Apostelit Piniarningit 2

Anernerub ajunginerub kovijauninganik Apostelinut Penteᴋosteme Pêtrusib oᴋâlaninganik.

1Penteᴋostiblo uvlunga naliutingmat, ilûnatik, adsigêktomik isumaᴋarlutik katimalaukput.

2Tagvainarlo suluksuksoaᴋarpok ᴋilangmit pijomik, sorlo akᴋunarsoarmit pilune, iglolo ilûnât tâpkoa najortangat tattatauvok mattomunga.

3Tâpkonungalo sakᴋertoᴋarpok ikomârsutitut ingmikoartitut oᴋartitut ᴋoblorsimajutitut-itunik, ilûnaitalo atunit tupvigilerpait.

4Ilûnatiglo ilumertaulerput Anernermik ajunginermik, oᴋâladlalerpullo oᴋautsinut tusarngartanut, sorlo Anernerub oᴋâlajungnartingmagit.

5Jûdeᴋalaukporlo Jerusaleme igloᴋartunik, angutinik Gûdemik nâlektunik, inuᴋatigênit sunatuinarnit ᴋilaub atânêtunit.

6Suluksuksoak tamana tusaramitsuk, unuktoksuit katilerput ᴋoaksângadlarlutik, ilûnatik oᴋauserivaktatik tâpkonunga atortaujut tusaramigit.

7Ilûnamatsiatigle kakilâdlarput, tataminiarlutik, oᴋaᴋatigêklutiglo: Ahâk, ukkua oᴋâlajut ilûnatik Galilêamiungilât?

8Kanok ilingavâ, ilûnata ingmikôrluta oᴋauserivaktavut inûlerniptingnit tusaraptigîk?

9Parterillo, Mêderillo, Elamiterillo, uvagullo nunaᴋartogut Mesopotamiame, Jûdêamelo Kappadôtsiamelo, Pontusemelo, Asiamelo,

10Frîgiamelo, Pamfîliamelo, Egiptenemelo, Lîbiablo erkânêtune, Zirênib saniane, Rômiullo takkorngartat,

11Jûdillo, Jûdioᴋataujullo, Krêtamiullo, Arâbiamiullo, ilûnata tusarpavut oᴋartut Gûdib tatamnartulininginik, oᴋausivut atorlugit.

12Ilûnatik tâva kakilâdlarput, uimamadlarlarmiglo, oᴋaᴋatigêkpullo: ᴋanoᴋ tamanna ilinganiarᴋâ?

13Ilangille mitaklutik oᴋalulerput: Mamarnermik vainemik imersimavut.

14Tagva Pêtruse nikovipok 11 it illagilugit, niperᴋortovlunelo oᴋautivait: Ilipse Jûdiojose angutit naglingnartose, ilûnaselo Jerusaleme igloᴋartose, tamanna nalonarungnaititaule ilipsingnut, oᴋausikkalo iterlit siutipsingnut.

15Talangilat tâpkoa talanganasugijase, uvlâk stundinga 9 otuinarmat.

16Tamadjauvok, nalautaijokut Joêlikut oᴋautigijaumajok sivorngagut:

17Uvlut kingordlingine imaitsomârpok, Gûde oᴋarpok: Anernera kovijomavara inungnut ilûnainut; erniselo paniselo nalautsitiksanik oᴋaromârput, inôsuktoselo angutit takotitjutinik tautugomârput, ituselo sinnaktômajomârput.

18Uvlune taipkonane kivgamnut angutinut arnanullo Anernera kovijomavara, nalautsitiksaniglo oᴋaromârput.

19Tatamnartulijomavungalo pikane ᴋilangme, nalunaikutaᴋartitsilungalo atâne nuname, aungmik ikomamiglo iserlûblo pujuanik;

20Seᴋinek ablatsaujomârpok tâksoarmut, takᴋerlo auktunitsomârpok, Nâlekab uvloᴋsoanga naliuterᴋârtinago.

21Imaitsomârpok: Nâlekab atinga tailugo tuksiartoᴋ piulijaujomârpok.

22Ilipse angutit Israêlitiojose, oᴋautsit ukua tusâsigik: Jêsuse Nazaremiok, angut Gûdemit pijoᴋ, sakᴋijâlaukpok akunapsingne piniarnerminut, tatamnartulinerminullo, nalunaikutanullo, Gûdib tamakkoa tâpsomûna piniarnerilaungmagit akunapsingne, ilipsetauk nangminek ᴋaujimagapsetut.

23Tâmna (Gûdib isumasimanerminut pijomajaminullo tunilaungmago) tigulaukpase idluitulijut aggangitigut, kikiaktorlugolo saningajolingmut toᴋodlugolo.

