I Timôteusemut 1
1
Timôteuse kivgartutsiariaᴋarninganik erᴋaititauvok, soᴋosijuidlune oᴋautsit tussarnertut ilaᴋangitut atavigilugit.
1Pauluse Jêsusib Kristûsib Apostelinga, Gûdib piulijipta, Nâlekablo Jêsusib nerriugijaksaᴋartitipta perᴋojanganut,
2Timôteusemut ernimnut nalâgôrtomut okpernerme: Gûdib Atâtapta, Nâlekablo Jêsusib Kristûsib saimarsautiminut, nâpkigosungnerminullo, ullapirsautiminullo ilagilitittôk!
3Piniarit, sorlo ᴋaiblalaurapkit, Efêsusemêtuarᴋovlutit, Mazedôniamut ailaurama, perᴋojerᴋovlutit illanginik, ajoᴋertûseᴋarᴋonagit assianik;
4Nâlengniarᴋonagillo tukkeᴋangitomik oᴋâlajunik, apersûteᴋartuniglo illagêt kinguvângit naggateᴋangitut pivlugit; tamakkoa apersûtinermik atortitsinersaungmatta, Gûdemut idluartitsinermit okpernerme.
5Perᴋojat nalonairtitangat angnerpâk imaingmat: Naglingnek ômamut ivsornaitomut, issumamullo passijaksaungitomut, okpernermullo takkormôjuitomut.
6Tamakkoa tunupait illangita oᴋâlagalâdlarnernut piungitunut sâlerlutik.
7Ajoᴋertuijôjomagamik perᴋojanik, oᴋautsitiglônêt oᴋautigijaksatiglônêt tukkisinagit.
8Perᴋojalle ᴋaujimavavut ajungitoᴋsôngmatta, idluartomik atortaukpatta;
9Tamanna ᴋaujimavlugo, perᴋojat tunijaungimatta idluartok pivlugo, idluitulijulle, tappatojullo, Gûdemiglo nâlengitut, ajortulijullo, ivsornartulijullo, ᴋuksalaitullo toᴋotsijullo atâtamingnik anânamingniglo, inuartullo,
10Assiniartullo, nukapitjaniglo uivêriklertut, inungniglo tigliktut, saglotojullo, angerluktullo assingillo taimaitut ajoᴋertûtsemik atsuilinartomik akkerartortut pivlugit;
11Gûdib piloriktub oᴋausingit tussarnertut ânanaudlartut maliklugit; tâpkoa oᴋautigijaksarilugit perᴋojauvunga.
12Kristûselo Jêsuse Nâlegavut ᴋujagivara, nakoksitigijara, idluarasugilunga kivgartortilaungmanga tamattominga;
13Sivorngagut mitauteᴋartoksôjunga (Gûdemik) unangmiklertoksôlarmalo, oᴋauserluktiolarmalo; nâpkigijaulertungale, nalovlunga okperneᴋarnangalo taimailiulaurama.
14Nâlegaptale saimarsautâ angiluartoᴋsôlauᴋpok (uvamne), okpernerlo naglingnerlo Kristûse Jêsusemêtûk.
15Oᴋausek okpernartoᴋsôjok tamadja, angijomik nâleluariaᴋarnek, Kristûse Jêsuse nunamut tikingmat idluitulijut piulijartorlugit, tâpkonangat uvanga anginerôjunga.
16Taimaimalle nâpkigijaulerpunga, Jêsuse Kristûse sakᴋertitserᴋovlugo ᴋenuersârnerminik, piluartomik uvamne, igjaraksaulerᴋovlunga okperomârtunut tâpsomunga inôseᴋarniardlutik issoᴋangitomik.
17Gûdele, atanivik issoᴋangitok, nungusuitorlo, takuksaungitorlo silatujotôjorlo nâlengnarsile nakoridlartaulunelo issoᴋangitoksoarmut. Amen.
18Mattominga perᴋojamik unertôtivagit, ernera Timôteuse, oᴋautsit ipkua nalautsitiksat ilingnut pimajut pivlugit, malingniakit tamakkonane ajugaulerᴋovlutit.
19Okperneᴋarᴋovlutillo, passijaksaungitomiglo ilumiuteᴋarlutit; tamanna ilangita pingudlarpât, okpernermik umiolerdlutik.
20Taipkoa ilâgik Himenêuse Aleksanderelo. Tâpkoa Sâtanasemut pitilauktâkka, sugiartauᴋovlugik mitauteᴋarungnairᴋovlugik.
Currently Selected:
I Timôteusemut 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
