II Korintemiunut 12
12
Tatamnartomik Paulusib takotivioninganik sangêninganiglo. Naglingninganik nelâgôrtomik.
1Nertôtinek atornangigalloarpoᴋ uvamnut, takotitjutille nelonarungnaititaunerillo Nâlekamit pijut oᴋautigijomavakka.
2Inungmik illitarsivunga Kristûsib okpertoᴋotinganik; tâmna jârit 14 it mattoma sivorngagut, (timiminêlaungmangât nelovunga, timiminêlaungimangâllônêt nelovungatauᴋ, Gûdib kissime nelungilâ,) tâmna ᴋilait pingajuanut pititaulauᴋpoᴋ.
3Inuk tâmna illitarivara, (timiminêlaungmangât timiminêlaungimangâllônêt nelovunga, Gûdib nelungilâ).
4Tâmna pititaulauᴋpoᴋ Paradîsemut, tussâvorlo oᴋautsinik oᴋauserijaujungnangitunik, inûb kialônêt oᴋauserijungnangitanginik.
5Taimaitomik nertôtijomavunga, nangminimnigle nertôtijomangilanga, sangênimnik kissianik.
6Nertôtijomagumalo uvamnik, silaitotut ilinganajangilanga; mikseᴋârtomik oᴋarajarama. Tamattomingale pingilanga, idluarnersaunasugiklertoᴋarᴋonago uvamnik, takojaminit tussartaminillo pivlunga.
7Ilingaᴋonangalo pingijaidlarnermut takotitjutit ussornarnartut pivlugit, kaputimik pititsiviovunga uvinipkut, tagva Satanasib tilijanganik sugiartimnik, pingijaidlarᴋonanga.
8Tamanna pivlugo pingasuertorlunga Nâlegaᴋ ᴋenuvigilauᴋpara, ᴋemaktaujomavlunga taipsomunga.
9Oᴋautilauᴋpângalo: Nâpkiningnera nâmagiuk, pitsartunera ajugaᴋangitôngmat sangêtune. Taimaimat sangênera nertôtigijomanersarivara, Kristûsib pitsartuninga ineᴋarᴋovlugo uvamne.
10Taimaimat ᴋuviasukpunga, sangêdlarangama, mitautigijaujarangamalo, ajoᴋsadlarangamalo, unangmijaulerangamalo, kappiasuktitaujarangamalo Kristûse pivlugo. Sangêtarangamale pitsartudlarpunga.
11Silaitôlerpunga nertôtigama uvamnik; taimailiortilauᴋpapsinga. Ilipsingnut nertortaujuksaugalloarama; mingnersaunginama Aposteliojoᴋsoarnit ipkonangat, suksaungikalloarlunga.
12Apostelib nelunaikutangit akunapsingne saᴋᴋijârmatta ila, angijomik ᴋenuersârnermik, nelunaikutanik, tatamnartuniglo, pitsartudlartuniglo piniarnernik illaᴋarlutik.
13Suna pivlugo mingnersauvisê illagênit assipsingnît? Tamanna pivlugo kissiane, piksakka pivlugit oᴋumaititsilaunginama ilipsingnik. Idluitulinimnit tamattomangat issumagijungnaisinga.
14Ahâk pingajuanik tikiniarsinnalerpapse oᴋumaititsijomananga ilipsingnik; pipsingnik pinasuanginama, ilipsingnigle. ᴋitorngat katersoijuksaungimatta perᴋutinik angajoᴋâmingnut, angajoᴋalle ᴋitorngamingnut.
15Uvangale tunijijomavunga ᴋuviasuklunga, tunijaujomavlungalo tarnise pivlugit; angijomik nagligigalloarapse, naglingnikitauvunga.
16Unêlle, (nangminek) oᴋumaitilaungigalloarpapsegôᴋ, pingitsertordlungale terliarluse tigunerpapsegôᴋ (assipkut).
17Ilipsingnut tililauᴋtama illanganullônêt aᴋsârtautitsilauᴋîk ilipsingnîk?
18Tituse kaiblalauᴋpara, ᴋatangutillo ilangat ilauᴋolauᴋpara tâpsomunga. Titûsele aᴋsârnilauᴋâ sumik ilipsingnît? Anernerme atautsime arvertalaungilagût? atauserlo tupjalaungilavût?
19Ama tagva akiorasugivitigût? Oᴋâlavogut Kristûseme Gûdib sângane: tamakkoningale tamainik, nagliktakka, âᴋiktaujutiksapsingnut (pivogut).
20Sivôragama, tikikuma, ilipse pijomajaptut naipinianginapse, uvangalo pijomangitapsitut naipiniarapsinga; akunapsingnêtoᴋarniarmallo akkerartortigêktunik, anerutjijuniglo, ningartuniglo, aivajuniglo, terliaᴋataijuniglo, kiggoijuniglo, piojoridlartuniglo, pikablartuniglo.
21(Sivôravungalo) piuluatangititauniarama pivluse, tikingmiguma, kiksartuksauniarlungalo unuktut idluitulilauᴋtut pivlugit, ᴋaᴋialilaungitullo maᴋojungnartulinerilauᴋtatik, assiniarnerilauᴋtatiglo illoᴋeudlarnerilautatiglo pivlugit.
Currently Selected:
II Korintemiunut 12: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
