaukpait.

25Nalautaijut angersimanerublo ᴋitorngarivâse, Gûdib pilauktangata atâtagijapsingnut, Abrahamut oᴋalaurame: kinguvâksarnut inuᴋatigêksuit ilûnamatsiatik saimartitaujomârput.

26Sivorlermik ilipse pivluse Gûdib ᴋitorngane Jêsuse tupaktilaukpâ, tililaukpâlo ilipsingnut, saimartitauᴋovluse, ilûnase atunit sâgiarᴋovluse idluitulinipsingnit.

Currently Selected:

Apostelit Piniarningit 3: LIHB08

Highlight

Copy