24Tâmna Gûdib makitilaukpâ toᴋub ânianarninganit pêrlugo, ajornavingmat toᴋungatsainarlune.

25Dâvidib oᴋautigingmago: Nâlegak sâmnêtitsainarpara, talerpimnêngmat aulatauᴋonanga.

26Tamanna pivlugo ômatiga ᴋuviasukpok; oᴋaralo serridlarpok, uvinigatauk nerriuklune merngoêrseromârmat.

27Tarniga anernerit ininganetsainarᴋojomânginangne, ajunginerillo (Kristuse) aserorᴋojomânginavat.

28Apᴋosinermik ingôgumut unertulaukparma; kênavît sângane ᴋuviasungnermik ilumertitsomârparma.

29Ilipse angutit ᴋatangutigêt, agviartaunanga atâtagijavut Patriarke Dâvide oᴋautigilago ilipsingnut: Taimna toᴋovlunelo iluvertaulaukpok, iluvingalo uvaptingnêpok sulle uvlome.

30Nalautaijôgame, nalunginamelo, Gûdib sokosijuitomik angervigilaungmago: uviningmit kinguvâksanga (Kristuse) makitsomavlugo, iksivautaksoanganullo iksivaᴋojomavlugo;

31Sivorngagut tamanna takolauramiuk, Kristusib makininga oᴋautigivâ, tarninga anernerit ininganetsainalaungimat, uviningatalo aserornek takolaungimago.

32Jêsuse tâmna Gûdib tupaktilaukpâ; ilûnata tamattominga kigligiutsijeovogut.

33Mâna Gûdib talerpiagut ᴋongmuartitaugame, Atâtablo angersimaninga Anernermik ajunginermik pilauramiuk, tâpsominga tagva kovisilaukpok takojapsingnik tusartapsingniglo.

34Dâvidele ᴋilangmut ᴋongmualaungilak. Oᴋarporle imâk: Nâlegak Nâlekamnut oᴋarpok: Talerpingma tungânut ingitit,

35Omigijingnik ilijerᴋârtinanga itikavît ikkogganganut.

36Tagva mâna Israêlib kinguvângit tamapse ᴋaujimatsialeritse, Gûdib Jêsuse tâmna, kikiaktulauktase saningajolingmut, Nâlegangortilâllo Kristusingortilaungmago.

37Tamannale tusaramitsuk, kibliktaulerput ômatimikut Pêtrusemullo asinginullo Apostelinut oᴋarlutik: Ilipse angutit ᴋatangutigêktose, sumîk piniartuksauvitâ?

38Pêtrusib oᴋautivait: Kaᴋialeritse, baptitaulerluselo ilûnase Jêsusib Kristusib atinganut, ajornerit isumagijaujungnairutiksanginut; Anernerub ajunginerub tunergutânik pilârpose tagva.

39Ilipsingnulle ᴋitorngapsingnullo oᴋautsit ukua ilingavut, ungasiktomêtunullo tamainut, Nâlekab Gûdipta ᴋaiᴋojomârtanginut tamaunga.

40Oᴋautsinulle unuktunut ukua asinginut kigligiutjivigivait, kaiblarlugillo oᴋarpoᴋ: Piulijauniaritse kinguvângoᴋatigênit ukkunangat tapatojunit.

41Oᴋausinginik ᴋuviasuklutik nâlektut, baptitaulerput; uvlormelo taipsomane 3,000 it ilautitaulerput.

42Apostelille ajoᴋertûtinginik nâlatsainalerput, ilagêklutiglo, ᴋakᴋôjaniglo avgoilutik, tuksiaᴋatigêklutiglo.

43Inuittauk ilûnatik kuksasungnermut tikitaulaukput; Apostelitigullo tatamnartunik nalunaikutaᴋsoarniglo unuktunik pijoᴋalerpok.

44Okpertungortitaujulle ilûnatik ilagêksimalaukput, perᴋutitiglo pigilugit katutivait.

45Perᴋutitik pitiglo niorvgotigivait, aitortûtigilaitalo ilûnainut, atunit ajoksarningit isumagilugit.

46Uvlullo tamaita ilagêklutik katimaviksoarmêput, ᴋakᴋôjallo avgorpait iglune tamaine.

47Nerrivullo, Gûdelo nartorpât ᴋuviasuklutik isumalingasuituniglo ômateᴋarlutik, inungnullo ilûnainut ivlerijauvut. Nâlegarle piloriktitaulertunik uvlut tamaita ilautitsivok okpertunut.

Currently Selected:

Apostelit Piniarningit 2: LIHB08

Highlight

Copy